ಗೆಣಸಿನ ಪೋಡಿ

 

" ತರಕಾರಿ ತರುವಾಗ ಮರಗೆಣಸು ಇದ್ದರೆ ತನ್ನಿ.."  ಅಂದಿದ್ದಕ್ಕೆ ಸಿಹಿಗೆಣಸು ಬಂತು.

" ಅಂಗಡಿಯಲ್ಲಿ ಇದ್ದ ಗೆಣಸು ಬಂದಿದೆ. "

ತೊಂದರೆಯಿಲ್ಲ,  ಸಿಕ್ಕಿದ ಗೆಣಸಿನಲ್ಲಿ ಏನೇನು ಎಂಬ ಲಿಸ್ಟು ತಲೆಯಲ್ಲಿ ಓಡಿಯಾಡಿತು.

ಗೆಣಸಿನ ಪಾಯಸ,  ಪಲ್ಯ,  ಸಾಂಬಾರು, ಚಿಪ್ಸ್,  ಪೋಡಿ..

ಕೆಂಡದಲ್ಲಿ ಸುಟ್ಟು ತಿನ್ನಲು ರುಚಿಕರ..  ಕೆಂಡದ ಒಲೆ ಎಲ್ಲಿಗೆ ಹೋಯಿತೆಂದು ಹುಡುಕಬೇಕಾಗಿದೆ...

ಪಾಯಸ ಮಾಡಲಿಕ್ಕೆ ಹಬ್ಬ ಹರಿದಿನವೇ ಆಗಬೇಕಿಲ್ಲ. ತಿನ್ನಬೇಕಿದ್ದರೆ ಮಾಡುವುದು.  ಅದಕ್ಕೂ ಹಸಿ ತೆಂಗಿನಕಾಯಿ ಇರಬೇಕು.  ಪಾಯಸ ಮೂಲೆಗೆ ಒತ್ತರಿಸಲ್ಪಟ್ಟಿತು.

ಹಲವು ಬಗೆಯ ತರಕಾರಿಗಳೊಂದಿಗೆ ಬೆರಕೆಯಾಗಿಸಿ ಒಂದು ಸಾಂಬಾರು ಆಯ್ತು.  ಸಾಂಬಾರಿಗೆ ಹೆಚ್ಚುವಾಗ ಸಂಜೆ ಪೋಡಿ ಮಾಡಿದ್ರಾದೀತು ಎಂಬ ಚಿಂತನೆ ಮೂಡಿದ್ದೇ ತಡ,  ಉಳಿದ ಸಿಹಿಗೆಣಸು ಪೋಡಿಗಾಗಿ ಕತ್ತರಿಸಲ್ಪಟ್ಟಿತು.

ಅಂಗಡಿಯಿಂದ ತಂದ ಗೆಣಸನ್ನು ಮಣ್ಣು ಹೋಗುವಂತೆ ಚೆನ್ನಾಗಿ ತೊಳೆಯುವ ಅಗತ್ಯವಿದೆ.  ಬ್ರಷ್ ನಲ್ಲಿ ತಿಕ್ಕಿ ತೊಳೆಯಿರಿ.  ನಂತರ ವೃತ್ತಾಕಾರದಲ್ಲಿ ತೆಳ್ಳಗೆ ಕತ್ತರಿಸಿ ಇಡುವುದು.

ಇನ್ನು ಏನೇನು ಬೇಕು?

ಕರಿಯಲು ಎಣ್ಣೆ

ಕಡ್ಲೆ ಹಿಟ್ಟು ಹಾಗೂ ಅಕ್ಕಿ ಹಿಟ್ಟು,  ಇದಕ್ಕೆ ಅಳತೆಯೇನೂ ಬೇಕಿಲ್ಲ,  ಹೆಚ್ಚುಕಮ್ಮಿ ಆದರೂ ತೊಂದರೆಯಿಲ್ಲ.   ಕೇವಲ ಕಡ್ಲೆ ಹಿಟ್ಟು ಕೂಡಾ ಆದೀತು,  ಉಳಿದರೆ ತಂಪುಪೆಟ್ಟಿಗೆಯಲ್ಲಿಟ್ಟು ನಾಳೆಗೆ ಬಳಸಬಹುದು,  ದೋಸೆ ಹಿಟ್ಟಿಗೆ ಸೇರಿಸಬಹುದು.  ದಿಢೀರ್ ರಸಂ ಕೂಡಾ ಮಾಡಬಹುದು.

ರುಚಿಗೆ ಉಪ್ಪು

ಖಾರಕ್ಕೆ ತಕ್ಕಷ್ಟು ಮೆಣಸಿನ ಹುಡಿ

ತುಸು ನೀರಿನಲ್ಲಿ ಕರಗಿಸಿಟ್ಟ ಇಂಗು

ಅಕ್ಕಿ ಹಾಗೂ ಕಡ್ಲೆ ಹಿಟ್ಟುಗಳನ್ನು ತಪಲೆಗೆ ಹಾಕಿಟ್ಟು ಸೂಕ್ತ ಪ್ರಮಾಣದಲ್ಲಿ ನೀರೆರೆದು ಕಾಳುಕಟ್ಟದಂತೆ ಕಲಸುವುದು,  ಮೆಣಸಿನ ಹುಡಿ ಉಪ್ಪುಗಳನ್ನು ಕೂಡಿ ಇಂಗಿನ ನೀರನ್ನೂ ಎರೆಯುವುದು.   ಕಲಸಿದ ಹಿಟ್ಟು ಇಡ್ಲಿ ಹಿಟ್ಟಿನ ಸಾಂದ್ರತೆ ಹೊಂದಿರಬೇಕು.

ಇನ್ನೇಕೆ ತಡ,

ಬಾಣಲೆಯಲ್ಲಿ ಎಣ್ಣೆ ಬಿಸಿಯೇರಲಿ,

ಮಸಾಲಾ ಕಡ್ಲೆ ಹಿಟ್ಟಿಗೆ ಸಿಹಿಗೆಣಸಿನ ಹೋಳುಗಳನ್ನು ಮುಳುಗಿಸಿ,  ಹಿಟ್ಟು ಹೋಳುಗಳಿಗೆ ಆವರಿಸಲ್ಪಡಬೇಕು.

ಒಂದೊಂದಾಗಿ ಎಣ್ಣೆಗಿಳಿಸಿ,

ಎರಡೂ ಬದಿ ಬೇಯಲಿ,

ಹೊಂಬಣ್ಣ ಬಂದಾಗ ತೆಗೆಯಿರಿ,

ಎಣ್ಣೆ ಬಸಿಯಲು ಜಾಲರಿ ತಟ್ಟೆಯಲ್ಲಿ ಹಾಕಿರಿ,

ನಂತರ..

ಚಹಾ ಮಾಡಿ ಇಟ್ಕೊಳ್ಳಿ..

ಬಿಸಿ ಇರುವಾಗಲೇ ತಿನ್ನಿರಿ.

ಈ ಸಂಜೆಯ ಚಳಿಗೆ ಹಾಗೂ ಮಳೆಯ ಹವೆಗೆ  "ಅಹಹ..." ಅನ್ನಿರಿ.

ಗೆಣಸು ಸಿಹಿಯಾದ ಗೆಡ್ಡೆ ತರಕಾರಿ,  ಆಂಗ್ಲ ಭಾಷೆಯಲ್ಲಿ ಇದು ಸ್ವೀಟ್ ಪೊಟಾಟೋ ಎಂದೆನಿಸಿದೆ.  ಸಸ್ಯವಿಜ್ಞಾನಿಗಳ ಹೇಳಿಕೆಯಂತೆ convolvulaceae ಎಂಬ ಸಸ್ಯ ಪ್ರಭೇದ.   morning glory ಎಂಬ ಸಸ್ಯವರ್ಗಕ್ಕೆ ಸೇರಿದ ಸಿಹಿಗೆಣಸಿನ ಹೂವು ಕೂಡಾ ಅತ್ಯಾಕರ್ಷಕ.  ಬಹುತೇಕ ಆಂಗ್ಲಭಾಷೆಯಲ್ಲಿ ಇರುವಂತಹ ಲೇಖನಗಳು ಗೆಣಸು ಅಮೆರಿಕಾ ಮೂಲದ ಸಸ್ಯ ಎಂದಿವೆ.   ಶತ ಶತಮಾನಗಳಿಂದ ಗೆಡ್ಡೆಗೆಣಸುಗಳನ್ನು ಆಹಾರವಾಗಿ ಸೇವಿಸುತ್ತ ಬಂದಿರುವ ನಾವು ಈ ವಾದವನ್ನು ಒಪ್ಪಲಾರೆವು.  ರಾಮಾಯಣ ಕಾಲದ ವನವಾಸಿಗಳು ಸೇವಿಸುತ್ತಿದ್ದ ಗೆಡ್ಡೆಗೆಣಸು ಯಾವುದು ಎಂಬ ಪ್ರಶ್ನೆ ನಮ್ಮಲ್ಲಿ ಏಳದಿರದು.

ಗೆಣಸು ಬಳ್ಳಿಯಂತೆ ಹಬ್ಬುವ ಸಸ್ಯವರ್ಗ,  ಎಳೆಯ ಎಲೆಗಳನ್ನು ದಂಟು ಸಹಿತವಾಗಿ ಕೊಯ್ದು ಪಲ್ಯ,  ಸಾಂಬಾರು ವಗೈರೆಮಾಡಿಕೊಳ್ಳಬಹುದು.  ಉತ್ತಮ ಸೊಪ್ಪು ತರಕಾರಿ.   ಗೆಣಸಿನ ಬಳ್ಳಿ ಮಾರುಕಟ್ಟೆಯಲ್ಲಿ ಸಿಗುವ ಸಾಧ್ಯತೆ ಕಡಿಮೆ,  ಮನೆಯ ಹಿಂದೆ ಯಾ ಬಾಲ್ಕನಿ ಕೈದೋಟದಲ್ಲಿ ಸಸ್ಯವನ್ನು ಬೆಳೆಸಬಹುದು.   ಗೆಣಸನ್ನು ತೇವಾಂಶ ಇರುವಲ್ಲಿ ಮಣ್ಣಿನಲ್ಲಿ ಹಾಕಿಟ್ಟರೆ ಸಾಕು,  ಕುಡಿಯೊಡೆಯುತ್ತದೆ.  ಹೀಗೇ ಸುಮ್ಮನೆ ಮನೆ ಹಿತ್ತಲಿನಲ್ಲಿ ತೆವಳುತ್ತಿದ್ದ ಗೆಣಸಿನ ಕುಡಿಗಳಿಂದ ನಿನ್ನೆ ತಾನೇ ಒಂದು ತಂಬುಳಿ ಮಾಡಿದ್ದಾಗಿದೆ.

ತಂಬುಳಿ ಅತಿ ಸುಲಭದ ಅಡುಗೆ,  ಒಂದು ಹಿಡಿ ಕುಡಿಗಳನ್ನು ಚಿಕ್ಕದಾಗಿ ಕತ್ತರಿಸಿ ತುಸು ನೀರಿನಲ್ಲಿ ಬೇಯಿಸಿ, ತುಪ್ಪದಲ್ಲಿ ಬಾಡಿಸಿದರೂ ಆದೀತು.

ಕಾಯಿತುರಿ,  ಕಾಳುಮೆಣಸು, ಜೀರಿಗೆಯೊಂದಿಗೆ ನುಣ್ಣಗೆ ಅರೆದು,  ಸಿಹಿ ಮಜ್ಜಿಗೆ ಎರೆದು, ನೀರನ್ನೂ ಎರೆದು ತೆಳ್ಳಗೆ ಮಾಡಿ,  ಪುಟ್ಟದೊಂದು ಒಗ್ಗರಣೆ ಉದುರಿಸಿ.  ಕುದಿಸುವುದೇನೂ ಬೇಡ.  ಊಟದ ನಂತರ ಉಳಿದ ತಂಬುಳಿಯನ್ನು ಕುಡಿಯಿರಿ,  ಸೋಸಿ ಕುಡಿಯುವುದು ಉತ್ತಮ.

ಆಹಾರವಾಗಿ ಸೇವಿಸಲು ಉತ್ತಮ ಗೆಡ್ಡೆ ತರಕಾರಿ,  ವಿಟಮಿನ್ ಎ ಧಾರಾಳ ಲಭ್ಯ,  ಕಣ್ಣುಗಳಿಗೆ ಒಳ್ಳೆಯದು. ಕೊಬ್ಬಿನಂಶ ಅತಿ ಕಡಿಮೆ,  ದೇಹತೂಕ ಇಳಿಸುವಲ್ಲಿ ಸಹಕಾರಿ,  ಹಾಗೂ ನಾರುಯುಕ್ತ,  ಜೀರ್ಣಾಂಗಗಳ ಸಮರ್ಪಕ ಕಾರ್ಯನಿರ್ವಹಣೆ.   ಇನ್ನುಳಿದಂತೆ ಮಿತ ಪ್ರಮಾಣದಲ್ಲಿ ಖನಿಜಾಂಶ ಇರುವುದು.  ಗೆಣಸು ತಿನ್ನಿ,  ಆರೋಗ್ಯವೆನ್ನಿ.

ಬಟಾಟೆ ಸಾಂಗು

" ಅಮ್ಮ ಮಾಡ್ತಿದ್ದ ಬಟಾಟೆ ಸಾಂಗು ಮಾಡಬಹುದಲ್ಲ."  ಎಂದಳು ತಂಗಿ ಗಾಯತ್ರಿ ಕುಂಬ್ಳೆಯಿಂದ.

" ಹೌದಲ್ಲವೇ.. "

ಅಂತೂ ನನ್ನ ಬಟಾಟೆಗೊಂದು ಗತಿ ಸಿಕ್ಕಂತಾಯಿತು.

ಕಾಸರಗೋಡಿನಲ್ಲಿ ನಮ್ಮ ನೆರೆಕರೆಯ ಬಳಗವೆಲ್ಲ ಕೊಂಕಣಿಗರದು.  ಅವರು ಮಾಡುತ್ತಿದ್ದ ತಿಂಡಿತಿನಿಸು,  ಸಾಂಬಾರು ಪದಾರ್ಥಗಳೆಲ್ಲ ಅಮ್ಮನಿಗೂ ತಿಳಿದಿತ್ತು.  ವಿಶೇಷವಾದ ಕೆಸುವಿನ ಪತ್ರಡೆ,  ಉದ್ದಿನ ಹಪ್ಪಳ,  ಹಲಸಿನ ಹಣ್ಣಿನ ಹಲ್ವಾ, ಬೀಂಬುಳಿ ಉಪ್ಪಿನಕಾಯಿಗಳು ನಮ್ಮ ಅಡುಗೆಮನೆಗೂ ಬರುತ್ತಿದ್ದವು.   ಆ ಕಾಲದಲ್ಲಿ ಯಾವುದೇ ಇಂಟರ್ನೆಟ್ ಯಾ ಟೀವಿ ಮಾಧ್ಯಮಗಳ ಹಂಗಿಲ್ಲದೆ ಮಹಿಳೆಯರು ಪರಸ್ಪರ ತಿಳಿದು,  ಅರಿತು ನಮ್ಮ ಸಾಂಪ್ರದಾಯಿಕ ಅಡುಗೆಗಳನ್ನು  ಉಳಿಸಿ ಬೆಳೆಸಿಕೊಂಡು ಬಂದ ರೀತಿಯೇ ಅನನ್ಯ.

ಅಂತಹ ಸಾಂಪ್ರದಾಯಿಕ ವ್ಯಂಜನಗಳಲ್ಲಿ ಒಂದು ಬಟಾಟೆ ಸಾಂಗು.  ಉತ್ತರದಿಂದ ದಕ್ಷಿಣಕ್ಕೆ ಆಗಮಿಸುವ ತಿಂಡಿ ತಿನಿಸುಗಳು ನಮ್ಮ ಕರಾವಳಿಯ ಪ್ರಸಿದ್ಧ ತೆಂಗಿನಕಾಯಿಯೆಂಬ ಅಡುಗೆ ಮಸಾಲೆಯನ್ನೂ ಹದವರಿತು ಬೆರೆತುಕೊಂಡಿವೆ.  ತೆಂಗಿನಕಾಯಿ ಹಾಕದೇ ತಯಾರಿಸುವ ಬಟಾಟೆಯ ಈ ಪದಾರ್ಥವು  ' ವಾಗೂ ' ಎಂದಿನಿಸಿದೆ.   ಕಾಯಿತುರಿ ಹಾಕದೇ ಮಾಡುವಂತಹ ಪದಾರ್ಥಗಳಿಗೆ ನಮ್ಮ ಕಡೆ ಏನೂ ಬೆಲೆಯಿಲ್ಲ.   " ಊಟದ ಹೊತ್ತಿಗೆ ಏನೋ ಒಂದು ಲಾಯ್ಲೋಟು ಪದಾರ್ಥ ಮಾಡಿ ಇಟ್ಟಿದಾಳೆ. "  ಎಂಬ ಮಾತು ಕೇಳಬೇಕಾದೀತು.

ಇರಲಿ,  ನಾವು ಬಟಾಟೆ ಸಾಂಗು ತಯಾರಿಯತ್ತ ಹೊರಳೋಣ.

ನಾಲ್ಕು ಬಟಾಟೆಗಳು ಇರಬೇಕು.

ಸಿಪ್ಪೆ ಹೆರೆದು ತೆಗೆಯಿರಿ.  ಹಿಂದೆ ಅಮ್ಮನ ಅಡುಗೆಯ ಕಾಲದಲ್ಲಿ ಬಟ್ಟೆ ಒಗೆಯುವ ಕಲ್ಲಿನಲ್ಲಿ ತಿಕ್ಕಿ ಸಿಪ್ಪೆ ತೆಗೆಯತ್ತಿದ್ದದ್ದು ನೆನಪಾಯ್ತು.   ಯಂತ್ರಗಳ ಯುಗದಲ್ಲಿ ಬಟ್ಟೆ ತೊಳೆಯುವ ಹಾಸುಗಲ್ಲು ಎಲ್ಲಿಂದ ಬರಬೇಕು? 

 ಒಮ್ಮೆ ಏನಾಯ್ತೂ ಅಂದರೆ ಹಿರಣ್ಯದ ದೇಗುಲದಲ್ಲಿ ಸಂಕ್ರಾಂತಿಯ ಭೋಜನದ ಅಡುಗೆಯ ಹೊಣೆ ಹೊತ್ತಿದ್ದ ಗಣಪಣ್ಣನಿಗೆ ಬಟಾಟೆಸಾಂಗು ಮಾಡುವ ವಿಧಾನ ತಿಳಿಸಿಕೊಟ್ಟೆ.

ತೊಗರಿ ಬೇಳೆ ಹಾಕುವುದಕ್ಕಿಲ್ಲ.

ಮಸಾಲೆ ಹುರಿಯುವುದಕ್ಕಿಲ್ಲ.

ಸುಲಭದ ಅಡುಗೆಯೆಂದು ಗಣಪಣ್ಣ ದೊಡ್ಡದಾಗಿ ಸಾಂಗು ಮಾಡಿಟ್ಟ.

ಮಾಡಿದ್ದೇನೋ ಆಯ್ತು,  ಬಟಾಟೆಯ ಹೋಳುಗಳನ್ನು ಸಿಪ್ಪೆ ಸಹಿತ ಬೇಯಿಸಿಟ್ಟಿದ್ದು ಕಂಡು ನನ್ನ ವ್ಯಥೆ ಹೇಳ ತೀರದು.

" ಗಣಪಣ್ಣ, ಸಿಪ್ಪೆ ತೆಗೆಯಬೇಕಿತ್ತು.."

"  ಅಕ್ಕ,  ಸಿಪ್ಪೆ ಒಳ್ಳೆಯದು,  ಎಲ್ಲರೂ ತಿನ್ನಲಿ.."

ಬಟಾಟೆಯನ್ನು ಬೇಯಿಸಿ ಸಿಪ್ಪೆ ತೆಗೆಯುವ ವಿಧಾನ ಇದಕ್ಕೆ ಸರಿ ಹೋಗದು.  ಚೂರಿಯಿಂದ ಸಿಪ್ಪೆ ಹೆರೆದು ತೆಗೆಯಿರಿ.  ನಂತರ ಸಮಾನ ಗಾತ್ರದ ಹೋಳುಗಳನ್ನಾಗಿಸಿ.

ರುಚಿಗೆ ತಕ್ಕಷ್ಟು ಉಪ್ಪು ಬೆರೆಸಿ ನೀರನ್ನೂ ಎರೆದು ಬೇಯಿಸಿ.  ಕುಕ್ಕರಿನಲ್ಲಿ ಬೇಯಿಸಿದರೆ ಒಂದೇ ಸೀಟಿ ಸಾಕು. 

ಖಾರ ಪದಾರ್ಥವಾಗಿರುವ ಬಟಾಟೆ ಸಾಂಗೂ ಮಸಾಲೆ ಹೇಗೆ?

ಅರ್ಧ ತೆಂಗಿನಕಾಯಿ ತುರಿ

ಒಣಮೆಣಸಿನಕಾಯಿಗಳು,  ನಮ್ಮ ಖಾರದ ಅಂದಾಜಿಗೆ ತಕ್ಕಷ್ಟು.  ನಾನು ನಾಲ್ಕೇ ನಾಲ್ಕು ಮೆಣಸು ಹಾಕಿದ್ದು.

ಚಿಟಿಕೆ ಅರಸಿಣ

ಹುಣಸೆಯ ಹುಳಿ,  ಎಷ್ಟೂ?  

ಇದು ಕೂಡಾ ಮೆಣಸಿನ  ಪ್ರಮಾಣವನ್ನು ಅವಲಂಬಿಸಿದೆ.  ನೆಲ್ಲಿಕಾಯಿ ಗಾತ್ರದಿಂದ ಲಿಂಬೆಗಾತ್ರದ ತನಕ ಹೆಚ್ಚೂಕಮ್ಮಿ ಮಾಡಬಹುದು.

ಎಲ್ಲವನ್ನೂ ತೆಂಗಿನತುರಿಯೊಂದಿಗೆ ಅರೆಯಿರಿ.

ಬಾಣಲೆಯಲ್ಲಿ ಒಗ್ಗರಣೆಗಿಟ್ಟು,  ತೆಂಗಿನೆಣ್ಣೆಯನ್ನೇ ಬಳಸಿ.

ಸಾಸಿನೆ ಸಿಡಿದ ನಂತರ ಕರಿಬೇವು ಹಾಕಿರಿ.

ಒಂದು ನೀರುಳ್ಳಿ ಚಿಕ್ಕದಾಗಿ ಹೆಚ್ಚಿ ಹಾಕಿ,

ಬೆಳ್ಳುಳ್ಳಿಯೂ ಇದ್ದರಾದೀತು.

ಘಂ.. ಎಂದು ಸುವಾಸನೆ ಹೊಮ್ಮಿದಾಗ ಬೇಯಿಸಿದ ಬಟಾಟೆ ಹೋಳುಗಳೂ, ತೆಂಗಿನಕಾಯಿ ಅರಪ್ಪೂ ಬೀಳಲಿ.  ರಸಭರಿತವಾಗಲು ಸೂಕ್ತ ಪ್ರಮಾಣದಲ್ಲಿ ನೀರು ಎರೆಯತಕ್ಕದ್ದು.

ಕುದಿಯುವಾಗ ಇಂಗಿನ ನೀರು ಎರೆಯಿರಿ.  ಇಂಗು ತುಸು ಜಾಸ್ತಿ ಹಾಕಿರಿ. 

ರುಚಿಕಟ್ಚಾಗಿದೆಯೋ ಎಂದು ನೋಡಿಕೊಂಡು ಬೇಕಾದ ಅಳತೆಯಲ್ಲಿ ಉಪ್ಪು ಹಾಕಿ,  ಬೆಲ್ಲ ಸುತರಾಂ ಹಾಕತಕ್ಕದ್ದಲ್ಲ.

ಇದೀಗ ನಿತ್ಯಕಟ್ಟಳೆಯ ಅಡುಗೆಯ ಕ್ರಮದಲ್ಲಿ ಬಟಾಟೆ ಸಾಂಗು ಸಿದ್ಧವಾಗಿದೆ.  ಅನ್ನದೊಂದಿಗೆ ಮಾತ್ರವಲ್ಲ, ಚಪಾತಿ, ದೋಸೆ, ಇಡ್ಲಿಗೂ ಕೂಡಿ ತಿನ್ನಿರಿ.

ವಿಶೇಷವಾದ ಅಡುಗೆಯಲ್ಲಿ ನಾವು ನೀರುಳ್ಳಿ ಬೆಳ್ಳುಳ್ಳಿ ಬಳಸಲಿಕ್ಕಿಲ್ಲ.  ಅಂತಹ ಭೋಜನಕೂಟದ ಸಾಂಗು ಕೇವಲ ಕರಿಬೇವಿನ ಒಗ್ಗರಣೆಯೂ, ಇಂಗಿನ ನೀರು ಎರೆಯುವಲ್ಲಿಗೆ ಸಾರ್ಥಕವಾಯ್ತು ಅನ್ನಿ.  ಟೊಮ್ಯಾಟೋ ಹೋಳು ಮಾಡಿ ಹಾಕಬಹುದು,  ಅತಿಯಾಗಿ ಬೇಯಿಸಬಾರದು ಅಷ್ಟೇ.

ಈ ಚಳಿಯ ಹವೆಯಲ್ಲಿ ಬಟಾಟೆ ಸಾಂಗು ಹಿತವಾದ ವ್ಯಂಜನ.

ನೀರುಳ್ಳಿ ಬಜೆ

 

ದೊಡ್ಡ ಗಾತ್ರದ ನೀರುಳ್ಳಿಗಳು ಬಂದಿವೆ,  ಜಗ್ಗಣ್ಣನ ಜಿನಸಿನಂಗಡಿಯಿಂದ ಇನ್ನಿತರ ಸಾಮಗ್ರಿಗಳೊಂದಿಗೆ ಕಡ್ಲೆ ಹಿಟ್ಟೂ ಬಂದಿದೆ.  ನಿನ್ನೆ ತಾನೇ ಗೆಣಸಿನ ಚಿಪ್ಸ್ ಮಾಡಿದ ಬಾಣಲೆಯ ಎಣ್ಣೆ ಹಾಗೇ ಇದೆ.  ಇವತ್ತು ನೀರುಳ್ಳಿ ಬಜೆ ಮಾಡಿದರಾದೀತು.

" ಅತ್ತೇ, ನಮ್ಮ ಬೆಂಗಳೂರು ಕಡೆ ನೀರುಳ್ಳಿ ಬಜ್ಜಿ ಅನ್ನುವುದು. "  ತಿದ್ದಿದಳು ಮೈತ್ರಿ.

" ಹೇಗೋ ಒಂದು...   ಪಕೋಡಾ, ಬಜೆ ಎಲ್ಲ ಒಂದೇಯ.. "

ಒಂದು ದೊಡ್ಡ ಗಾತ್ರದ ನೀರುಳ್ಳಿ ಸಿಪ್ಪೆ ಬಿಡಿಸಿ ತೆಳ್ಳಗೆ ಕತ್ತರಿಸುವುದು.

ಕಡಲೆ ಗಾತ್ರದ ಇಂಗು ಒಂದು ಚಮಚ ನೀರಿನಲ್ಲಿ ಕರಗಿಸಿ.

ರುಚಿಗೆ ತಕ್ಕಷ್ಟು ಉಪ್ಪು.

ಖಾರದ ಹದಕ್ಕೆ ಅನುಸಾರ ಮೆಣಸಿನ ಹುಡಿ,  ಒಂದು ಚಮಚ ಸಾಕು.

ಡಬ್ಬದಿಂದ ಸಾಂಬಾರ್ ಹುಡಿ ಸೇರಿಕೊಂಡಿತು,  ಇದೂ ಒಂದು ಚಮಚ ಇರಲಿ.

ಕತ್ತರಿಸಿದ ನೀರುಳ್ಳಿಗೆ ಕೈಯಾಡಿಸಿ ಎಸಳೆಸಳು ಬಿಡಿಸಿ.

ಉಪ್ಪು ಇಂಗು ಇತ್ಯಾದಿ ಎಲ್ಲವನ್ನೂ ಬೆರೆಸಿ.

ಬಾಣಲೆಯಿಂದ ಒಂದು ಚಮಚ ಎಣ್ಣೆ ಹಾಕಿದರೆ ಉತ್ತಮ.

ಒಂದು ದೊಡ್ಡ ಸೌಟು ಕಡ್ಲೆ ಹಿಟ್ಟು ಹಾಕಿ ಚೆನ್ನಾಗಿ ಕಲಸಿ.

ಬೇಕಿದ್ದರೆ ಒಂದೆರಡು ಚಮಚ ನೀರು ಹಾಕಬಹುದು.

ಹತ್ತು ನಿಮಿಷ ಬಿಟ್ಟು ,

ಕಡ್ಲೆಹಿಟ್ಟು ಸಾಕಾಗಲಿಲ್ಲವೆಂದಾದರೆ ಇನ್ನಷ್ಟು ಸೇರಿಸಿ.

ಒಟ್ಟಿನಲ್ಲಿ ನೀರುಳ್ಳಿ ಎಸಳುಗಳು ಕಡ್ಲೆ ಹಿಟ್ಟಿನೊಂದಿಗೆ ಬೆರೆತಿರಬೇಕು.

ಕಾದ ಎಣ್ಣೆಗೆ ಅಂಗೈಯಲ್ಲಿ ಉಂಡೆಯಂತೆ ತೆಗೆದು ಹಾಕುತ್ತ ಬನ್ನಿ.

ಎರಡೂ ಬದಿ ಹೊಂಬಣ್ಣ ಬಂದಾಗ ತೆಗೆಯಿರಿ.

ಒಂದು ನೀರುಳ್ಳಿಯಿಂದ ಎಂಟು ಪಕೋಡಾ/ಬಜೆ/ಬಜ್ಜಿಗಳಾಗಿವೆ.

ಇದು ನಮ್ಮ ಈ ಸಂಜೆಯ ತಿನಿಸು.

ಚಹಾದೊಂದಿಗೆ ಸವಿದೆವು ಅನ್ನಿ.