ಖರ್ಜೂರದ ಸವಿತಿನಿಸು

" ದೀಪಾವಳಿಗೆ ಏನೂ ಸಿಹಿ ಮಾಡಿಲ್ವ? "
" ಮಾಡದೇ ಉಂಟೇ, ತಿಂದೂ ಮುಗೀತು. ನಾಳೆ ಮಗಳು ಬರ್ತಿದಾಳೆ.. "
" ಗಮ್ಮತ್ತು ಮಾಡಲೇ ಬೇಕಲ್ಲ.. "
" ಹೊಸ ರುಚಿ ಮಾಡಿ ಇಡುವುದು"
" ಖರ್ಜೂರ ತಂದಿದೆ, ಹಲ್ವವಾಗಿ ಪರಿವರ್ತನೆ ಹೊಂದಲಿದೆ. "
" ಸರಿ ಬಿಡಿ, ಮಾಡೋ ವಿಧಾನ ನಮಗೂ ಸ್ವಲ್ಪ ತಿಳಿಸ್ಕೊಡಿ. "

ಖರ್ಜೂರದ ಪ್ಯಾಕೆಟ್ ಕೈಗೆತ್ತಿಕೊಂಡಾಗ ಮೂಲೆಯಲ್ಲಿದ್ದ ಹಣ್ಣು ಹಣ್ಣಾದ ಬಾಳೆಗೊನೆ ಮಿಕಿಮಿಕಿ ನೋಡಿತು.
ಬಾಳೆಹಣ್ಣನ್ನು ಬಿಡುವುದುಂಟೇ, ನಮ್ಮ ತೋಟದ ಕದಳೀಫಲ ಅದು. ಚೆನ್ನಾಗಿ ಕಳಿತಿದೆ.

15 ಬಾಳೆಹಣ್ಣುಗಳ ಸಿಪ್ಪೆ ಬಿಡಿಸಿ, ಕೈಯಲ್ಲೇ ಹಿಸುಕಿ ಇಟ್ಟಾಯ್ತು.
ಕುಕ್ಕರ್ ತಳ ದಪ್ಪ ಇರೂದ್ರಿಂದ ಹಾಗೂ ಬೇಯಿಸುವ ಕೆಲಸ ಬೇಗನೇ ಆಗೂದ್ರಿಂದ ನನ್ನ ಆದ್ಯತೆ ಕುಕ್ಕರ್.
ಕುಕ್ಕರಿಗೆ 2ಚಮಚ ತುಪ್ಪ ಎರೆದು ಬಾಳೆಹಣ್ಣನ್ನು ಬೇಯಿಸಲು ಇಡುವುದು.
ಖರ್ಜೂರಗಳೆಲ್ಲ ಬೀಜ ಬಿಡಿಸಿಕೊಂಡವು.
ಬಾಳೆಹಣ್ಣು ಬೆಂದ ಪರಿಮಳ ಬಂದಿತು. ಖರ್ಜೂರಗಳನ್ನು ಹಾಕುವುದು. ಸೌಟಾಡಿಸಿ, ಕುಕ್ಕರ್ ಮುಚ್ಚಿ ವೆಯಿಟ್ ಹಾಕಿರಿ.
ಚಿಕ್ಕದಾಗಿ ವಿಸಿಲ್ ಕೇಳಿದೊಡನೆ ಗ್ಯಾಸ್ ಉರಿ ನಂದಿಸುವುದು.
ಒತ್ತಡ ಇಳಿದ ನಂತರ ಮುಚ್ಚಳ ತೆರೆಯಿರಿ. ಬಾಳೆಹಣ್ಣು ಹಾಗೂ ಖರ್ಜೂರ ಬೆರೆತಿವೆ.
1 ಅಚ್ಚು ಬೆಲ್ಲ ಪುಡಿ ಮಾಡಿ ಹಾಕಿ ಪುನಃ ಒಲೆಯ ಮೇಲಿಟ್ಟು ಸೌಟು ತಿರುಗಿಸುತ್ತ ಇದ್ದಂತೆ ಬೆಲ್ಲ ಕರಗಿತು.
ಈಗ 2 - 3 ಚಮಚ ರಾಗೀಮಾಲ್ಟ್ ಸೇರಿಸಿ ಕೆದಕಿ, ಇನ್ನೂ 2 ಚಮಚ ತುಪ್ಪ ಎರೆದು ಸೌಟಿನಲ್ಲಿ ಪಾಕ ಬರುವ ತನಕ ಹದನಾದ ಉರಿಯಲ್ಲಿ ಬೇಯಿಸಿ.
ಹುಡಿ ಮಾಡಿದ ಏಲಕ್ಕಿ,
ತುಪ್ಪದಲ್ಲಿ ಹುರಿದ ಗೇರುಬೀಜ, ದ್ರಾಕ್ಷಿ ಸಹಿತ ಹಾಕುವ ಸಮಯ,
ತುಪ್ಪ ಸವರಿದ ತಟ್ಟೆಗೆ ಹಾಕಿ, ಮೇಲಿನಿಂದ 1 ಚಮಚ ತುಪ್ಪ ಎರೆದು ಸಟ್ಟುಗದಲ್ಲಿ ತಟ್ಟಿ ಸಮಪ್ರಕಾರವಾಗಿ ಹರಡುವುದು. ಆರಿದ ನಂತರ ಚೂರಿ ಯಾ ಚಮಚದಲ್ಲಿ ಗೆರೆ ಎಳೆದು ತುಂಡು ಮಾಡಿ ಇಡುವುದು, ಇಲ್ಲವೇ ಅಂಗೈಯಲ್ಲಿ ಉಂಡೆ ಮಾಡಿ ಮೆಲ್ಲನೆ ಒತ್ತಿ ಬಟ್ಟಲಲ್ಲಿ ಇಟ್ಟರೂ ಆಕರ್ಷಕವಾಗಿರುತ್ತದೆ.

ಇದು ನಮ್ಮ ದೀಪಾವಳಿಯ ಸಿಹಿ ತಿನಿಸು.
ದೀಪಾವಳಿ ಬರುತ್ತೇಂತ ಮಾಡಿಟ್ಟಿದ್ದು ಮಗಳು ಬರುವ ಮೊದಲೇ ತಿಂದು ಮುಗಿಯಿತು. ಹಾಗೇ ಕಟ್ಟಿ ಇಡಲು ಆಗುತ್ಯೇ.. ಚೆನ್ನಾಗಿದೆ ಅನ್ನುತ್ತ ಗೌರತ್ತೇನೂ ತಿಂದ್ರು, ಪಟ್ಟಾಂಗ ಸ್ನೇಹಿತರಿಗೂ ವಿತರಣೆ ಆಯ್ತೂ ಅನ್ನಿ.
ಅಂತೂ ಎರಡು ಬಾರಿ ಖರ್ಜೂರದ ಸಿಹಿತಿನಿಸು ಮಾಡುವ ಹಾಗಾಯ್ತು.

ಈ ಹೊಸ ರುಚಿಗಳಿಗೆ ಹೆಸರಿಡುವುದೇ ಒಂದು ಸಮಸ್ಯೆ ಆಗ್ಬಿಟ್ಟಿದೆ. ಸಿಂಪಲ್ಲಾಗಿ ಡೇಟ್ಸ್ ಹಲ್ವಾ ಅಂದರೂ ನಡೆದೀತು, ಏನಂತೀರ?