Pages

Ads 468x60px

Saturday 8 September 2018

ಬೀಟ್ರೂಟು ಪಚ್ಚಡಿ




        



ಬೀಟ್ರೂಟ್ ಎಂಬ ಕೆಂಬಣ್ಣದ ಗೆಡ್ಡೆ ತರಕಾರಿ ತಂದಿದೆ, ಕಳೆದ ವಾರ ತರಕಾರಿ ತಂದಾಗಲೂ ಬಂದಿತ್ತು, ಅದನ್ನೇ ಅಡುಗೆ ಮಾಡಿ ಆಗಿಲ್ಲ, ತಂದಿದ್ದು ಹೆಚ್ಚಾಯ್ತು ಅನ್ನೋ ಹಾಗಿಲ್ಲ, ಬೀಟ್ರೂಟು ಅಷ್ಟು ಬೇಗನೆ ಕೆಡುವ ತರಕಾರಿಯೂ ಅಲ್ಲ, ಇರುತ್ತದೆ ಬಿಡಿ.

ದೋಸೆ ಇಡ್ಲಿ ಹಿಟ್ಟುಗಳಿಗೆ ಒಂದೆರಡು ಚಮಚ ಹಿಟ್ಟು ಮಾಡಿ ಹಾಕಿದ್ರೂನೂ ಬಣ್ಣದ ತಿಂಡಿ ಅಂತ ತಿನ್ನಬಹುದು. ಬಣ್ಣದ ರೊಟ್ಟಿ ಮಾಡುವ ವಿಧಾನವನ್ನು ಈ ಮೊದಲೇ ಬರೆದಿದ್ದೇನೆ, ಆಸಕ್ತರು ಹುಡುಕಿ ಓದಿರಿ.

ಈಗ ನಾವು ಬೀಟ್ರೂಟು ಪಚ್ಚಡಿ ಮಾಡೋಣ.
ಅರ್ಧ ಕಡಿ ತೆಂಗಿನತುರಿ,
ಎರಡು ಹಸಿಮೆಣಸು, ಗಾಂಧಾರಿ ಮೆಣಸು ಇದ್ದರೆ ಅದೂ ಆದೀತು.
ಒಂದು ತುಂಡು ಸಿಪ್ಪೆ ಹೆರೆದ ಶುಂಠಿ,
ನಾಲ್ಕಾರು ಕಾಳುಮೆಣಸು,
ಅರ್ಧ ಲೋಟ ಬೀಟ್ರೂಟು ಹೋಳುಗಳು, ಚಿಕ್ಕದಾಗಿ ಹೆಚ್ಚಿದರೆ ಉತ್ತಮ.
ರುಚಿಗೆ ಉಪ್ಪು,
 ರುಚಿಗೆ ತಕ್ಕಷ್ಟು ಹುಣಸೆಯ ಹಣ್ಣು, ನನ್ನ ಬಳಿ ಹಿತ್ತಲ ಬೆಳೆಯಾದ ಕರಂಡೆ ಹಣ್ಣು ( ಕವಳೇ ಹಣ್ಣು ) ಇದ್ದಿತು, ಎರಡು ಹಣ್ಣು ಸಾಕಾಯ್ತು. ಈಗ ಅಂಬಟೆಯ ಕಾಲ ಅಲ್ವೇ, ಇದ್ದರೆ ಅದನ್ನೇ ಹಾಕಬಹುದು.
ಎಲ್ಲವನ್ನೂ ಅಗತ್ಯಕ್ಕೆ ತಕ್ಕಂತೆ ನೀರು ಎರೆದು ಅರೆಯಿರಿ, ಕರಿಬೇವಿನ ಒಗ್ಗರಣೆ ಕೊಡುವಲ್ಲಿಗೆ ಬೀಟ್ರೂಟು ಪಚ್ಚಡಿ ಬಂದಿತು. ದೋಸೆ ಇಡ್ಲಿ ಚಪಾತಿಗಳಿಗೆ ಹೊಂದಿಸಿ ತಿನ್ನಬಹುದಾಗಿದೆ.

ಹುಳಿ ಹಾಕಲಿಲ್ಲವೇ, ಒಂದು ಲೋಟ ಸಿಹಿ ಮೊಸರು ಎರೆಯಿರಿ, ಬೀಟ್ರೂಟು ಗೊಜ್ಜು ಬಂದಿತು. ಅನ್ನದೊಂದಿಗೆ ಕಲಸಿ ತಿನ್ನಲು ಯೋಗ್ಯವಾದ ಈ ವ್ಯಂಜನ ಒಲೆಯನ್ನು ಬಯಸದ ಅಡುಗೆಯಾಗಿದೆ.

 88 ಶೇಕಡಾ ನೀರು ಹೊಂದಿರುವ ಈ ಗೆಡ್ಡೆ ತರಕಾರಿಯಲ್ಲಿ ಕೊಬ್ಬಿನಂಶ ಏನೇನೂ ಇಲ್ಲ. ಅಲ್ಪ ಪ್ರಮಾಣದಲ್ಲಿ ವಿಟಮಿನ್ B9, ಸೋಡಿಯಂ, ಮ್ಯಾಂಗನೀಸ್, ಕಾರ್ಬೋಹೈಡ್ರೇಟ್ ಹಾಗೂ ಇನ್ನಿತರ ಖನಿಜಾಂಶಗಳಿಂದ ಕೂಡಿದ ಬೀಟ್ರೂಟು ಎಂಬ Beta vulgaris ಸಸ್ಯಸಂಕುಲವು ಹರಿವೆಯ Amaranthaceae ಕುಟುಂಬವಾಸಿ. ಬೀಟ್ರೂಟು ಎಲೆಗಳನ್ನು ಪಾಲಕ್ ಸೊಪ್ಪಿನಂತೆ ಅಡುಗೆಗೆ ಬಳಸಬಹುದಾಗಿದೆ.



0 comments:

Post a Comment