ಬೆಣ್ಣೆ ರೊಟ್ಟಿ, ಬಾಳೆಯಲ್ಲಿ ತಟ್ಟಿ ....

ಅಕ್ಕಿ ರೊಟ್ಟಿಮಾಡುವ ವಿಧಾನ:

ಒಂದು ಕಪ್ ಅಕ್ಕಿಹುಡಿ.
ಒಂದೂವರೆ ಕಪ್ ಕುದಿಯುತ್ತಿರುವ ನೀರು, ಉಪ್ಪು ಬೆರೆಸಿರಬೇಕು.

ಅಕ್ಕಿ ಹುಡಿಗೆ ತುಸು ತುಸುವೇ ಕುದಿ ನೀರನ್ನು ಎರೆಯುತ್ತಾ ಮರದ ಸಟ್ಟುಗದಲ್ಲಿ ಕಲಸುತ್ತಾ ಬನ್ನಿ. ಕೊನೆಯ ಹಂತದಲ್ಲಿ ಕೈಯಲ್ಲೇ ಮುದ್ದೆ ಕಟ್ಟಿ ಇಡುವುದು.

ನಮ್ಮ ಹಳ್ಳೀ ಮಂದಿ ಬಾಳೆಲೆಯಲ್ಲಿ ರೊಟ್ಟಿ ತಟ್ಟುವ ವಾಡಿಕೆ. ಅಗಲ ಗಾತ್ರದ ಬಾಳೆಲೆಯ ಹಿಂಬದಿಗೆ ಎಣ್ಣೆ ಸವರಿ ಇನ್ನೊಂದು ಬಾಳೆಲೆಗೂ ಎಣ್ಣೆ ಸವರಿ ಇಡುವುದು. ಬಾಳೆ ಎಲೆಗಳ ನಡುವೆ ಅಕ್ಕಿ ಹಿಟ್ಟಿನ ಉಂಡೆಯಿಟ್ಟು ಭಾರವಾದ ಮಣೆಯಿಂದ ಒತ್ತುವುದು. ಬಾಳೆ ಎಲೆಗಳನ್ನು ಇಟ್ಟಾಗ ಒಂದು ಎಲೆ ಅಡ್ಡವಾಗಿ, ಇನ್ನೊಂದೆಲೆ ಉದ್ದನಾಗಿ ಇಟ್ಟಲ್ಲಿ ಮಾತ್ರ ವೃತ್ತಾಕಾರದ ರೊಟ್ಟಿ ಬರುವುದು.

ಪಾಲಿಥೀನ್ ಹಾಳೆಗಳಿಂದಲೂ ರೊಟ್ಟಿ ತಟ್ಟಿಕೊಳ್ಳಿ, ಇದೇ ಈಗ ಸುಲಭ ವಿಧಾನ.
ಪಾಲಿಥೀನ್ ಹಾಳೆಗಳಿಂದ ರೊಟ್ಟಿಯನ್ನು ನಾಜೂಕಾಗಿ ಬಿಡಿಸಿ ಬಿಸಿ ತವಾ ಮೇಲೆ ಹಾಕಬೇಕಾಗುತ್ತದೆ, ಬಾಳೆ ಎಲೆಯಲ್ಲಿ ಈ ಸಮಸ್ಯೆಯಿಲ್ಲ, ಎಲ್ಲ ಸಂದರ್ಭದಲ್ಲೂ ಬಾಳೆ ಎಲೆ ಸಿಗಬೇಕಲ್ಲ....

ರೊಟ್ಟಿ ಮಣೆಗಳೂ ಸಿಗುತ್ತವೆ.
ಎಣ್ಣೆ ಸವರಿದ ತವಾದ ಮೇಲೆ ಎರಡೂ ಬದಿ ಬೇಯಿಸಿ, ರೊಟ್ಟಿ ಮೃದುವಾಗಿ ಉಬ್ಬಿ ಬರುವುದು. ಬೆಣ್ಣೆಯೊಂದಿಗೆ ಸವಿಯಿರಿ. ಬೆಲ್ಲದ ಹುಡಿಯೂ ಸಾಕಾಗುವುದು.

ಬರೆಯುತ್ತಿದ್ದ ಹಾಗೇ ಏನೇನೋ ನೆನಪುಗಳು. ನಮ್ಮ ಚಿಕ್ಕಂದಿನಲ್ಲಿ ನಮ್ಮ ಅಮ್ಮಂದಿರಿಗೆ ನೆನೆದ ಕೂಡಲೇ ಅಕ್ಕಿಹುಡಿಯ ಪೂರೈಕೆ ಆಗ್ತಾ ಇರಲಿಲ್ಲ. ಅಂದಿನ ಕಾಲದ ಜೀನಸಿನಂಗಡಿಗಳಲ್ಲಿ ಅಡುಗೆಗೆ ಸಿದ್ಧಗೊಳಿಸಲ್ಪಟ್ಟ ಪ್ಲಾಸ್ಟಿಕ್ ಪೊಟ್ಟಣಗಳು ಇದ್ದರಲ್ಲವೇ? ಏನಿದ್ದರೂ ಮನೆಯಲ್ಲಿ ದಾಸ್ತಾನು ಇದ್ದಂತಹ ಕುಚ್ಚುಲಕ್ಕಿಯಿಂದಲೇ ಸೊಗಸಾದ ರೊಟ್ಟಿಗಳು ಸಿದ್ಧವಾಗುತ್ತಿತ್ತು.

" ಹೇಗೇ ಮಾಡ್ತಿದ್ರೂ " ಕೇಳದೇ ಇರ್ತೀರಾ.

ಮುಂಜಾನೆಯ ರೊಟ್ಟಿಗೆ ಮುನ್ನಾದಿನ ಸಂಜೆಯ ವೇಳೆಗೆ ಕುಚ್ಚುಲಕ್ಕಿಯನ್ನು ನೆನೆಯಲು ಇಟ್ಟಿರಬೇಕು. ನೀರಿನಲ್ಲಿ ಹಾಕಿದ ಕುಚ್ಚುಲಕ್ಕಿಯನ್ನು ಚೆನ್ನಾಗಿ ತೊಳೆದು, ಅಕ್ಕಿಯಲ್ಲಿ ಕಲ್ಲೂ ಇದ್ದೇ ಇರುತ್ತಿತ್ತು, ಅದನ್ನೂ ಅಕ್ಕಿ ತೊಳೆಯುವ ಹೊತ್ತಿಗೆ ಜಾಲಿಸಿ ತೆಗೆಯದಿದ್ದರೆ ರೊಟ್ಟಿಯಾದೀತೇ ? ಮುಂಜಾವ ಎದ್ದು ಅರೆಯುವ ಕಲ್ಲನ್ನು ಸ್ವಚ್ಛಗೊಳಿಸಿ, ಅಕ್ಕಿಯ ನೀರನ್ನು ಬಸಿದು ಅರೆಯುವ ಕಾಯಕ. ನೀರು ಹಾಕದೇ ನುಣ್ಣಗೆ ಮುದ್ದೆಯಂತೆ ಅರೆಯುವ ಹೊತ್ತಿಗೆ ತೆಂಗಿನ ತುರಿಯೂ ಹಾಕಿ ಅರೆಯದಿದ್ದರೆ ಆದೀತೇ, ತೆಂಗಿನಕಾಯಿ ಮನೆಯ ಅಟ್ಟದಲ್ಲಿ ಇರುವಾಗ ?

ಅಡಿಕೆ ತೋಟದಲ್ಲಿ ಬಾಳೆ ಎಲೆಗಳಿಗೆ ಕೊರತೆಯೇ, ಛೇ ಛೇ, ಇಲ್ಲವೇ ಇಲ್ಲ, ಅದನ್ನೂ ತಂದಿರಿಸಿಕೊಳ್ಳತಕ್ಕದ್ದು. ಬಾಳೆಲೆಗೆ ತೆಂಗಿನೆಣ್ಣೆ ಸವರಿ ಅಕ್ಕಿಹಿಟ್ಟಿನ ಉಂಡೆಯನ್ನು ಎರಡು ಎಲೆಗಳ ನಡುವೆ ಇಟ್ಟು ಹಪ್ಪಳದ ಮಣೆಯಲ್ಲಿ ಒತ್ತಿದರೆ ಸೈ.

ಕಟ್ಟಿಗೆಯ ಒಲೆ ಸಿದ್ಧವಾಗಬೇಕಿದೆ, ಒಲೆಯಲ್ಲಿ ನಿಗಿನಿಗಿಸುವ ಜ್ವಾಲೆ, ರೊಟ್ಟಿ ಕಾವಲಿ ಅಥವಾ ಹಂಚು ಚೆನ್ನಾಗಿ ಎಣ್ಣೆ ಸವರಿಟ್ಟಿರಬೇಕು, ಕಾದ ಕಾವಲಿಯ ಮೇಲೆ ಬಾಳೆ ಎಲೆಸಹಿತವಾಗಿ ರೊಟ್ಟಿ ಬಿದ್ದಿತೇ, ಬಿದ್ದ ರೊಟ್ಟಿಯ ಮೇಲಿನ ಎಲೆ ಬಾಡಿ ಹೋಯಿತೇ, ಎಲೆಯನ್ನು ಆಚೆ ಎಸೆದು ರೊಟ್ಟಿಯನ್ನು ಮಗುಚಿ ಹಾಕಿದರಾಯಿತು. ಬಿಸಿ ಕೆಂಡದ ಮೇಲೆ ಕಾವಲಿಯ ರೊಟ್ಟಿಯನ್ನು ಹೊರಳಿಸಿ ತೆಗೆದು ತಟ್ಟೆಗೇರಿಸುವುದು.

ಬರೆದು ಸಿದ್ಧಪಡಿಸಿ, ಚಿತ್ರಗಳನ್ನೂ ಹೊಂದಿಸಿ ಬ್ಲಾಗ್ ಸಂಪುಟದಲ್ಲಿ ಇಟ್ಕೊಂಡಿದ್ದೆ. ಬೆಳಗಾಗುತ್ತಿದ್ದ ಹಾಗೇ ನಮ್ಮತ್ತಿಗೆ ಸಂಸಾರದೊಂದಿಗೆ ಆಗಮಿಸಿದರು. " ಅದೇನೇನೋ ಬರೆಯುತ್ತೀಯಲ್ಲ, ಈಗ ಹೂಸತು ಏನು ಬರೆದಿದ್ದೀ..."

, " ಅಕ್ಕಿ ರೊಟ್ಟಿ, ಬಾಳೆಯಲ್ಲಿ ತಟ್ಟೀ ಅಂತ ಬರೆದಾಯ್ತು "

ಅತ್ತಿಗೆಯ ಪತಿರಾಯರು ಗೊಳ್ ಅಂತ ನಗೋದೇ.. " ನೀನು ಹಳ್ಳಿಮನೆಯಲ್ಲಿದ್ದುಕೊಂಡು ಬಾಳೆಯಲ್ಲಿ ತಟ್ಟು, ನಾವು ಪೇಟೇ ಮಂದಿ ಬಾಳೆಲೆ ಎಲ್ಲಿಂದ ತರ್ಬೇಕೂ? ಒಂದು ಊಟದ ಬಾಳೆಗೆ 12 ರೂಪಾಯಿ ಕೊಡ್ಬೇಕು ಗೊತ್ತಾ " ಅವರು ಹಳ್ಳಿ ಪೇಟೆ ಅಂತ ಎರಡೂ ಕಡೆ ಮನೆ ಇಟ್ಕೊಂಡಿದ್ದಾರೆ, ನಗದೇ ಇನ್ನೇನು ಮಾಡ್ತಾರೇ, ಇರಲಿ.

ನಾನೂ ಒಂದಾನೊಂದು ಕಾಲದಲ್ಲಿ ಕಾಸರಗೋಡು ನಗರದಲ್ಲೇ ಇದ್ದವಳಲ್ಲವೇ, ಆಗ ನನ್ನಮ್ಮ ಅಗತ್ಯ ಬಿದ್ದಾಗ ಪೇಟೆಯಿಂದ ಬಾಳೆಲೆ ತರಿಸುತ್ತಿದ್ದರು. ಒಮ್ಮೆ ಏನಾಯಿತು, ಮಾಮೂಲಿಯಾಗಿ ಅಂಗಡಿ ಸಾಮಗ್ರಿ ತಂದುಕೊಡುವ ಫಕೀರ ಬಂದಿರಲಿಲ್ಲ. ಬಾಳೆಲೆ ತರಲಿಕ್ಕೆ ನನ್ನ ತಂಗಿಯೇ ಅಂಗಡಿಗೆ ಹೋದಳು, ಆಗ ಪುಟ್ಟು ಹುಡುಗಿ ಅವಳು. ಅಮ್ಮ ತನ್ನ ತಿಜೋರಿಯಿಂದ 65 ಪೈಸೆ ಎಣಿಸಿಕೊಟ್ಟು, " ಒಂದು ಬಾಳೆಲೆಗೆ ಐದು ಪೈಸಾ ಇದ್ದೀತು, 13 ಬಾಳೆಲೆ ತಾ " ಅಂದರು. ತಂಗಿಯೂ ಅಮ್ಮನ ಹುಕುಂ ಪ್ರಕಾರ " ಅರುವತ್ತೈದು ಪೈಸೆಗೆ ಹದಿಮೂರು ಬಾಳೆಲೆ ಕೊಡು " ಅಂದು ಅಂಗಡಿಯಿಂದ ಕೊಂಡೂ ತಂದಳು. " ಛೇ, ಬಾಳೆಲೆಗೆ ಚೌಕಾಸೀ ಕೂಡಾ ಮಾಡಿಲ್ವಾ, ಮೂರು ಪೈಸೆಗಿಂತ ಜಾಸ್ತಿ ಇದ್ದಿರಲಿಕ್ಕಿಲ್ಲ, ಅಂಗ್ಡಿಯೋನು ಲಾಭ ಮಾಡ್ಬಿಟ್ಟ, ಇವಳನ್ನು ಕಳಿಸಿದ್ದೇ ತಪ್ಪಾಯ್ತು...."

Posted via DraftCraft app

ಅಲಂಕಾರಿಕ ಹೂಬಳ್ಳಿ, ಕರಿಕಣ್ಣಿಯಿವಳು...

ತೇವಾಂಶ ಹಾಗೂ ಹೊಯಿಗೆ ಮಿಶ್ರಿತ ಮಣ್ಣು ಈ ಬಳ್ಳಿ ಸಸ್ಯಕ್ಕೆ ಅವಶ್ಯಕ, ಆಗ್ಗಿದಾಂಗ್ಗೆ ಕತ್ತರಿಯಾಡಿಸುತ್ತಿದ್ದಲ್ಲಿ ಹೆಚ್ಚು ಕವಲುಗಳು
ಬಂದು ಹೂಗಳೂ ಧಾರಾಳವಾಗಿ ತುಂಬಿ ಬರುವುದು. ಆಫ್ರಿಕಾ ಮೂಲದ ಸಸ್ಯ, ಕಿತ್ತಳೆ ಬಣ್ಣದ ಹೂ ಎಸಳುಗಳು, ನಡುವೆ ಕಪ್ಪು ತಿಲಕದಂತಹ ವೃತ್ತದಿಂದ ಹೂ ಆಕರ್ಷಕ. ಎಲೆಗಳ ವಿನ್ಯಾಸವೂ ಸೂಗಸು. ಮಲಯಾಳಂನಲ್ಲಿ ಕರಿಕಣ್ಣಿ ಎಂದು ಹೆಸರು ಬಂದಿದ್ದರೆ ಕನ್ನಡಿಗರು ನಾಗನಕಣ್ಣು ಅಂದಿದ್ದಾರೆ. ವೈಜ್ಞಾನಿಕ ನಾಮಧೇಯ Thunbergia alata ಎಂದಾಗಿರುತ್ತದೆ. ಈ
ಹೂವಿನಲ್ಲೂ ಬಣ್ಣ ವೈವಿಧ್ಯಗಳಿವೆ. ಕಿತ್ತಳೆ ಬಣ್ಣ ಮಾತ್ರವಲ್ಲ ಬಿಳಿ, ಹಳದಿ ಹಾಗೂ ನಸುವರ್ಣಗಳಲ್ಲಿ ಈ ಹೂ ಲಭ್ಯ. ಈಗ
ಸಸ್ಯವಿಜ್ಞಾನವು ಎಂತಹ ಬಣ್ಣದ ಹೂವನ್ನು ಬೇಕಾದರೂ ಸೃಷ್ಟಿಸುತ್ತದೆ, ಇದೇನೂ ವಿಚಿತ್ರವಲ್ಲ ಬಿಡಿ. ಅದೂ ಅಲ್ಲದೆ ಹೂಗಳಲ್ಲಿ ಬಣ್ಣ ವೈವಿಧ್ಯ ತರಲು ಅಂದರೆ ಫೋಟೋ ಇಮೇಜ್ ಗಳಲ್ಲಿ ಹೊಸ ಕಲೆಯ ಸೃಷ್ಟಿ ಈಗ ಬಹು ಸುಲಭ, ಇಂತಹ ಹೊಸ
ಕಲಾಸೃಷ್ಟಿಯ ಬಗ್ಗೆ ಇನ್ನೊಮ್ಮೆ ಬರೆಯುತ್ತೇನೆ.

ಒಂದು ಕಾಲದಲ್ಲಿ ವಿಧವಿಧವಾದ ಹೂ ಗಿಡಗಳನ್ನು ತಂದು ನೆಡುವ ಹವ್ಯಾಸ, ಯಾವುದೇ ಮನೆಗೆ ಹೋಗಲಿ, ಹೂ ಗಿಡಗಳನ್ನುಅವಲೋಕಿಸದೇ ಹಿಂದಿರುಗಲಿಕ್ಕಿಲ್ಲ. ಒಂದು ಮಳೆಗಾಲದಲ್ಲಿ ನಮ್ಮ ಆಸುಪಾಸಿನ ಒಂದು ಮನೆಗೆ ಹೋಗಿದ್ದೆ, ಅಲ್ಲೇನೋ ಪೂಜಾ ಕಾರ್ಯಕ್ರಮ ಇದ್ದಿತು. ಮಳೆಗಾಲ ಅಲ್ವೇ, ಅಂಗಳ ತುಂಬ ಹಸಿಹಸಿರು, ಹಸಿರಿನೆಡೆಯಿಂದ ಇಣುಕುತ್ತಿದ್ದ ಈ ಹೂಗಳು...

ಏನು ಚೆಂದಾ ಅಂತೀರಾ, ಮನೆಯಾಕೆಯನ್ನು ವಿಚಾರಿಸಿದೊಡನೆ " ಅದು ಬಿಸ್ಕೇಟ್ ಹೂವು " ಅಂದಳು, ಅಂಗಳದಲ್ಲಿ ಹರಡಿದ್ದ
ಒಂದು ಬಳ್ಳಿಯನ್ನು ಕಿತ್ತು ಕೊಟ್ಟಳು. ಬೀಜದಿಂದಲೇ ಬೇಕಾದಷ್ಟು ಸಸ್ಯಾಂಕುರಗಳಾಗುತ್ತವೆ ಎಂದು ಆ ಕೂಡಲೇ ತಿಳಿಯಿತು.
ಯಾವ ಕಾಲದಲ್ಲೂ ಹೂಗಳಿಂದ ತುಂಬಿರುವ ಈ ಲತೆಯನ್ನು ಕುಂಡಗಳಲ್ಲೂ ನೆಟ್ಟುಕೊಳ್ಳಬಹುದು. ಸಿಕ್ಕಾಪಟ್ಟೆ ಹಬ್ಬಿ ಹರಡಿ ಇನ್ನಿತರ ಸಸ್ಯಗಳಿಗೆ ಮಾರಕವಾಗುವಂತಹುದಲ್ಲ. ಇನ್ನಿತರ ಪೊದರುಗಳೊಂದಿಗೆ ಹೊಂದಿಕೊಂಡು ಬದುಕುವಂತಹುದು, ಬೇರೆ ತೆರನಾದ ಹೂಬಳ್ಳಿಗಳ ಸಂಪರ್ಕವೂ ಆದೀತು, ತಾನೂ ಇರುತ್ತದೆ, ಹಸಿರೇ ಉಸಿರಾಗಿ ಕೈತೋಟದ ಸೊಗಸನ್ನು ಹೆಚ್ಚಿಸುತ್ತದೆ. ಒಂದು ತೆರನಾದ ಪರಿಸರಸ್ನೇಹೀ ಲತೆ ಇದು. ನಮ್ಮ ಮನೆಯ ಕೈದೋಟದಲ್ಲಿ ಶಂಖಪುಷ್ಪ, ನಕ್ಷತ್ರಬಳ್ಳಿ, ಮಲ್ಲಿಗೆಯ ಪೊದೆಯೊಂದಿಗೆ ಕರಿಕಣ್ಣಿಯೂ ಜೊತೆಯಾಗಿ ಬದುಕು ಸಾಗಿಸುತ್ತಲಿವೆ. ನಕ್ಷತ್ರಬಳ್ಳಿ ಬೇಸಿಗೆಯಲ್ಲಿ ಕಾಣಿಸದು. ಮಲ್ಲಿಗೆಯಲ್ಲಿ ಹೂವರಳಲು ಯಾವ ತೊಡಕೂ ಇರದು.

ಆಫ್ರಿಕಾ ಮೂಲದ ಸಸ್ಯವಾದುದರಿಂದ ಅಲ್ಲಿನ ಪಾರಂಪರಿಕ ಔಷಧಿಯಾಗಿಯೂ ಈ ಲತೆ ಬಳಕೆಯಲ್ಲಿದೆ. ಚರ್ಮ ವ್ಯಾಧಿಗಳು, ಚರ್ಮದ ಸೋಂಕು ರೋಗ, ಬೆನ್ನುಹುರಿಯ ನೋವು, ಗಂಟುಬೇನೆ, ಕಣ್ಣುರಿ, ಮೂಲವ್ಯಾಧಿ, ಗುದನಾಳದ ಯಾ ಕರುಳಿನ ಕ್ಯಾನ್ಸರ್ ಇವೇ ಮೊದಲಾದ ರೋಗ ನಿವಾರಕವಾಗಿ ಕರಿಕಣ್ಣಿ ಬಳ್ಳಿಯನ್ನು ಬಳಸುತ್ತಾರಂತೆ. ಈ ಬಳ್ಳಿಯ ಸಂಪರ್ಕದಿಂದ ಮೈ ಚರ್ಮದ ನವೆ ಯಾ ತುರಿಕೆ ಬಾಧಿಸುವ ಸಾಧ್ಯತೆ ಇದೆ, ಎಲ್ಲರಿಗೂ ಅಲ್ಲ. ಸರ್ವಋತುಗಳಲ್ಲೂ ಹಸಿರು ಹಸಿರಾಗಿರುವ ಕರಿಕಣ್ಣಿ ಆಫ್ರಿಕಾದಲ್ಲಿ ಜಾನುವಾರುಗಳ ಮೇವು ಕೂಡಾ ಹೌದು. ಆಫ್ರಿಕಾ ದೇಶದಲ್ಲಿ ಇದರ ಎಲೆಗಳು ಇನ್ನಿತರ ಸೊಪ್ಪುಗಳಂತೆ ಅಡುಗೆಯಲ್ಲೂ ಬಳಕೆಯಿದೆ. ನಮ್ಮೂರಿನಲ್ಲಿ ಯಾರಾದರೂ ಅಡುಗೆ ಪ್ರಯೋಗ ಮಾಡಿರುತ್ತಾರೇನೋ ಎಂಬ ಮಾಹಿತಿ ಇನ್ನಷ್ಟೇ ತಿಳಿಯಬೇಕಿದೆ!

Posted via DraftCraft app

ಬಟ್ಟಲಲ್ಲಿ ಬೀಂಬುಳಿ

ಊಟದಲ್ಲಿ ಸಾರು ಇರಲೇಬೇಕು, ಸಾರಿನಲ್ಲಿ ವೈವಿಧ್ಯತೆ ತರಲೇಬೇಕು, ಹೌದು ತಾನೇ. ಇಂದು ಸಾರಿನ ಗಮನ ಬೀಂಬುಳಿಯ ಕಡೆ ಸೆಳೆಯಲ್ಪಟ್ಟಿತು. ಮರದಲ್ಲಿ ಗೆಜ್ಜೆ ಕಟ್ಟಿದಂತೆ ಬೀಂಬುಳಿಗಳು ನಲಿದಾಡುತ್ತಿವೆ. ಒಂದ್ಹತ್ತು ಬೀಂಬುಳಿಗಳನ್ನು ಒಂದು ಬಟ್ಟಲಲ್ಲಿ ಕೊಯ್ದು ತಂದಾಯ್ತು, ಫೊಟೋ ಕೂಡಾ ಕ್ಲಿಕ್ಕಿಸಿ ಆಯಿತು.

ಸಾರು ಅಂದ್ರೆ ತೊಗರೀಬೇಳೆ ಬೇಯಲೇಬೇಕು, ಬೇಯಿಸಿದ್ದೂ ಆಯಿತು.
2 ಒಣಮೆಣಸು, 2 ಚಮಚ ಕೊತ್ತಂಬ್ರಿ, ಕಾಲು ಚಮಚ ಜೀರಿಗೆ, ಮೆಂತೆ, ಚಿಟಿಕೆ ಇಂಗು ಎಣ್ಣೆಪಸೆಯಲ್ಲಿ ಹುರಿಯಲ್ಪಟ್ಟುವು. ಹುರಿದು ತೆಗೆಯುವಷ್ಟರಲ್ಲಿ ಕರಿಬೇವಿನೆಲೆಯೂ ಕೂಡಿಕೊಂಡಿತು.

ತುಸು ಕಾಯಿತುರಿಯೊಂದಿಗೆ ಎಲ್ಲವನ್ನೂ ಅರೆಯಲಾಯಿತು. ಅರೆಯುವಾಗ ಒಂದು ಬೀಂಬುಳಿಯೂ ಸೇರಿಕೊಳ್ಳಲಾಗಿ ನೀರು ಹಾಕುವ ಪ್ರಮೇಯ ಉಳಿಯಿತು.

ಇನ್ನೂ ಮೂರು ಬೀಂಬುಳಿಗಳು ಕತ್ತರಿಸಲ್ಪಟ್ಟು ಕಾಯುತ್ತಾ ಇದ್ದ ಹಾಗೇ... ಹ್ಞಾ, ಹೇಳೋದೇ ಮರೆತಿದ್ದೆ, ಹೊಚ್ಚ ಹೊಸದಾದ ಇಂಡಕ್ಷನ್ ಸ್ಟವ್ ಅಡುಗೆಮನೆಗೆ ಬಂದಿದೆ, ಜೊತೆಗೆ ಮೂರು ನಾನ್ ಸ್ಟಿಕ್ ತಪಲೆಗಳೂ...

ಅದೇನೇ ಹೊಸ ವಸ್ತು ತಂದ ಕೂಡಲೇ ಉಪಯೋಗಿಸಿ ನೋಡದಿದ್ದರೆ ನಮ್ಮೆಜಮಾನ್ರ ಕೆಂಗಣ್ಣಿಗೆ ಗುರಿಯಾಗುವ ಕಿರಿಕಿರಿ ತಪ್ಪಿದ್ದಲ್ಲ. ನಾನ್ ಸ್ಟಿಕ್ ತಪಲೆಯಲ್ಲೇ ಒಗ್ಗರಣೆಗಿಟ್ಟು, ಒಗ್ಗರಣೆ ಸಿಡಿದಾಗ ಬೇಯಿಸಿಟ್ಟ ಬೇಳೆ, ಅರೆದಿಟ್ಟ ತೆಂಗಿನ ಮಸಾಲೆಯ ಅರಪ್ಪು, ನೀರು, ಉಪ್ಪು ಬೆಲ್ಲ ಇತ್ಯಾದಿ ಕೂಡಿಕೊಂಡು ಸಾರು ಕುದಿಯಿತು, ಫೋಟೋ ತೆಗೆದಿರಿಸುವಲ್ಲಿಗೆ ನನ್ನ ಕೆಲಸ ಮುಗಿಯಿತು.

" ಊಟಕ್ಕಾಯಿತೇಳಿ.." ಅನ್ನುತ್ತಿದ್ದ ಹಾಗೇ ನಮ್ಮೆಜಮಾನ್ರೂ ಒಳ ಬಂದು ಉಂಡು ಕೈ ತೊಳೆದು ಹೋದರು. ನಮ್ಮವರ ಊಟ ಮುಗಿಯುವ ತನಕ ಫೇಸ್ ಬುಕ್ ನೋಡುವ ಸಮಯ.

ನನ್ನ ಊಟ ಸಾವಕಾಶವಾಗಿ ಮುಂದುವರಿಯಿತು. ಸಾರಿನಲ್ಲಿ ಉಣ್ಣುತ್ತಿದ್ದಂತೆ ರುಚಿ ಎಂದಿನಂತೆ ಬರಲಿಲ್ಲವೇಕೆ ಎಂಬ ವಿಚಾರ ತಲೆಯಲ್ಲಿ ತಿಣುಕ ತೊಡಗಿತು. ಅಂತೂ ಊಟ ಮುಗಿಯಿತು, ಬಟ್ಟಲು ತೊಳೆದು ಒಳಗೆ ಯಥಾಸ್ಥಾನದಲ್ಲಿಡಲು ಬಂದಾಗ ಕಂಡಿದ್ದೇನು? ಕತ್ತರಿಸಿಟ್ಟ ಬೀಂಬುಳಿಗಳು ತಟ್ಟೆಯಲ್ಲಿ ಹಾಗೇ ಬಿದ್ದಿವೆ. ಅಚ್ಚುಕಟ್ಟಾಗಿ ಮಾಡಿದ್ದ ಸಾರಿನ ಎಡವಟ್ಟು ತಿಳಿಯಿತು.

ಅಡುಗೆಮನೆಯಿಂದ ಈಚೆ ಬಂದಾಗ ತೆಗೆದಿರಿಸಿದ್ದ ಎರಡು ಅದ್ಭುತ ಫೋಟೋಗಳು ಕೈ ಬೀಸಿ ಕರೆದುವು. ಬಟ್ಟಲಲ್ಲಿ ಬೀಂಬುಳಿ, ನಾನ್ ಸ್ಟಿಕ್ ತಪಲೆಯ ಸಾರು, ಎರಡೂ ಚಿತ್ರಗಳು ಸೊಗಸು, ಎಷ್ಟಾದರೂ iPhone 6 ಫೋಟೋಗ್ರಫಿ ಅಲ್ವೇ....

ಬೆಳಗಿನ ಹೊತ್ತು ಹೊಸದಾಗಿ ಒಂದು ಫೋಟೋಗ್ರಫಿ ಆಪ್ಸ್ ಅನ್ನು ಸ್ಥಾಪಿಸಿ ಇಟ್ಟಿದ್ದೆ. ಅದರ ಕಾರ್ಯಕ್ಷಮತೆ ಹೇಗಿದೆಯೆಂದು ಪರೀಕ್ಷಿಸಬೇಕಾಗಿತ್ತು. ಐಪಾಡ್ ಹಾಗೂ ಐಫೋನ್ ಗಳ ನಿರ್ವಹಣೆಯಲ್ಲಿ ವ್ಯತ್ಯಾಸವೇನೂ ಇಲ್ಲ. ಐಫೋನ್ ಪುಟ್ಟದು, ಹಾಗಾಗಿ ಸ್ಕ್ರೀನ್ ಕೂಡಾ ಸಣ್ಣದು. ಫೋಟೋ ಎಡಿಟಿಂಗ್ ಎಂಬಂತಹ ಕುಸುರಿ ಕೆಲಸ ಕಷ್ಟವಾದೀತೇನೋ ಎಂಬ ಸಂಶಯವೂ ಮೂಡಿತ್ತು. ಬೀಂಬುಳಿಗಳೂ ಸಾರಿನ ತಪಲೆಯೂ ಆಪ್ಸ್ ಒಳ ಹೋಗಿ ಹೊರ ಬರಲಾಗಿ " ವಾಹ್ ವಾಹ್... ಬಟ್ಟಲಲ್ಲಿ ಬೀಂಬುಳಿ, ಸಾರು ಆಯ್ತೇ ಹುಳಿ ಹುಳಿ..." ಹಾಡು ಹೊರಟಿತು. "ಆಹ! ಇದಪ್ಪ ಸಾರು ಅಂದ್ರೆ..."

ತಂತ್ರಜ್ಞಾನ ಮುಂದುವರಿದ ಹಾಗೆ ಫೋಟೋ ತಾಂತ್ರಿಕತೆಯೂ ಮುಂದುವರಿದಿದೆ. ಬಾಳೆಗಿಡದಲ್ಲಿ ಏಳೆಂಟು ಗೊನೆಗಳು ಮೂಡಿರುವಂಥಹ ಚಿತ್ರಗಳನ್ನು ಸೃಷ್ಟಿಸಿ ಆನಂದಿಸಬಹುದು, ಒಣಗಿದ ಗಿಡದಲ್ಲಿ ಹೂವನ್ನರಳಿಸಬಹುದು, ಕೆಂಪು ಗುಲಾಬಿ ಕಪ್ಪು ಬಣ್ಣದಲ್ಲೂ ಅರಳಬಹುದು. ಇದಕ್ಕಾಗಿ ನಾವು ತಂತ್ರವೇನೂ ಕಲಿಯಬೇಕಾಗಿಲ್ಲ, ಹೊಸ ತಾಂತ್ರಿಕ ಅವಿಷ್ಕಾರಗಳನ್ನು ಉಪಯೋಗಿಸಲು ತಿಳಿದಿದ್ದರೆ ಸಾಕು, ನಮ್ಮ ಅಭಿರುಚಿಗನುಸಾರ ಮುಂದಿನದನ್ನು ನಮ್ಮ ಕೈಯಲ್ಲಿರುವ ಕಂಪ್ಯೂಟರ್ ಸಾಧನವೇ ಹೇಳಿಕೊಡುತ್ತದೆ.

Posted via DraftCraft app