ದೋಸೆಯ ಸುಪ್ರಭಾತ

              

ನಾಳೆ ಭಾನುವಾರ,  ಚೆನ್ನಪ್ಪ ರಜೇ..  ನಮ್ಮಿಬ್ಬರಿಗೆ ಬೇಕಾದಷ್ಟೇ ದೋಸೆ ಹಿಟ್ಟು ಅರೆದಿಟ್ಟರೆ ಮುಂಜಾನೆಯ ತಲೆಬಿಸಿ ಇಲ್ಲ.

ಒಂದು ಪಾವು ಬೆಳ್ತಿಗೆ ಅಕ್ಕಿ ಸಾಕು,  ಡಬ್ಬದಲ್ಲಿ ಮುಗಿಯುತ್ತ ಬಂದಿದೆ,  ಎಲ್ಲವನ್ನೂ ಅಳೆದಾಗ ಇನ್ನೂ ಅರ್ಧ ಪಾವಕ್ಕಿ ಹೆಚ್ಚಿಗೆ ಬಿದ್ದಿತು.   ಚಿಂತೆಯಿಲ್ಲ,  ಮುಗಿದೀತು.

ತೆಂಗಿನಕಾಯಿ ಕಡಿ ಇದೆ,  ಎರಡು ಬಾಳೆಹಣ್ಣು ಬೇಕಾಗಿದೆ.

ಎಲ್ಲವೂ ಸಿದ್ಧವಾಗಿದೆ,   ಅರೆಯುವುದೊಂದೇ ಬಾಕಿ.

ಕಸಪೊರಕೆ ಇಟ್ಟ ಮೂಲೆಯಿಂದ ಇರುವೆಗಳ ಸಾಲು ಸಾಲು ಹೊರಟಿದೆ.

ಎಲ್ಲಿಗೆ ಮೆರವಣಿಗೆ?

ಸಕ್ಕರೆ,  ಬೆಲ್ಲ,  ಹಾಲು,  ಮೊಸರು ಯಾವುದೂ ಆದೀತು.   ತುಪ್ಪ,  ಎಣ್ಣೆ,  ಬೆಣ್ಣೆ ಯಾವುದನ್ನೂ ನಾವು ಬಿಡೋರಲ್ಲ!

ಹೌದಲ್ಲ!   " ಇರುವೆಗೊಂದು ದಾರಿ ಕಾಣಿಸ್ರೀ... "    ಡಬ್ಬದಲ್ಲಿ ಏನೋ ಹುಡಿ ತಂದಿಟ್ಕೊಂಡಿದ್ರು,  ಇರುವೆಗಳ ಸಾಲು ಹೋದ ಜಾಗದಲ್ಲಿ,  ಅಲ್ಲಲ್ಲಿ ಕುಕ್ಕಿ ಹೋದ್ರು ನಮ್ಮೆಜಮಾನ್ರು.

ಈ ಧಾವಂತದೆಡೆಯಲ್ಲಿ ದೋಸೆಹಿಟ್ಟು ಅರೆಯಲಿಕ್ಕುಂಟೇ...   ಅದೇನಿದ್ದರೂ ನಾಳೆಗೇ ಮುಂದಿನ ಕಾರ್ಯಾಚರಣೆ.   ಸಾಧ್ಯವಾದ ಮಟ್ಟಿಗೆ ಇರುವೆಗಳು ಬೀಳದಂತೆ ಎಲ್ಲವನ್ನೂ ಮುಚ್ಚಿಟ್ಟು,  ಎತ್ತಿಟ್ಟು,  ತೆಂಗಿನಕಾಯಿಯನ್ನೂ ಭದ್ರವಾಗಿಟ್ಟೂ ಆಯ್ತು.

ಮುಂಜಾನೆಯ ಹೊತ್ತು,  ಅಡುಗೆಮನೆ ಶಾಂತವಾಗಿದ್ದಿತು.  ಒಮ್ಮೆ ಕಸಪೊರಕೆಯಾಡಿಸಿ ಕೆಲಸ ಪ್ರಾರಂಭಿಸೋಣ.

ಅಕ್ಕಿಯನ್ನು ಚೆನ್ನಾಗಿ ತೊಳೆದು,

ಅರ್ಧ ಕಡಿ ತೆಂಗಿನಕಾಯಿ ತುರಿದು,

ಎರಡು ಬಾಳೆಹಣ್ಣು ನುರಿದು,

ಎಲ್ಲವನ್ನೂ ಒಟ್ಟಿಗೆ ಅರೆದು,

ರುಚಿಗೆ ಉಪ್ಪು ಬಿದ್ದು,

ದೋಸೆಹಿಟ್ಟು ಸಿದ್ಧ.

ತೆಂಗಿನಕಾಯಿ ಚಟ್ಣಿ ಆಗಲೇ ಬೇಕು.  ಕಾಯಿತುರಿ,  ಈರುಳ್ಳಿ, ಶುಂಠಿ, ಹಸಿಮೆಣಸುಗಳ ಸಹಯೋಗದಿಂದ ಟೇಬಲ್ ಮೇಲೆ ಚಟ್ಣಿ ವಿರಾಜಮಾನವಾಯಿತು.

ಹಾಲು ಕುದಿದಿದೆ,

ಡಿಕಾಕ್ಷನ್ ಇದೆ,

ಮೊಸರು ತಯಾರಿದೆ,

ತಡವೇಕೆ ಅಕ್ಕಾ...

ದೋಸೆ ಎರೆಯೋಣ.

ಹ್ಞಾ,  ಇದು ಬಾಳೆಹಣ್ಣು ದೋಸೆ,  ನಿನ್ನೆಯೇ ಅರೆದಿಟ್ಟಿರಬೇಕಾಗಿತ್ತು,  ದಪ್ಪ ಬ್ರೆಡ್ ದೋಸೆ ಆಗಬೇಕಾಗಿತ್ತು.   ಈಗ ಏನು ಮಾಡೋಣಾ...

 ತವಾ,  ನಾನ್ ಸ್ಟಿಕ್ ಆಗಿರೋದ್ರಿಂದ ತುಸು ತೆಳ್ಳಗೆ ನೀರು ದೋಸೆಯ ಥರ ಹಾರಿಸಿ ಎರೆದರೂ ನಡೆದೀತು -  ಎಂಬ ಘನ ಚಿಂತನೆ ಮೂಡಿದ್ದೇ ತಡ,  ದೋಸೆಹಿಟ್ಟು ನೀರುನೀರಾಯಿತು.

ತುಪ್ಪ ಸವರಿದ ತವಾ ಬಿಸಿಯೇರಿತು,  

ಹಿಟ್ಟು ಝೊಂಯ್ ಯೆಂದು ಬಿದ್ದು,

ಕವುಚಿ ಮಗುಚಿ ಎದ್ದಿತು.

ಬಾಳೆಹಣ್ಣಿನ ತೆಳ್ಳವು ಕೂಡಾ ಮಾಡಬಹುದು ಅಂತ ಇವತ್ತೇ ತಿಳಿದದ್ದು ಕಣ್ರೀ...