ಮಾವಿನಕಾಯಿ ಗೊಜ್ಜು

ಮಾವಿನಕಾಯಿ ಕೊಯ್ದು ತಂದ ಚೆನ್ನಪ್ಪ, ವಿಶೇಷತೆಯೇನೂ ಇಲ್ಲ, ಉಪ್ಪಿನಕಾಯಿ ಹಾಕಬೇಕಾಗಿದೆ ಅಷ್ಟೇ.  

ಮೊದಲನೆಯದಾಗಿ ಮಾವಿನಕಾಯಿ ಹೇಗಿದೆಯೆಂದು ನೋಡುವುದು, ಕೇವಲ ಕಣ್ಣನೋಟ ಸಾಲದು, ಕತ್ತರಿಸಿ, ಉಪ್ಪು ಬೆರೆಸಿ, ಬೇಕಿದ್ದರೆ ಮೆಣಸನ್ನೂ ಹಾಕಿ ತಿನ್ನುವುದು. ಅದೂ ಆಯ್ತು.

ಎರಡನೆಯದಾಗಿ ಮಾವಿನಕಾಯಿ ಗೊಜ್ಜು ತಯಾರಿಸಿ ಅನ್ನದೊಂದಿಗೆ ಸವಿಯುವುದು.

ಹೇಗೆ?
ಎರಡು ಯಾ ಮೂರು ಮಾವಿನಕಾಯಿಗಳನ್ನು ಹೋಳು ಮಾಡಿ,
ಎರಡು ಹಸಿಮೆಣಸು ಸಿಗಿದು ಹಾಕಿ,
ಒಂದು ಲೋಟ ನೀರು ಎರೆದು,
ರುಚಿಗೆ ತಕ್ಕ ಉಪ್ಪು ಬಿದ್ದು,
ಮಾವಿನಕಾಯಿ ಬೇಯಲಿಟ್ಟು,
ಬೆಂದ ಮೇಲೆ ಆರಲು ಬಿಟ್ಟು,
ಮಿಕ್ಸಿ ಯಂತ್ರ ಬೇಡ,
ಕೈಯ ತಂತ್ರದಲ್ಲಿ ಗಿವುಚಿ,
ಗಿವುಚಿದಾಗ,
ಗೊಜ್ಜು ಬಂದೆನೆಂದಿತು,
ಒಗ್ಗರಣೆಯ ಮರೆಯದಿರಿ,
ಬೆಲ್ಲವನ್ನು ಬಿಡದಿರಿ,
" ಅಹಹ... ಸಿಹಿ
ಒಹೊಹೋ ಹುಳಿ "
ಸವಿಯುತ್ತ ಉಣ್ಣಿರಿ.

ಯುಗಾದಿಗೆ ಮಾವಿನಕಾಯಿ ಗೊಜ್ಜು ಮಾಡಿ ತಿಂದೆವು.
ಯುಗಾದಿ ಬರಬೇಕು, ಮಾವಿನಕಾಯಿ ಇರಬೇಕು. ಅಲ್ವೇ?