ಅನ್ನದ ಗಂಜಿ

ಕುಚ್ಚುಲಕ್ಕಿ ಅನ್ನ ತಯಾರಿಯ ವಿಧಾನ ಬರೆದಾಯ್ತು. ಬಾಲ್ಯದ ದಿನಗಳ ನೆನಪೂ ಬಂದಿತು.

ಅಂದಿನ ದಿನಗಳಲ್ಲಿ ಸಿರಿವಂತರೇ ಆಗಿದ್ದರೂ ಕಟ್ಟಿಗೆಯ ಒಲೆ ಅಡುಗೆಮನೆಗಳಲ್ಲಿ ಇತ್ತು. ಅತ್ಯಾಧುನಿಕತೆಯ ಸ್ಪರ್ಶ ಲವಲೇಶವೂ ಇದ್ದಿರಲಿಲ್ಲ. ಕುಚ್ಚುಲಕ್ಕಿ ಅನ್ನವೇ ಎಲ್ಲರ ಮನೆಯ ನಿತ್ಯದೂಟ. ದೇವರಿಗೆ ನೈವೇದ್ಯದ ಅನ್ನ ಇಟ್ಟು ಉಣ್ಣುವವರ ಮನೆಯಿಂದ ಮಾತ್ರ ಗಂಧಸಾಲೆ ಅನ್ನದ ಸುಗಂಧ ಬರುತ್ತಿತ್ತು.

ಇರಲಿ, ಅನ್ನದ ಗಂಜಿಯ ಸದ್ಬಳಕೆ ಹೇಗೆಂದು ನೋಡೋಣ. ಮನೆ ಅಂದ ಮೇಲೆ ಹಸು ಎಮ್ಮೆಗಳೂ ಇರಬೇಕು, ಮನೆಮಂದಿಗೆ ಹಾಲು ಮಜ್ಜಿಗೆ ಆಗಬೇಡವೇ, ಪ್ಯಾಕೇಟ್ ಹಾಲು ವಿತರಣಾ ವ್ಯವಸ್ಥೆ ನಮ್ಮ ಕನಸಿಗೂ ನಿಲುಕದ ಮಾತು. ಅನ್ನದ ಗಂಜಿಯನ್ನು ಕರೆಯುವ ಹಸುವಿಗೆ ಇಲ್ಲವೇ ಕರುವಿಗೆ ಕುಡಿಸಲಾಗುತ್ತಿತ್ತು.

ಭಾನುವಾರದ ರಜೆಯ ದಿನ, ತಲೆಗೆ ಎಣ್ಣೆ ಹಾಕಿ ಮೀಯುವ ದಿನ, ದಿನ ಮುಂಚಿತವಾಗಿ ನನ್ನಮ್ಮ ಒಂದು ತಪಲೆಯಲ್ಲಿ ಅನ್ನದ ಗಂಜಿಯನ್ನು ತೆಗೆದಿರಿಸುತ್ತಿದ್ದಳು. ತಂಪು ತಂಪಾದ ಅನ್ನದ ಗಂಜಿ ಹಲ್ವದಂತೆ ಯಾ ಮುದ್ದೆಯಂತೆ ಇಲ್ಲವೇ ಹಾಲುಬಾಯಿಯಂತೆ ಕತ್ತರಿಸಿ ತಿನ್ನುವ ಹಾಗಿರುತ್ತಿತ್ತು.
" ಬಾ ಇಲ್ಲಿ, ಕುಳಿತುಕೋ.. " ಅನ್ನುತ್ತ ಮುಕ್ಕಾಲುಮಣೆಯಲ್ಲಿ ಕುಳ್ಳಿರಿಸಿ, ಜಡೆ ಬಿಡಿಸಿ ನೆತ್ತಿಯಿಂದ ಕೂದಲ ತುದಿವರೆಗೆ ಅನ್ನದ ಗಂಜಿಯ ಸಿಂಚನ. ಗಂಟೆ ಬಿಟ್ಟು ಸೀಗೇಹುಡಿ, ಗೊಂಪುಗಳೊಂದಿಗೆ ಸರಸವಾಡುತ್ತ ತಲೆಗೆ ನೀರೆರೆಯುವಾಟದ ನೆನಪು ಈಗಲೂ ತಂಪು ತಂಪಾಗಿ ಮನದಾಳದಲ್ಲಿ...
ಇದು ಅನ್ನದ ಗಂಜಿಯ ಒಂದು ಉಪಯೋಗ.

ಕಾಸರಗೋಡು ಮಗ್ಗದ ಸೀರೆ, ನನ್ನಮ್ಮನ ನಿತ್ಯದುಡುಗೆ. ಕಾಟನ್ ಸೀರೆಗಳೂ ಇರುತ್ತಿದ್ದುವು. ಕೆಲಸಗಿತ್ತಿಯು ಬಟ್ಟೆ ತೊಳೆದ ನಂತರ ಅಮ್ಮನ ಸೀರೆಯನ್ನು ತೆಗೆದಿರಿಸಿ, " ತೆಳಿ ಇಲ್ಲವೇ? " ಎಂದು ಕೇಳುವುದೂ, ಅಮ್ಮ ಒಂದು ತಪಲೆ ಅನ್ನದ ಗಂಜಿಯನ್ನು ಹೊರಗಿರಿಸುವುದೂ, ಆಕೆ ತೆಳಿಯನ್ನು ಬಕೇಟಿಗೆ ಎರೆದು ಇನ್ನೂ ನೀರೆರೆದು ತೆಳ್ಳಗಾಗಿಸಿ, ಸೀರೆಯನ್ನು ಗಂಜಿಯಲ್ಲಿ ಅದ್ದಿ ಅದ್ದಿ, ಹಿಂಡಿ ತೆಗೆದು ಮದ್ಯಾಹ್ನದ ಸುಡುಬಿಸಿಲಿಗೆ ಒಣಹಾಕುವಲ್ಲಿಗೆ ಅನ್ನದ ಗಂಜಿಯ ಇನ್ನೊಂದು ಉಪಯೋಗ. ಹತ್ತಿಯ ಬಟ್ಟೆಗಳು ಹೊಚ್ಚ ಹೊಸತಾಗಿ ಹೆಚ್ಚು ಸಮಯ ಬಾಳಿಕೆ ಬರಲು ಈ ಉಪಾಯ.
ಈಗ ನೂಲಿನ ಸೀರೆಗಳನ್ನು ಕೇಳುವವರಿಲ್ಲ, ನೈಟೀಧಾರಿಣಿಯರಿಗೆ ಸೀರೆಯ ಹಂಗಿಲ್ಲ.

ಅನ್ನದ ಗಂಜಿ ಇಲ್ಲದಿದ್ದರೂ ಗಂಜಿ ಹಾಕಿದ ಸೀರೆ ಆಗಬೇಕಿದೆಯಲ್ಲ, ಏನು ಮಾಡೋಣ?

2 - 3 ಚಮಚ ಮೈದಾ ಹಿಟ್ಟು, ಒಂದ ಲೋಟ ನೀರಿನಲ್ಲಿ ಗಂಟುಗಳಿರದಂತೆ ಕಲಸಿ,
ಒಂದು ತಪಲೆ ನೀರು ( ಒಂದು ಲೀಟರ್ ) ಕುದಿಸಿ,
ಕುದಿಯುತ್ತಿರುವ ನೀರಿಗೆ ಮೈದಾ ಹಿಟ್ಟನ್ನು ಎರೆದು,
ಸಟ್ಟುಗದಲ್ಸಿ ಆಡಿಸುತ್ತ ಇದ್ದಂತೆ ಮೈದಾ ಬೆಂದು ಮೈದಾ ಗಂಜಿ ಬಂದಿತೇ, ಈ ಗಂಜಿಯಿಂದ ಸೀರೆಗಳಿಗೆ, ಹತ್ತಿಯ ಬಟ್ಟೆಗಳಿಗೆ ಗಂಜೀ ಸ್ಪರ್ಶ ಕೊಡಬಹುದು.
ನೆನಪಿರಲಿ, ಬಿಸಿಲು ಇಲ್ಲದಿರುವಾಗ, ಭೋರೆಂದು ಮಳೆ ಸುರಿಯುತ್ತಿರುವಾಗ ಗಂಜಿ ಬಟ್ಟೆ ಮಾಡಿಕೊಳ್ಳಲು ಸಾಧ್ಯವಾಗದು.

ಅಡುಗೆಯಲ್ಲಿ ಗಂಜಿಯ ಉಪಯೋಗ ಹೇಗೆ?

ತಿಳಿಸಾರು ಮಾಡುವಾಗ ರುಚಿಗೆ ಸೂಕ್ತವಾಗುವಂತೆ ತೆಳಿ ಎರೆಯಬಹುದು, ಸಾರು ಉಣ್ಣುವಾಗ, " ತೆಳಿ ಹಾಕಿ ಮಾಡಿದ್ದೋ ? " ಎಂದು ಕೇಳುವಂತಿರಬಾರದು.

ತೊಗರಿಬೇಳೆ ಯಾ ಇನ್ನಿತರ ಬೇಳೆಕಾಳುಗಳನ್ನು ಬೇಯಿಸಲು ಅನ್ನದ ಗಂಜಿ ತಯಾರಾಗಿ ಇದ್ದರೆ ಅದರಲ್ಲೇ ಬೇಯಿಸಿ.
ತರಕಾರಿಗಳನ್ನೂ ಬೇಯಿಸಬಹುದು.
ಸೂಪ್ ಮಾಡ್ತಿದ್ದೀರಾ? ಅನ್ನದ ಗಂಜಿ ಬೇಕಾದೀತು.
ಗಂಜಿಗೆ ಉಪ್ಪು ಹಾಕಿ, ಗಾಂಧಾರಿ ಮೆಣಸು ನುರಿದು, ಮಜ್ಜಿಗೆ ಎರೆದು ಕುಡಿಯಿರಿ, ಬಿಸಿಲ ಬೇಗೆಗೆ ಸೂಕ್ತ ಪಾನೀಯ.

ಇದ್ಯಾವುದೂ ಬೇಕಾಗಿಲ್ಲ, ಮನೆ ಮುಂದಿನ ತೆಂಗಿನ ಮರದ ಬುಡಕ್ಕೆ ಚೆಲ್ಲಿ, ಗೊಬ್ಬರವಾಯಿತು ಅನ್ನಿ.