ಅನ್ನದೊಂದಿಗೆ ಉಣ್ಣುವ ಹುಳಿಮೆಣಸು ಎಂಬ ಪದಾರ್ಥ ನಮ್ಮ ದಕ್ಷಿಣ ಕನ್ನಡಿಗರ ಮನೆಯಲ್ಲಿ ಒಂದು ಮಾಮೂಲಿ ಅಡುಗೆ. ಮನೆಯೊಳಗೆ ಮಾತ್ರವಲ್ಲ, ಹತ್ತೂ ಜನ ಸೇರಿದ ಸಮಾರಂಭಗಳಲ್ಲೂ ಇದನ್ನು ಮಾಡುವುದಿದೆ. ಈ ವರ್ಷ ಮೂರು ಔತಣಕುಟಗಳಲ್ಲಿ ತೊಂಡೆಕಾಯಿಯ ಹುಳಿಮೆಣಸು ಸವಿದುಣ್ಣುವ ಭಾಗ್ಯ ನನ್ನದಾಗಿತ್ತು. ಹಣ್ಣುಸೌತೆಯಿಂದ ಹುಳಿಮೆಣಸು ಮಾಡಿದಿರಾದರೆ ಅದಕ್ಕೆ ನೆರುಗಳ ಸೊಪ್ಪು ಹಾಕಿದ್ರೇನೇ ಸೊಗಸು. ತೊಂಡೆಯ ಹುಳಿಮೆಣಸು ಬೆಳ್ಳುಳ್ಳಿಯ ಒಗ್ಗರಣೆ ಬಯಸುವುದಾದರೂ ಔತಣಕೂಟದ ಅಡುಗೆಯಲ್ಲಿ ಬೆಳ್ಳುಳ್ಳಿ ನುಸುಳುವಂತಿಲ್ಲ. ಕರಿಬೇವಿನ ಒಗ್ಗರಣೆ ಬಿದ್ದರಾಯಿತು. ಮಸಾಲಾ ಸಾಮಗ್ರಿಗಳನ್ನು ಬಯಸದ ಹುಳಿಮೆಣಸು, ಮೆಣಸು, ಉಪ್ಪು, ಹುಳಿ ಇದರ ಮೂಲದ್ರವ್ಯಗಳು.
ಇಂತಹ ಹುಳಿಮೆಣಸು , ನನ್ನ ಅಡುಗೆಮನೆಯಲ್ಲಿ ಹೊಸರೂಪ ಪಡೆಯಿತು, ಎಲ್ಲರ ಮೆಚ್ಚುಗೆಗೂ, ಮುಖ್ಯವಾಗಿ ಗೌರತ್ತೆಯ ಶಹಭಾಷ್ ಗಿರಿ ದಕ್ಕಿತು. ಹಾಗೇನೇ ಬ್ಲಾಗ್ ಬರಹವಾಗಿ ನಿಮ್ಮ ಮುಂದಿದೆ.
20 - 25 ತೊಂಡೆಕಾಯಿಗಳು, ಹಣ್ಣುಹಣ್ಣಾದ್ದು ಬೇಡ.
ಅರ್ಧ ಕಡಿ ತೆಂಗಿನ ತುರಿ,
4 ಒಣಮೆಣಸು, ಹುರಿಯಬೇಕಿಲ್ಲ, ಮೆತ್ತಗಾಗಲು ನೀರಿನಲ್ಲಿ ಹಾಕಿಟ್ಟಿರಿ.
ರುಚಿಗೆ ತಕ್ಕಷ್ಟು ಹುಳಿ, ಈಗ ಹೊಸ ಹುಳಿಯ ಕಾಲ...
ಕಾಲು ಚಮಚ ಅರಸಿಣ ಹುಡಿ, ಹಸಿ ಅರಸಿಣ ಇದ್ದರೆ ಉತ್ತಮ.
ರುಚಿಗೆ ಬೇಕಿದ್ದರೆ ಬೆಲ್ಲ.
ತೊಂಡೆಕಾಯಿಗಳನ್ನು ತೊಳೆದು ಗುಂಡುಕಲ್ಲಿನಲ್ಲಿ ಜಜ್ಜಿಕೊಳ್ಳಿ, ಬೀಜಗಳು ಹಾರುವಂತೆ ಗುದ್ದಬಾರದು.
ಕುಕ್ಕರಿನಲ್ಲಿ ಉಪ್ಪು ಸಹಿತವಾಗಿ ಬೇಯಿಸಿ, ಒಂದು ಸೀಟಿ ಸಾಕು, ಪಿಚಿಪಿಚಿಯಾಗುವಷ್ಟು ಬೇಯಬಾರದು.
ತೆಂಗಿನತುರಿ, ಅರಸಿಣ, ಮೆತ್ತಗಾದ ಒಣಮೆಣಸು, ಹುಳಿ ಕೂಡಿ ಅರೆಯಿರಿ.
ಅರೆ! ಇದರಲ್ಲೇನು ಹೊಸತನ ಬಂತು?
ನೋಡ್ತಾ ಇರಿ, ಕೊತ್ತಂಬರಿ ಸೊಪ್ಪು ತುಂಬಾನೇ ಇತ್ತು ಕಣ್ರೀ.. ಅದಕ್ಕೊಂದು ದಾರಿ ತೋರಿಸೋಣ.
ಒಂದು ಕಟ್ಟು ಕೊತ್ತಂಬರಿ ಸೊಪ್ಪು ತೊಳೆದು ಕಟ್ ಕಟ್ ಮಾಡಿ ತೆಂಗಿನತುರಿ ಇತ್ಯಾದಿಗಳೊಂದಿಗೆ ಅರೆಯಿರಿ.
ಬೇಯಿಸಿಟ್ಟ ತೊಂಡೆಕಾಯಿಗೆ ಈ ತೆಂಗಿನ ಅರಪ್ಪನ್ನು ಕೂಡಿ., ಅವಶ್ಯವಾದ ನೀರು ಎರೆದು ಕುದಿಸಿ.
ಹುಳಿಮೆಣಸಿನ ಕೊದ್ದೆಲ್ ಸಾರಿನಂತೆ ತೆಳ್ಳಗಾಗಬಾರದು, ಗಸಿಯಂತೆ ಮುದ್ದೆಯೂ ಆಗುವಂತಿಲ್ಲ. ಮಧ್ಯಮ ಸಾಂದ್ರತೆ ಬರುವಂತೆ ನೀರು ಎರೆದು ಹದ ಮಾಡಿಕೊಳ್ಳಿ.
ಸಿಹಿ ಇಷ್ಟಪಡುವವರು ಒಂದು ತುಂಡು ಬೆಲ್ಲ ಕುದಿಸುವಾಗ ಹಾಕತಕ್ಕದ್ದು.
ಬೆಳ್ಳುಳ್ಳಿ ಸುಲಿದು, ಜಜ್ಜಿ ಒಗ್ಗರಣೆಯಲ್ಲಿ ಹುರಿದು ಹಾಕಿರಿ. ಕರಿಬೇವು ಕೂಡಾ ಹಾಕಿ, ಅಂದ ಹಾಗೆ ತೆಂಗಿನಕಾಯಿ ಪದಾರ್ಥಕ್ಕೆ ತೆಂಗಿನೆಣ್ಣೆಯಲ್ಲೇ ಒಗ್ಗರಣೆ ಕೊಡಬೇಕು,
ಇದೀಗ ನಮ್ಮ ನವನವೀನ ವಿಧಾನದ ಹುಳಿಮೆಣಸು ಸಿದ್ಧ.