ರಾತ್ರಿಯ ಅನ್ನ ಮಿಕ್ಕಿತ್ತು, 2 ಸೌಟು ಬೆಳ್ತಿಗೆ ಅನ್ನ, ಸ್ವಲ್ಪ ನೀರು ಸೇರಿಸಿ ಅರೆಯಿರಿ.
ಫ್ರಿಜ್ ಒಳಗೆ ಇಟ್ಟಂತಹ ತೆಳ್ಳವಿನ ಹಿಟ್ಟು ಇತ್ತು, ಒಂದು ದೊಡ್ಡ ಲೋಟ ಹಿಟ್ಟು ಉಳಿದದ್ದು ಹೊರ ಬಂದಿತು.
ಒಂದೂವರೆ ಲೋಟ ರಾಗಿ ಹುಡಿ, ಅಂಗಡಿಯಿಂದ ತಂದದ್ದು.
ಎಲ್ಲವನ್ನೂ ಕೂಡಿಸಿ ಕಲಸಿದಾಗ ದಪ್ಪವಾದ ಹಿಟ್ಟು ಮೇಲೆದ್ದಿತು.
ದೋಸೆಯಂತೆ ಎರೆಯಲಾಗದು.
ರೊಟ್ಟಿಯಂತೆ ತಟ್ಟಲಾಗದು, ತಟ್ಟಲಿಕ್ಕೆ ಬಾಳೆ ಎಲೆ ಮನೆಯೊಳಗೆ ಇಲ್ಲ.
ಅಡುಗೆಯ ಸಂಗ್ರಹದಿಂದ ಅಕ್ಕಿ ಹುಡಿ ತಲೆಯೆತ್ತಿತು.
ಪ್ಯಾಕೇಟ್ ಬಿಡಿಸಿ, ಒಂದು ಲೋಟ ಅಕ್ಕಿ ಹುಡಿಗೆ ಒಂದೂವರೆ ಲೋಟ ನೀರೆರೆದು ಕೂಡಿಸಿದಾಗ ದೋಸೆಯಂತೆ ಎರೆಯಲಾಗುವ ದ್ರಾವಣ ದೊರೆಯಿತು.
ರುಚಿಗೆ ಸಾಕಷ್ಟು ಉಪ್ಪು ಬಿದ್ದಿತು.
ಕಾಯಿತುರಿ ನೀರುಳ್ಳಿ ಗಾಂಧಾರಿ ಮೆಣಸುಗಳ ಸಂಯೋಜನೆಯಲ್ಲಿ ಚಟ್ಣಿ ಟೇಬಲ್ ಮೇಲೆ ಕುಳಿತಿತು.
ಬೆಲ್ಲ ಗುದ್ದಿ ಪುಡಿ ಮಾಡಿ ನೀರೆರೆದು ಕುದಿಸಿದಾಗ ರವೆ ಎಂಬ ಬೆಲ್ಲದ ಪಾಕ ನಕ್ಕು ನಲಿಯಿತು.
ತವಾ ಬಿಸಿಯೇರಿತು, ಎಳ್ಳೆಣ್ಣೆಯ ಚುಟ್ಟಿ ಅಡಿಕೆ ಹಾಳೆಯ ತುಂಡಿನಿಂದ ಸವರಲಾಯಿತು.
ದೋಸೆಯು ರೊಟ್ಟಿಯಂತೆ ಎದ್ದು ಬಂದಿತು.
ಅರೆ! ಚೆನ್ನಾಗಿದೆಯಲ್ಲ...
ರುಚಿಕರವಾದ ಈ ರೊಟ್ಟಿಯನ್ನು ಮಿಕ್ಕ ಕುಚ್ಚುಲಕ್ಕಿ ಅನ್ನದಿಂದಲೂ ಮಾಡಬಹುದಾಗಿದೆ.
ಅನ್ನವನ್ನು ಅರೆಯಲು ಇಷ್ಟವಿಲ್ಲದವರು ಎರಡು ಯಾ ಮೂರು ಬಾಳೆಹಣ್ಣು ಬಳಸಿರಿ.
ಚಟ್ಣಿಯ ಸಾಮಗ್ರಿಗಳನ್ನು ತರಿತರಿಯಾಗಿ ಅರೆದು ದೋಸೆ ಹಿಟ್ಟಿಗೆ ಕೂಡಿಸಿ, ರೊಟ್ಟಿಯನ್ನು ಹಾಗೇನೇ ತಿಂದು ಏಳಬಹುದು.
0 comments:
Post a Comment