ದೋಸೆಯ ಅಪ್ಪ!

ಉದ್ದಿನ ದೋಸೆಯ ಹಿಟ್ಟು ಉಳಿಯಿತು, " ಸಂಜೆ ಪುನಃ ಎರೆದರೆ ಮಗಿದೀತು.."
ನನ್ನ ಸ್ವಗತ ಗೌರತ್ತೆ ಕಿವಿಗೆ ಬಿತ್ತು, " ಮಕ್ಕಳು ಬಂದಿರುವಾಗ ಸಂಜೆಗೂ ಚೊಂಯ್ ಅಂತ ದೋಸೆ ಮಾಡ್ತಾ ಇರು.." ಗೊಣಗಿದ್ದೂ ನನ್ನ ಕಿವಿ ತನಕ ಬಂತು.

ಅಪ್ಪದ ಗುಳಿಕಾವಲಿ ಕೆಳಗಿಳಿಯಿತು. ಚೆನ್ನಾಗಿ ಒರೆಸಿ, ವಿಮ್ ಲಿಕ್ವಿಡ್ ಹಾಕಿ ತೊಳೆದು, ನೀರ ಪಸೆ ಆರಲು ಕವುಚಿ ಇಟ್ಟಾಯ್ತು.

ಸಂಜೆಯ ಹೊತ್ತು, ಅಪ್ಪದ ಗುಳಿಕಾವಲಿ ಒಲೆಯ ಮೇಲೇರಿತು. ಎಣ್ಣೆ ಅಂದ್ರೆ ಹಪ್ಪಳ ಹುರಿದ ಎಣ್ಣೆ ಯಾ ಅಡುಗೆಯಲ್ಲಿ ಒಂದೆರಡು ಬಾರಿ ಬಳಸಲ್ಪಟ್ಟ ಎಣ್ಣೆಯನ್ನು ಪುಟ್ಟದೊಂದು ಚಮಚದಲ್ಲಿ ತುಂಬಿ ಗುಳಿಗಳ ಒಳಗೆ ಎರೆದು...

" ತುಪ್ಪವನ್ನೇ ಎರೆ.. " ಗೌರತ್ತೆಯ ಆರ್ಡರ್ ಬಂತು.
ಸರಿ, ನಾವು ತುಪ್ಪವನ್ನೇ ಎರೆದು,
ದೋಸೆಹಿಟ್ಟನ್ನು ಸೂಕ್ತ ಪ್ರಮಾಣದಲ್ಲಿ ಗುಳಿಗಳಿಗೆ ತುಂಬಿಸಿ, ಮುಚ್ಚಿ ಬೇಯಿಸುವುದು.
ಚೂರಿಯ ಮೊನೆಯಿಂದ ಎಬ್ಬಿಸಿ, ತುಪ್ಪ ಎರೆದು ಕವುಚಿ ಹಾಕುವುದು, ಜಾಸ್ತಿ ಎರೆಯದಿರಿ, ಗುಳಿ ಒಣಗಿದಂತಿರಬಾರದು.
ಎರಡೂ ಬದಿ ಸಮಾನವಾಗಿ ಬೆಂತಪ್ಪ
ತಟ್ಟೆಗೆ ಹಾಕ್ಕೊಂಡು ತಿನ್ನುದಪ್ಪ
ಟೊಮ್ಯಾಟೋ ಪುಳಿಂಜಿ ಇತ್ತಪ್ಪ
ಕೂಡಿಕೊಂಡು ತಿಂದೆವಪ್ಪ
ದೋಸೆಯ ಅಪ್ಪ
ಬಲು ಚೆನ್ನಾಗಿತ್ತಪ್ಪ

"ಹೌದೂ, ದೋಸೆ ಹಿಟ್ಟು ಯಾವ ನಮೂನಿದೂಂತ ಹೇಳಿರಲ್ಲ.. "

1 ಅಳತೆ ಉದ್ದಿನ ಬೇಳೆ
1 ಅಳತೆ ಹೆಸ್ರು ಬೇಳೆ
2 ಚಮಚ ಮೆಂತೆ
2 ಅಳತೆ ಬೆಳ್ತಿಗೆ ಅಕ್ಕಿ

ಬೇಳೆಗಳನ್ನೂ ಅಕ್ಕಿಯನ್ನೂ ಬೇರೆ ಬೇರೆಯಾಗಿ ತೊಳೆದು ನೆನೆಸಿಡುವುದು.
ಸಂಜೆಯ ಹೊತ್ತು ಅರೆಯಿರಿ.
ಬೇಳೆಗಳನ್ನು ಮೊದಲು ನುಣ್ಣಗೆ ಅರೆದು,
ಅಕ್ಕಿಯನ್ನೂ ಅದೇ ಪ್ರಕಾರವಾಗಿ ನುಣ್ಣಗೆ ಅರೆದು,
ರುಚಿಗೆ ಉಪ್ಪು ಕೂಡಿಸಿ, ಬೆರೆಸಿ ಹುದುಗು ಬರಲು ಬೆಚ್ಚನೆಯ ಜಾಗದಲ್ಲಿ ಮುಚ್ಚಿ ಇರಿಸುವುದು.
ಮುಂಜಾನೆ ದೋಸೆ ಎರೆದದ್ದು, ಸಂಜೆಗೆ ಅಪ್ಪವಾಯಿತು.
ಇಡ್ಲಿ ಹಿಟ್ಟು ಮಿಕ್ಕಿದ್ದರೆ ಅದೂ ಆಗುತ್ತೆ ಇಡ್ಲಿಯ ಅಪ್ಪ.

ನಮ್ಮ ವಿಶಾಲ ಕರ್ನಾಟಕ ವ್ಯಾಪ್ತಿಯಲ್ಲಿ ಈ ಸಂಜೆಯ ತಿನಿಸು ತರಹೇವಾರಿ ಹೆಸರುಗಳನ್ನು ಹೊಂದಿದೆ. ಪನಿಯಾರಮ್, ಪಡ್ಡು, ಗುಳಿಯಪ್ಪ, ಗುಂಡಪೊಂಗಲು, ಅಪ್ಪಂ.. ಈ ಥರ.

ಅಂದ ಹಾಗೆ ಹಸಿಮೆಣಸು, ಶುಂಠಿ, ಕರಿಬೇವು, ಕೊತ್ತಂಬರಿ ಸೊಪ್ಪು ಬೆರೆಸಿ ಅಪ್ಪ ಮಾಡುವುದು ರೂಢಿಯ ಕ್ರಮ. ಹೀಗೆ ಮಾಡಿದಿರಾದರೆ ಮೊಸರಿನೊಂದಿಗೆ ಸವಿಯಿರಿ, ಉದ್ದಿನ ವಡೆಯಂತೆ ಸ್ವಾದಿಷ್ಟವಾಗಿರುತ್ತದೆ.