ಉಪ್ಪಿನಕಾಯಿಯ ರುಚಿ

" ಈ ನಿನ್ನ ನೆಲ್ಲಿಕಾಯಿ ಉಪ್ಪಿನಕಾಯ್ ತಿಂದು ಸಾಕಾಯ್ತು.. ಅಂಗಳದಲ್ಲಿ ಬೀಂಬುಳಿ ಮರ ಉಂಟಲ್ಲ.. "

ನನಗೂ ಒಂದೇ ತೆರನಾದ ಉಪ್ಪಿನಕಾಯಿ ತಿಂದು ಸಾಕಾಗಿತ್ತು. ಎಳೆಯ ನೆಲ್ಲಿಕಾಯಿಗಳು ಸಿಕ್ಕಿದಾಗ ಜಜ್ಜಿ ಉಪ್ಪು ಬೆರೆಸಿ ಇಟ್ಟಿದ್ದು, ಉಪ್ಪಿನಕಾಯಿ ಹಿಟ್ಟು ಬೆರೆಸಿ ಊಟದ ತಟ್ಟೆಗೆ ಬಡಿಸಲಿಕ್ಕೂ ಆಗುತ್ತೇಂತ ಅಂದ್ಕೊಂಡಿದ್ದೆ

" ಬೀಂಬುಳಿ ಉಂಟೋ ನೋಡಿ ಬನ್ನಿ.. " ಗೌರತ್ತೆ ಹೊರ ಹೋದವರು ಬೀಂಬುಳಿಗಳನ್ನು ಕೊಯ್ದು ತಂದಿಟ್ಟರು.

ಸಂಜೆಯ ಬಿಡುವಿನ ವೇಳೆ, ಅಡುಗೆಮನೆಯಲ್ಲಿ ಉಪ್ಪಿನಕಾಯಿ ವೈವಿಧ್ಯಕ್ಕೆ ಬೇಕಾದಂತಹ ಸಾಮಗ್ರಿಗಳು ಇವೆಯೆಂದು ಖಚಿತಪಡಿಸಿಕೊಂಡೇ ಬೀಂಬುಳಿಗಳನ್ನು ಎದುರಿಗಿಟ್ಟು ಮೆಟ್ಟುಕತ್ತಿಯಲ್ಲಿ ಚಕಚಕನೆ ಸಮಾನ ಗಾತ್ರದಲ್ಲಿ ಕತ್ತರಸಿ ಇಟ್ಟಾಯ್ತು.

"ನಾಲ್ಕು ಗಾಂಧಾರಿ ಮೆಣಸು ಹಾಕು.. "
" ಆಯ್ತು.. " ಅನ್ನುತ್ತ ಮೂಲೆಯಲ್ಲಿದ್ದ ಮಾವಿನ ಶುಂಠಿಯನ್ನೂ ಕೊಚ್ಚಿ ಹಾಕಲಾಯಿತು.
ಉಪ್ಪಿನ ನೆಲ್ಲಿಕಾಯಿಗಳನ್ನು ಬಿಡಬೇಕಾಗಿಲ್ಲ, ಒಂದು ಸೌಟು ನೆಲ್ಲಿಕಾಯಿ ಹೋಳುಗಳೂ ಸೇರಿದಾಗ ಇದೊಂದು ಹೊಸರುಚಿಯ ಪಾಕ ಆದೀತು.

ಬಾಣಲೆಗೆ 3 ಚಮಚ ಸಾಸಿವೆ,
1 ಚಮಚ ಕೊತ್ತಂಬರಿ
ಸ್ವಲ್ಪ ಜೀರಿಗೆ
ಕಡ್ಲೆ ಗಾತ್ರದ ಇಂಗು
ಎಣ್ಣೆ ಹಾಕದೆ ಬೆಚ್ಚಗಾಗುವಷ್ಟು ಹುರಿಯಿರಿ, ಮಿಕ್ಸಿಯಲ್ಲಿ ನುಣ್ಣಗೆ ಪುಡಿ ಆಗಲು ಇದು ಸುಲಭ ವಿಧಾನ.

ಮಿಕ್ಸಿಯ ಜಾರು ಶುಭ್ರವಾಗಿರಬೇಕಾದ್ದು ಕಡ್ಡಾಯ. ಮಿಕ್ಸಿಯಲ್ಲಿ ತಿರುಗಿಸಲು ಈ ಸಾಮಗ್ರಿಗಳು ಏನೂ ಸಾಲದು. ಅದಕ್ಕೇನು ಮಾಡೋಣ?

3 ಚಮಚ ಮೆಣಸಿನ ಹುಡಿ
ಅರ್ಧ ಚಮಚ ಅರಸಿಣದ ಹುಡಿ
3 ಚಮಚ ಉಪ್ಪಿನ ಹುಡಿ
ಜೊತೆಗೂಡಿ ಅರೆಯಿರಿ.
ನುಣ್ಣಗೆ ಪುಡಿ ಆಯ್ತು.
ಉಪ್ಪನ್ನೂ ಹಾಕಿ ತಿರುಗಿಸೂದ್ರಿಂದ ಮಿಕ್ಸಿಯ ಬ್ಲೇಡ್ ಹರಿತವಾಗುತ್ತೆ ಅಂತ ಎಲ್ಲೋ ಓದಿದ ನೆನಪು ಬಂತು.

ಉಪ್ಪಿನಕಾಯಿಗಾಗಿ ಅರೆದ ಮಸಾಲೆ ಏನಿದೆಯೋ ಅದನ್ನು ' ಹೊರಡಿ ' ಅನ್ನುವ ವಾಡಿಕೆ ನಮ್ಮದು. ಮೆಣಸು ಸಾಸಿವೆ ಇತ್ಯಾದಿಗಳನ್ನು ಹುರಿದು ಅರೆದಾಗ ಉಪ್ಪಿನಕಾಯಿ ಹುರಿದ ಹೊರಡಿ ಆಯ್ತು. ಹುರಿಯದೇ ಹಾಗೇನೇ ಅರೆದಾಗ ಹಸಿ ಹೊರಡಿ ಬಂದಿತು ಅನ್ನಿ. ಅಚ್ಚ ಕನ್ನಡದಲ್ಲಿ ಉಪ್ಪಿನಕಾಯಿ ಹಸಿ ಹಿಟ್ಟು ಹಾಗೂ ಹುರಿದ ಹಿಟ್ಟು ಅಂದರಾದೀತು.

ನಾನು ಮಾಡಿದಂತಹ ಉಪ್ಪಿನಕಾಯಿ ಹೊರಡಿ ಹಸಿಯೂ ಅಲ್ಲದ ಹುರಿದೂ ಇಲ್ಲದ ಮಾದರಿಯದು. ಹೇಗೆ ಮಾಡಿದ್ರೂನೂ ರುಚಿಕರವಾದರೆ ಸಾಕು.

ಇದೀಗ ಮಿಕ್ಸಿಯಲ್ಲಿ ಸಿದ್ಧವಾದ ಉಪ್ಪಿನಕಾಯಿ ಹೊರಡಿಯನ್ನು ಬೀಂಬುಳಿ ಹೋಳುಗಳಿಗೆ ಬೆರೆಸಿ ಮುಚ್ಚಿ ಇಡುವುದು. ಇದೀಗ ಸಂಜೆಯ ಹೊತ್ತು, ನಾಳೆ ಮುಂಜಾನೆ ಉಪ್ಪಿನಕಾಯಿ ಹದವಾಗಿ ಬಂದಿದಯೋ ಎಂದು ನೋಡಿಕೊಳ್ಳೋಣ.

ಬೆಳಗಾಯಿತು, ಉಪ್ಪಿನಕಾಯಿ ಜಾಡಿ ಬಿಡಿಸಿ ನೋಡಿದಾಗ, ನೆಲ್ಲಿಕಾಯಿ, ಗಾಂಧಾರಿ, ಮಾಂಙನ್ನಾರಿ, ಬೀಂಬುಳಿಯೊಂದಿಗೆ ಸೇರಿ ಅರ್ಧಕ್ಕರ್ಧ ಕಳಗಿಳಿದಿವೆ! ನಾಲಿಗೆ ರುಚಿ ನೋಡಿತು...
ಗಾಂಧಾರಿ ಮೆಣಸು ಇತ್ತಲ್ವೇ, ಅಬಬ.. ಸ್ವಲ್ಪ ಉಪ್ಪು ಹಾಕೋಣ.
2 ಚಮಚ ಉಪ್ಪು ಬೆರೆಸಿ, ಸೌಟಿನಲ್ಲಿ ಗರಗರ ತಿರುಗಿಸಿ ಮೇಲೆ ಕೆಳಗೆ ಮಾಡ್ಬಿಟ್ಟು, ಮದ್ಯಾಹ್ನದೂಟಕ್ಕೆ ಟೇಬಲ್ ಮೇಲೆ ಇಟ್ಟೂ ಆಯ್ತು.

" ಊಟಕ್ಕೂ ಸೈ, ತಿಂಡಿಗೂ ಜೈ. " ಗೌರತ್ತೆ ಅಂದಿದ್ದು.