ಮಾವಿನ ಹಣ್ಣಿನ ದಪ್ಪ ದೋಸೆ

ಮಾವಿನ ಹಣ್ಣಿನ ತೆಳ್ಳವು ತಿನ್ನುತ್ತ, " ನಾಳೆಯೂ ಇದೇ ದೋಸೆ ಆದೀತು.. " ಅಂದರು ಗೌರತ್ತೆ.

" ದಿನಾ ನೀರ್ ತೆಳ್ಳವು ಬೇಡ.. "

" ಬೇಡಾಂದ್ರೆ ಬೇಡ, ಮಾವಿನ ಹಣ್ಣು ಹಾಕಿಯೇ ಮೆಂತೆ ದೋಸೆ ಮಾಡಿ ನೋಡಿದ್ರಾಯ್ತು.. " ನನ್ನ ಸಮಜಾಯಿಷಿ ಬಂದಿತು.

ಅಡುಗೆಯ ಈ ಹೊಸ ಪ್ರಯೋಗದಲ್ಲಿ 2 ಚಮಚ ಮೆಂತೆ ಮುಂಜಾನೆಯೇ ನೆನೆ ಹಾಕಲ್ಪಟ್ಟಿತು.
2 ಲೋಟ ಬೆಳ್ತಿಗೆ ಅಕ್ಕಿಯೂ ನೀರಿನಲ್ಲಿ ನೆನೆದು ಮೈ ತೊಳೆದುಕೊಂಡಿತು.
ಅರ್ಧ ಕಡಿ ತೆಂಗಿನತುರಿ ಎದುರಾಯಿತು.
ಸಂಜೆಯ ಹೊತ್ತು ಇನ್ನಷ್ಟು ಮಾವಿನಹಣ್ಣುಗಳು ತೋಟದಿಂದ ಆಗಮಿಸಿದುವು.
ಏಳೆಂಟು ಪುಟ್ಟ ಪುಟ್ಟ ಹಣ್ಣುಗಳನ್ನು ತೊಳೆದು ತೊಟ್ಟು ತೆಗೆದು, ಸಿಪ್ಪೆ ಬಿಡಿಸಿ, ರಸ ತೆಗೆದಿಟ್ಟಾಯ್ತು.

ಮೆಂತೆ ನುಣ್ಣಗಾದಷ್ಟೂ ಒಳ್ಳೆಯದು, ಮೊದಲು ಮೆಂತೆಯನ್ನು ತೆಂಗಿನತುರಿಯೊಂದಿಗೆ ತುಸು ನೀರೆರೆದು ಅರೆಯುವುದು.
ಸಾಕಷ್ಟು ನುಣ್ಣಗಾದ ನಂತರ ಅಕ್ಕಿ ಹಾಗೂ ಮಾವಿನಹಣ್ಣಿನ ರಸ ಹಾಕಿಕೊಂಡು ಅರೆಯುವುದು.
ಬೇಕೆನಿಸಿದರೆ ನೀರು ಎರೆಯಬಹುದಾಗಿದೆ.
ಹುದುಗು ಬರಲಿಕ್ಕಾಗಿ 7 - 8 ಗಂಟೆಗಳ ಕಾಲ ಮುಚ್ಚಿ ಇರಿಸುವುದು.
ರುಚಿಗೆ ತಕ್ಕಷ್ಟು ಉಪ್ಪು ಹಾಕುವುದು.
ಸಿಹಿಪ್ರಿಯರು ಒಂದು ತುಂಡು ಬೆಲ್ಲವ್ನೂ ಹಾಕಬಹುದು, ಬೆಲ್ಲ ಹಾಕಿದ ದೋಸೆ ಕಪ್ಪು ಕಪ್ಪಾಗಿ ಬರುವುದರಿಂದ ನಾನು ಹಾಕಿಲ್ಲ.
ಮಾರನೇ ಮುಂಜಾನೆ ಮಾವಿನ ಹಣ್ಣಿನ ದೋಸೆ ಬ್ರೆಡ್ ನಂತೆ ಉಬ್ಬಿ ಬಂದಿತು.
ಎಣ್ಣೆ ಸವರಿದ ತವಾ ಬಿಸಿಯೇರಿದ ನಂತರ ಒರೆಸಿ ತೆಗೆಯಿರಿ, ಒಂದು ಸೌಟು ಹಿಟ್ಟು ಎರೆದು, ಸೌಟಿನಲ್ಲಿ ತುಸು ಹರಡಿ, ಮುಚ್ಚಿ ಬೇಯಿಸಿ, ತುಪ್ಪ ಎರೆದು ಕವುಚಿ ಹಾಕಿ.
ಪುನಃ ದೋಸೆ ಎರೆಯುವಾಗ ತವಾ ಒರೆಸಿಕೊಳ್ಳತಕ್ಕದ್ದು.

ತೆಂಗಿನಕಾಯಿ ಚಟ್ಣಿ ಹಾಗೂ ಫಿಲ್ಟರ್ ಕಾಫಿಯೊಂದಿಗೆ ಈ ವಿಶೇಷವಾದ ಮ್ಯಾಂಗೋ ದೋಸೆ ಸವಿಯುವ ಭಾಗ್ಯ ನಮ್ಮದಾಗಿದೆ.