Pages

Ads 468x60px

Friday 16 March 2018

ಹುಣಸೆ ಹಣ್ಣಿನ ಸಾರು



ಬೇಸಿಗೆಯೂ ಬಂತಲ್ಲ, ದಿನವೂ ಏನೋ ಒಂದು ಬಗೆಯ ಸಾರು ಇದ್ದರೇನೇ ಅನ್ನ ಹೊಟ್ಟೆಗೆ ಹೋದೀತು. ಪುಲಾವು, ಗೀರೈಸು ಇತ್ಯಾದಿ ಹಿಡಿಸದು. ಹುಣಸೆಯ ಸವಿರುಚಿಯಲ್ಲಿ ಸಾರು ಮಾಡೋಣ.

ನೆಲ್ಲಿಗಾತ್ರದ ಹುಣಸೆ ಹಣ್ಣು.
ರುಚಿಗೆ ಉಪ್ಪು ಹಾಗೂ ಬೆಲ್ಲ.
ಒಂದು ಲೋಟ ನೀರಿನಲ್ಲಿ ಹುಣಸೆಯ ಹಣ್ಣನ್ನು ಗಿವುಚಿ ರಸ ತೆಗೆದಿರಿಸಿ.
ಒಂದನೆಯ ಸಿದ್ಧತೆ ಆಯ್ತು.

2 ಚಮಚ ಕಾಯಿತುರಿ
4 ಒಣಮೆಣಸು
1 ಚಮಚ ತೊಗರಿಬೇಳೆ
2 ಚಮಚ ಕೊತ್ತಂಬರಿ
ಪುಟ್ಟ ಚಮಚದಲ್ಲಿ ಜೀರಿಗೆ ಹಾಗೂ ಮೆಂತೆ
ಉದ್ದಿನ ಕಾಳಿನಷ್ಟು ಇಂಗು
ಏಳೆಂಟು ಕಾಳು ಸಾಸಿವೆ
ನಾಲ್ಕಾರು ಕಾಳುಮೆಣಸು
ಒಂದು ಎಸಳು ಕರಿಬೇವು
ಚಿಟಿಕೆ ಅರಸಿಣ
ತುಸು ಎಣ್ಣೆ ಯಾ ತುಪ್ಪದ ಪಸೆಯಲ್ಲಿ ಮಸಾಲಾ ಸಾಮಗ್ರಿಗಳನ್ನು ಹುರಿಯಿರಿ.
ಎರಡು ಕರಬೇವಿನೆಲೆ ಹಾಕಿ ಬಾಡಿಸಿ,
ತೆಂಗಿನತುರಿಯನ್ನೂ ಹಾಕಿ ಸೌಟಾಡಿಸಿ,
ಉರಿ ನಂದಿಸಿ ಆರಲು ಬಿಡಿ,
ಮಿಕ್ಸಿ ಯಂತ್ರದಲ್ಲಿ ನುಣ್ಣಗೆ ಪುಡಿ ಆಯ್ತು ಅನ್ನಿ.

ಬೇಕಿದ್ದರೆ ಮೇಲಿನ ಮಸಾಲಾ ಅಳತೆಯನ್ನು ತುಸು ಹೆಚ್ಚು ಪ್ರಮಾಣದಲ್ಲಿ ತೆಗೆದುಕೊಂಡು ನಾಲ್ಕಾರು ದಿನಗಳ ಬಳಕೆಗೆ ತಕ್ಕಷ್ಟು ಸಾರಿನ ಹುಡಿ ಮಾಡಿಟ್ಟುಕೊಳ್ಳಲೂ ಸಾಧ್ಯವಿದೆ, ಆದರೆ ತೆಂಗಿನತುರಿ ಹಾಗೂ ತೊಗರಿಬೇಳೆ ಹಾಕುವುದು ಬೇಡ.

ಸಾರು ಮಾಡುವ ತಪಲೆ, ನಾನ್ ಸ್ಟಿಕ್ ಪ್ಯಾನ್ ಆದರೆ ಉತ್ತಮ, ಒಗ್ಗರಣೆ ಶಾಸ್ತ್ರವನ್ನೂ ಅದರಲ್ಲೇ ಮಾಡಿಕೊಳ್ಳಬಹುದಾಗಿದೆ.

ಸಾಸಿವೆ ಕರಿಬೇವಿನ ಒಗ್ಗರಣೆ ಸಿಡಿಸಿ, ಹುಣಸೆರಸ ಎರೆದು, ಬೆಲ್ಲ ಉಪ್ಪು ಹಾಕಿ, ಇನ್ನೂ ಒಂದು ಲೋಟ ನೀರು ಎರೆದು ಕುದಿಯಲು ಬಿಡಿ, ಸಾರಿನ ಪುಡಿ ಹಾಕಿ ಸೌಟಾಡಿಸಿ, ಕುದಿಯಲಿ. ರುಚಿಕರವಾಗಿದೆಯೋ ಇಲ್ಲವೋ ಎಂದು ಪರೀಕ್ಷಿಸಿ… “ ಆಹ, ಹುಣಸೆಯ ಸಾರು ಆಯ್ತು. “ ಅನ್ನಿ.

“ ಹೊಸ ಹುಣಸೆ ಹಣ್ಣು ತುಂಬಾ ಉಷ್ಣ… “ ಗೌರತ್ತೆಯ ತಾಜಾ ಕಿವಿ ಮಾತು ತೇಲಿ ಬಂದಿತು.
ಪರವಾ ಇಲ್ಲ, ನಮ್ಮದು ಅಡುಗೆಯ ಉಪಯೋಗ, ಹಾಗೇನೇ ಹುಣಸೆಹಣ್ಣು ತಿನ್ನುವ ಮಕ್ಕಳಾಟಿಕೆಯವರಿಗೆ ಈ ಹಿತವಚನ ಬಂದಿದೆ.

ಹುಳಿ ಹಾಗೂ ಸಿಹಿ ಬೆರೆತಿರುವ ಹುಣಸೆಯ ಹಣ್ಣಿನ ರಸದಲ್ಲಿ ಟಾರ್ಟಾರಿಕ್ ಆಮ್ಲ ಇರುವುದು. ವಿಟಮಿನ್ ಸಿ, ವಿಟಮಿನ್ ಕೆ, ವಿಟಮಿನ್ ಇ ಹಾಗೂ ವಿಟಮಿನ್ ಬಿ-ಕಾಂಪ್ಲೆಕ್ಸ್ ಕೊಡಾ ಹುಣಸೆಯ ಹಣ್ಣಿನಲ್ಲಿದೆ. ಹಣ್ಣುಗಳಲ್ಲಿ ಅತಿ ವಿರಳವಾಗಿರುವ ಕ್ಯಾಲ್ಸಿಯಂ ಮಾತ್ರವಲ್ಲದೆ ಐರನ್, ಮೆಗ್ನೇಶಿಯಂ, ಫಾಸ್ಫರಸ್, ಪೊಟಾಶಿಯಂ, ಸೋಡಿಯಂ ಹಾಗೂ ಅಲ್ಪಪ್ರಮಾಣದ ಝಿಂಕ್ ಇರುತ್ತದೆ. ಖನಿಜಾಂಶ ಸಮೃದ್ಧವಾಗಿರುವ ನಿತ್ಯಬಳಕೆಯ ಇಂತಹ ಬೇರೆ ಹಣ್ಣು ನಮ್ಮ ಮುಂದೆ ಇಲ್ಲ. ಅದರಲ್ಲೂ ಹುಣಸೆಯ ಹಣ್ಣು ದಿನನಿತ್ಯವೂ ಅಡುಗೆಗೆ ಉಪಯೋಗಿಸಲ್ಪಡುವಂತದ್ದಾಗಿದೆ.

ಇಷ್ಟೆಲ್ಲ ಪೋಷಕಾಂಶಗಳು ನಾವು ಅಡುಗೆಯಲ್ಲಿ ಬಳಸುವ ಟೊಮ್ಯಾಟೋ ಹಣ್ಣಿನಲ್ಲಿ ಇಲ್ಲ, ಲಿಂಬೆ ಹಣ್ಣಿನಲ್ಲಿ ಗಮನಾರ್ಹ ಜೀವಸತ್ವಗಳು ಇದ್ದರೂ ಬಹುವಿಧ ಅಡುಗೆಯಲ್ಲಿ ಬಳಸಲು ಸಾಧ್ಯವಾಗುವುದಿಲ್ಲ. ಒಮ್ಮೆ ಕೊಯ್ದು ಸಂಸ್ಕರಿಸಿ ಇಟ್ಟಂತಹ ಹುಣಸೆಹುಳಿಯಿಂದ ವರ್ಷಪೂರ್ತಿ ಉಪಯೋಗ ಪಡೆಯಬಹುದಾಗಿದೆ. ಹಳೆಯದಾಯಿತೇ, ನಿರ್ಲಕ್ಷಿಸುವಂತಿಲ್ಲ. ಪಿತ್ತಶಾಮಕವೆಂಬ ಔಷಧಿಯಾಗಿ ಖ್ಯಾತಿ ಹುಣಸೆಯದಾಗಿದೆ. ನಿತ್ಯ ಹರಿದ್ವರ್ಣದ tamarindus indica, ಅರಣ್ಯ ವೃಕ್ಷ, ಇದರ ಉತ್ಪನ್ನವಾದ ಹುಣಸೆಹುಳಿ ಕಾಡು ಉತ್ಪತ್ತಿಗಳ ವರ್ಗಕ್ಕೆ ಸೇರಿದಂತಹುದು.




0 comments:

Post a Comment