ಚಕ್ಕರ್ಪೆ ಪಾನಕ

" ಔತಣಕೂಟಕ್ಕೆ ಹೋಗುವುದಿದೆ, ನಿನ್ನ ಬ್ಲಾಗ್ ಓದುಗರಿಗೆ ರಸದೌತಣ ದೊರೆಯಲಿದೆ.. " ಗೌರತ್ತೆ ಚಟಾಕಿ ಹಾರಿಸಿದರು.

" ಹೌದೂ ಮತ್ತೇ, ದಿನಾ ನಮ್ಮ ಅಡುಗೆ ತಿಂದು ಅದನ್ನೇ ಎಷ್ಟೂಂತ ಬರೆಯೋದು.. "

ಅಂತೂ ಎಲ್ಲರೂ ಭರ್ಜರಿಯಾಗಿ ಹೊರಟೆವು. ಮುಂಜಾನೆಯ ತಿಂಡಿ ತಪ್ಪದಂತೆ ಬೇಗನೆ ತಲಪಿದೆವೂ ಅನ್ನಿ.

ಇಡ್ಲಿ ಚಟ್ಣಿ, ಕಾಯಿಹಾಲು, ಉಪ್ಪಿನಕಾಯಿ ಮೊಸರಿನೊಂದಿಗೆ ಒಂದು ಬಗೆಯ ಹಲ್ವ ಇದ್ದಿತು. ಯಾವುದೀ ಹಲ್ವ ಎಂದು ತಿಳಿಯದೆ ಬಡಿಸುತ್ತಿದ್ದವರನ್ನೇ ಕೇಳಬೇಕಾಗಿ ಬಂದಿತು.
" ಬಟಾಟೀದು.. " ಉತ್ತರ ಸಿಕ್ಕಿತು.

" ಬಟಾಟೆಯ ಹಲ್ವ ಮಾಡ್ತಾರೇಂತ ಕೇಳಿದ್ದೆ, ಇದೀಗ ತಿಂದ್ಹಂಗಾಯ್ತು. " ಗೌರತ್ತೆ ಅಂದರು.
ಬಟಾಟೆ ಹಲ್ವ ಇಷ್ಟು ರುಚಿಯಾಗಿರುತ್ತೆ ಅಂತ ನಾನೂ ಅಂದ್ಕೊಂಡಿರಲಿಲ್ಲ. " ಮಾಡಿ ನೋಡ್ಬೇಕು.."
" ಸಕ್ರೆ ತುಪ್ಪ ಇದ್ದರಾಯಿತು, ಬಾಳೆದಿಂಡಿನ ಹಲ್ವ ಕೂಡಾ ಮಾಡ್ಬಹುದು.. " ಗೌರತ್ತೆಯ ಹುಸಿನಗು, " ದ್ರಾಕ್ಷಿ ಗೇರುಬೀಜ ಏಲಕ್ಕಿ..."
" ಬಾಳೆದಿಂಡಿನ ಹಲ್ವ ನೀವೇ ಮಾಡ್ಕೊಳಿ... "

ಕೈ ತೊಳೆದು ಬರುವಷ್ಟರಲ್ಲಿ ಮಜ್ಜಿಗೆ ನೀರು ಎದುರಾಯಿತು. ಆಗಲೇ ಗಂಟೆ ಹನ್ನೊಂದಾಗಿತ್ತು, ಊಟಕ್ಕೆ ಮುಂಚಿತವಾಗಿ ಮಜ್ಜಿಗೆ ನೀರು ಕುಡಿಯುವುದುತ್ತಮ ಅಂದ್ಬಿಟ್ಟು ಮಜ್ಜಿಗೆ ಕುಡಿದು ಲೋಟ ಕೆಳಗಿಡುತ್ತಿರಬೇಕಾದರೆ ಸ್ಟೀಲ್ ಬಕೆಟ್ ತುಂಬ ಇದ್ದಂತಹ ಇನ್ನೊಂದು ಪಾನಕ ಕಂಡಿತು.

" ಇದೇನಿದು? "
" ಚಕ್ಕರ್ಪೆ ಜ್ಯೂಸ್... "
" ಹೌದಾ! ಜ್ಯೂಸ್ ಹೇಗಂತೆ ಮಾಡಿದ್ದೂ? "
"ಅದೇನಿಲ್ಲ, ಮುಳ್ಳುಸೌತೆ ಸಿಪ್ಪೆ ತೆಗೆದು, ಕಟ್ ಕಟ್ ಮಾಡಿ ಗ್ರೈಂಡರ್ ಗೆ ಹಾಕೂದು ಅಷ್ಟೇಯ.."
" ಕಾಳುಮೆಣಸು ಹಾಕಿದಂತಿದೆಯಲ್ಲ.."
" ಗುದ್ದಿ ಹಾಕೂದು, ಸಕ್ಕರೆ ಹಾಕ್ಬೇಕು. ಬೆಲ್ಲ ಹಾಕಿ ಮಾಡಿದ್ದು ಆಗಲೇ ಮುಗಿದಿದೆ.. "
ಇಂತಹ ತರಕಾರಿಗಳ ಶರಬತ್ ಮಾಡುವಾಗ ರುಚಿಗೆ ತಕ್ಕಷ್ಟು ಅಂತ ಉಪ್ಪು ಹಾಕಲೇಬೇಕು. " ಗೌರತ್ತೆಯ ಸೂಚನೆ.
ಅಂತೂ ವಿಧಾನ ತಿಳಿಯಿತು.

ನೀರು ಗೀರು ಕೂಡಿಸಲಿಕ್ಕಿಲ್ಲ, ಒಂದು ಮುಳ್ಳುಸೌತೆಯಲ್ಲಿ 95 ಶೇಕಡಾ ನೀರು ಇರುತ್ತದೆ, ತಿಳಿಯಿತಲ್ಲ.
ರಣಬೇಸಿಗೆಯ ತಾಪದಲ್ಲಿ ಬೇಯುತ್ತಿರುವಾಗ, ಜ್ಯೂಸ್ ಪಾರ್ಲರ್ ಹುಡುಕುತ್ತ ಹೋಗಬೇಕಾಗಿಲ್ಲ, ಮನೆಯಲ್ಲೇ ಆರಾಮವಾಗಿ ಮಾಡಿಕೊಳ್ಳಬಹುದಾದ ಪಾನಕ ಇದಾಗಿದೆ.

ಹಾಲು ಬೆರೆಸಿ, ಏಲಕ್ಕಿ ಉದುರಿಸಿ, ಮಿಲ್ಕ್ ಶೇಕ್ ಕುಡಿಯಿರಿ.
ಮಜ್ಜಿಗೆ ಎರೆದು, ಶುಂಠಿ ಗುದ್ದಿ ಹಾಕಿ, ರುಚಿಗೆ ಉಪ್ಪು ಹಾಕಿ ವೆಜಿಟಬಲ್ ಲಸ್ಸೀ ಸವಿಯಿರಿ.
ಸಿಹಿ ತಿನ್ನಲಾಗದವರು ಹಾಗೇನೇ ಕುಡಿದು ಆರಾಮವಾಗಿರಿ.
ಮುಳ್ಳುಸೌತೆಯೊಂದಿಗೆ ಬೇಸಿಗೆಯ ತಾಪವನ್ನು ಎದುರಿಸಲು ಸಿದ್ಧರಾಗಿರಿ.