ಕುಚ್ಚುಲಕ್ಕಿ ಅನ್ನ

" ಅಮ್ಮ, ಏನ್ ಮಾಡ್ತಾ ಇದ್ದೀ? "
" ಕುಚ್ಚುಲಕ್ಕಿ ಅನ್ನ ಮಾಡೂದನ್ನ ಬರೆಯೋಣಾಂತ.. "
" ಅಯ್ಯೋ, ಯಾರು ಓದ್ತಾರೇ.. ಯೂಟ್ಯೂಬಿನಲ್ಲೂ ಸಿಗುತ್ತೆ.. "
" ಇರ್ಲಿ ಬಿಡು, ನಾನು ಅಳತೆ ಲೆಕ್ಕಾಚಾರ ಎಲ್ಲ ಬರೆದಿಟ್ಟಾಗಿದೆ.."
ಕುಚ್ಚುಲಕ್ಕಿ ಪ್ರಿಯನಾದ ಮಧು ವಿಷಯಾಂತರಿಸಿ " ತಿಂಡಿಗೇನು ಮಾಡಿದೀಯ? " ಪ್ರಶ್ನೆ ಎಸೆದ.
" ಖರ್ಜೂರದ ದೋಸೆ, ಉಳಿದ ಹಿಟ್ಟಿಂದ ಸಂಜೆ ಅಪ್ಪ ಮಾಡೂದು. "
" ಆಯ್ತು, ನಂದು ಮೆಟ್ರೋ ಸ್ಟೇಶನ್ ಬಂತು, ಸಂಜೆ ಮಾತಾಡೋಣ. "

ನಾವು ಕುಚ್ಚುಲಕ್ಕಿ ಅನ್ನ ಮಾಡೋಣ.

ಕಟ್ಟಿಗೆಯ ಒಲೆಯಲ್ಲಿ ಬೇಯುವ ಕುಚ್ಚುಲಕ್ಕಿ, ಇಂದು ಕಾಲಧರ್ಮಕ್ಕನುಸಾರ ಬೇಯಿಸುವ ಮಾಧ್ಯಮವೂ ಬದಲಾಗಿದೆ. ಇಲೆಕ್ಟ್ರಿಕ್ ಉಪಕರಣದಿಂದ ಬೇಯಿಸ ಹೋದರೆ ಕರೆಂಟ್ ಬಿಲ್ ಕೂಡಾ ಯದ್ವಾತದ್ವಾ ಏರಿಕೆಯಾದೀತು.

ಗ್ಯಾಸ್ ಒಲೆ ಹಾಗೂ ಪ್ರೆಶರ್ ಕುಕ್ಕರ್ ನಮ್ಮ ಆಯ್ಕೆ.
5 ಲೀಟರ್ ಸಾಮರ್ಥ್ಯದ ಕುಕ್ಕರ್ ಇರಲಿ, ಒಳಗಿನ್ನೊಂದು ತಪಲೆ ಇಟ್ಟು ಅನ್ನ ಮಾಡುವಂತಿಲ್ಲ.
ನೇರವಾಗಿ ಕುಕ್ಕರ್ ಒಳಗೆ 3 ಲೀಟರ್ ನೀರು ಎರೆಯಿರಿ, ನೀರು ತುಸು ಜಾಸ್ತಿ ಎರೆದರೆ ಒಳ್ಳೆಯದು. ಮೂರೂವರೆ ಲೀಟರ್ ಅಂತಿಟ್ಕೊಳ್ಳಿ. ದೊಡ್ಡ ಉರಿಯಲ್ಲಿ ನೀರು ಕುದಿಯಲಿ.
2 ಲೋಟ ಕುಚ್ಚುಲಕ್ಕಿ ಅಳೆದು ತೊಳೆಯಿರಿ, 3ರಿಂದ ನಾಲ್ಕು ಬಾರಿ ತೊಳೆದು, ನೀರು ಬಸಿದು, ಕುದಿಯುತ್ತಿರುವ ನೀರಿಗೆ ಹಾಕಿರಿ. ಕುಕ್ಕರ್ ಮುಚ್ಚಿ ವೆಯಿಟ್ ಹಾಕಿರಿ.

ಕುಕ್ಕರ್ ಮೂರು ಸೀಟಿ ಹಾಕಿದ ಕೂಡಲೇ ಉರಿ ತಗ್ಗಿಸಿ.
15 ನಿಮಿಷಗಳ ನಂತರ ಗ್ಯಾಸ್ ನಂದಿಸಿ.
ಒತ್ತಡ ಪೂರ್ಣವಾಗಿ ಇಳಿದ ನಂತರವೇ ಮುಚ್ಚಳ ತೆರೆಯತಕ್ಕದ್ದು.
ಅನ್ನ ಚೆನ್ನಾಗಿ ಬೆಂದಿರುತ್ತದೆ. ಅನ್ನದ ಗಂಜಿನೀರು ಯಾ ತೆಳಿ ಬಸಿಯಬೇಕಾಗಿದೆ.

ಜಾಗರೂಕತೆಯಿಂದ ಇನ್ನೋಂದು ತಪಲೆ ಎದುರಿಗಿಟ್ಟು, ತಟ್ಟೆಯ ಸಹಾಯದಿಂದ ಬಗ್ಗಿಸಿ ಗಂಜಿ ಬಸಿಯಿರಿ. ಈ ಕಾರ್ಯಕ್ಕೆ ಸ್ವಲ್ಪ ಅನುಭವವೂ ಬೇಕಾಗುತ್ತದೆ.

ಇದು ಸಾಧ್ಯವಾಗದ ಕಾರ್ಯ ಎಂದಾದರೆ ತೂತಿನ ತಪಲೆಗೆ ಬಸಿದು ಅನ್ನ ಮಾಡಿಕೊಳ್ಳಬಹುದು, ಜಾಲರಿ ಸಟ್ಟುಗದಲ್ಲಿ ಅನ್ನ ಹಾಗೂ ಗಂಜಿ ಬೇರ್ಪಡಿಸಿಕೊಳ್ಳಬಹುದು.

ಅನ್ನ ಎಂದೆನ್ನಿಸಿಕೊಳ್ಳಬೇಕಾದರೆ ತೆಳಿ ಯಾ ಗಂಜಿ ಏನೂ ಇರಕೂಡದು.

ಈಗ ನಾವು ಎರೆದ ನೀರಿನ ಪ್ರಮಾಣದಲ್ಲಿ ಗಂಜಿ ನೀರು 2 ಲೀಟರ್ ಇರಬೇಕು.
ಬೇಯಿಸಲು ಎರೆದ ನೀರಿನ ಪ್ರಮಾಣ ಕಡಿಮೆಯಾದರೆ ಮಡ್ಡಿಯಂತೆ ಇಲ್ಲವೇ ಮುದ್ದೆಯಂತೆ ಆದೀತು. ಗಂಜಿ ಬಸಿಯಲೂ ಸಾಧ್ಯವಾಗದು. ಹಾಗೇನೇ ಗಂಜಿಯೂಟ ಎಂದು ಉಣ್ಣಬೇಕಾದೀತು.

ಕುಕ್ಕರ್ ಉತ್ತಮ ಸ್ಥಿತಿಯಲ್ಲಿ ಇರಬೇಕು, ಲೀಕೇಜ್ ಯಾ ಸೋರುವಿಕೆ ಇರಬಾರದು.
ಪದೇ ಪದೇ ವಿಸಿಲ್ ಹಾಕುತ್ತ ಇರಬಾರದು, ಅನ್ನವೂ ಗಂಜಿಯೂ ಮೇಲೆ ಉಕ್ಕಿ ಹರಿದೀತು.
ಕುಕ್ಕರ್ ಒಳಗೆ ತಪಲೆಯಿಟ್ಟು ಬೇಯಿಸುವ ಕ್ರಮ ಕುಚ್ಚುಲಕ್ಕಿಗೆ ಸಾಧ್ಯವಾಗದು.

ಕಟ್ಟಿಗೆಯ ಒಲೆಯಲ್ಲಿ ನಿಧಾನವಾಗಿ ಬೇಯುವ ಕುಚ್ಚುಲಕ್ಕಿ ನಮ್ಮ ಒತ್ತಡದ ಹಾಗೂ ವೇಗದ ಜೀವನಶೈಲಿಯಿಂದಾಗಿ ನಮ್ಮಿಂದ ದೂರವಾಗುತ್ತಿದೆ.

ನಾವು ದಕ್ಷಿಣ ಕನ್ನಡಿಗರು, ಜಗತ್ತಿನ ಯಾವ ಮೂಲೆಗೆ ಹೋದರೂ ಕುಚ್ಚುಲಕ್ಕಿ ಅನ್ನವನ್ನು ತಿಂದೇ ಸಿದ್ಧ ಎಂಬ ಜಾಯಮಾನದವರು. ನನ್ನ ಮಕ್ಕಳ ವಯೋಮಾನದವರಿಗೆ ಇಷ್ಟವಾದೀತು ಎಂದು ಈ ಬರಹ ಬಂದಿದೆ.

ಅನ್ನದ ತೆಳಿಯನ್ನು ಚೆಲ್ಲಬೇಕಿಲ್ಲ,
ಉಪ್ಪು ಬೆರೆಸಿ ಕುಡಿಯಿರಿ.
ಹಸಿಮೆಣಸು ನುರಿದು, ಮಜ್ಜಿಗೆ ಎರೆದು ಕುಡಿಯಿರಿ.
ದೇಹಕ್ಕೆ ಹಿತವಾಗಿ ಉಲ್ಲಾಸದಾಯಕ.
ಅಕ್ಕಿಯಲ್ಲಿರುವ ಜೀವ ಪೋಷಕ ದ್ರವ್ಯಗಳು ತೆಳಿ( ಗಂಜಿ )ಯಲ್ಲಿಯೂ ಇರುವುದರಿಂದ ರುಚಿಕರವಾಗಿಸಿ ಎಳೆಯ ಮಕ್ಕಳಿಗೂ ಕುಡಿಸಿರಿ.



ಟಿಪ್ಪಣಿ: ಈ ಬರಹಕ್ಕೆ ಪೂರಕ ಪ್ರತಿಕ್ರಿಯೆ ಬಂದಿದೆ. ಅನ್ನದ ಗಂಜಿ ಬಸಿಯುವ ಸುಲಭ ವಿಧಾನ ಹೀಗಿದೆ.

ಒತ್ತಡ ಇಳಿದ ನಂತರ ಮುಚ್ಚಳ ತೆಗೆದು ಗ್ಯಾಸ್ಕೆಟ್ ತೆಗೆದು ಪುನಃ ಮುಚ್ಚಿ , ಇನ್ನೊಂದು ತಪಲೆಗೆ ಬಗ್ಗಿಸಿ ಹಿಡಿಯಿರಿ. ಗಂಜಿನೀರು ಮಾತ್ರ ಇಳಿದು ಹೋಗುತ್ತದೆ. ಅನ್ನ ಬೀಳುವ ಭಯವೇ ಇಲ್ಲ, ಹಿಡಿದುಕೊಳ್ಳಲು ಕುಕ್ಕರಿನ ಹಿಡಿಕೆಯೇ ಇರುವುದರಿಂದ ಕೈ ಬಿಸಿ ಆಗಲಾರದು.