ಹಣ್ಣುಗಳ ತಿನಿಸು

"ಅತ್ತೇ, ನಾಳೆ ಬಾಳೆಹಣ್ಣು ದೋಸೆ ಆಗದೇ.. " ಕೇಳಿದ್ದು ಮೈತ್ರ್ರಿ.

" ಅದಕ್ಕೇನಂತೆ, ಬಾಳೆಹಣ್ಣು ಉಂಟು, ತೆಂಗಿನಕಾಯಿ ಉಂಟು, ಮಾಡೋಣ. "

3 ಲೋಟ ಅಕ್ಕಿ ತೊಳೆದು, ನೀರೆರೆದು ಇಟ್ಟಾಯ್ತು. ಮೈತ್ರಿ ಹೇಳಿದಂತಹ ಈ ಮಾದರಿಯ ಬಾಳೆಹಣ್ಣು ದೋಸೆಗೆ ಉದ್ದು ಮೆಂತೆ ಇತ್ಯಾದಿ ಬೇಳೆಕಾಳುಗಳನ್ನು ಹಾಕುವುದಕ್ಕಿಲ್ಲ.

ಸಂಜೆಯಾಗುತ್ತಲೂ ಡೈರಿಯಿಂದ ಹಾಲು ತರುವುದಿದೆ, ಮೊದಲು ನಾವೇ ಡೈರಿಗೆ ಹಾಲು ಕೊಡುವವರಾಗಿದ್ದೆವು, ಈಗ ನಮ್ಮ ಅಗತ್ಯಕ್ಕನುಸಾರ ತರುವುದು, ಅಷ್ಟೇ ವ್ಯತ್ಯಾಸ. ಹಾಲು ತರುವಾಗ ತರಕಾರಿ ಸಂತೆಯಿಂದ ದೊಡ್ಡ ಬಚ್ಚಂಗಾಯಿ ತಂದ ಮಧು.

"ಇಷ್ಟು ದೊಡ್ಡದು ಯಾಕೆ ತಂದಿದ್ದು? ತಿಂದು ಮುಗಿಸುವುದಾದರೂ ಹೇಗೆ? "

" ನೋಡ್ತಾ ಇರು ನಾನು ಕಟ್ ಮಾಡೋ ಸ್ಟೈಲು.. "

" ನೀನೇ ಕಟ್ ಮಾಡ್ತೀಯಾ.. ಒಳ್ಳೇದಾಯ್ತು ಬಿಡು.. "
" ನಿನ್ನ ಮೆಟ್ಟುಕತ್ತಿ ಏನೂ ಬೇಡ... "
ಯೂ ಟ್ಯೂಬ್ ನೋಡಿ ಕಲಿತಿದ್ದೂಂತ ಕಾಣುತ್ತೆ, ಬಟ್ಟಲು ತುಂಬ ಹೋಳು ಮಾಡಿಟ್ಟ.

ಅತ್ತ ಇತ್ತ ಹೋಗುತ್ತ ಬರುತ್ತ ತಿಂದರೂ ಮುಗಿಯುವಾಸೆಯಿಲ್ಲ.

" ಫ್ರಿಜ್ ಒಳಗಿಟ್ಟು ನಾಳೆ ಜ್ಯೂಸ್ ಅಂತ ಕುಡಿದ್ರಾಯ್ತು.. " ಗೌರತ್ತೆಯ ಪರಿಹಾರೋಪಾಯ.

" ಹೌದು, ಕೆಮ್ಮುತ್ತ ಕೂತಿರಿ ಮತ್ತೆ..."

ಎಂಟು ಗಂಟೆಯಾಗುತ್ತಲೂ ಎಲ್ಲರ ಊಟೋಪಚಾರಗಳು ಮುಗಿದುವು, ಇದೀಗ ದೋಸೆಗಾಗಿ ಅರೆಯುವ ಕಾಲ.

ಎಂಟೂ ಹತ್ತು ಬಾಳೆಹಣ್ಣು ಸುಲಿದು ನುರಿದು ಇಟ್ಟಾಯ್ತು.
ಅರ್ಧ ಕಡಿ ತೆಂಗಿನ ತುರಿ,
ಅಕ್ಕಿಯ ನೀರು ಬಸಿಯಿರಿ,
ಇದೀಗ ಅರೆಯುವ ಸಮಯ.
ಥಟ್ ಎಂದು ಹೊಳೆದೇ ಬಿಟ್ಟಿತು!
ದೋಸೆ ಅರೆಯಲು ನೀರು ಬೇಡ, ಬಚ್ಚಂಗಾಯಿ ಹೋಳುಗಳನ್ನೇ ಹಾಕೋಣ.

ರಾತ್ರಿ ಕಳೆದು ಬೆಳಗಾಯಿತು.
ಎಂದಿನಂತೆ ಚಟ್ಣಿ, ಬೆಲ್ಲದ ಪಾಕ ( ರವೆ ), ದಪ್ಪ ಮೊಸರು, ಫಿಲ್ಟರ್ ಕಾಫಿಯೊಂದಿಗೆ ದೋಸೆ ತಿಂದೆವು.

ಯಾರಿಗೂ ದೋಸೆಯ ಹೊಸ ಅವತಾರದ ಬಗ್ಗೆ ನಾನು ಹೇಳಿಲ್ಲ.

" ಮೈತ್ರೀ, ದೋಸೆ ಹೇಗಾಯ್ತು? "
" ದೋಸೆಗೆ ಈ ಕಲರ್ ಹೇಗ್ಬಂತೂ? ... ವಾ.. ಗೊತ್ತಾಯ್ತು ಬಿಡಿ. " ಮೈತ್ರಿಯ ನಗೆಚಟಾಕಿ. " ಹೆಲ್ತೀ.. ನ್ಯೂಟ್ರೀಷಿಯಸ್ ಫುಡ್.. "
ಪೋಷಕಾಂಶಗಳಿಂದ ಕೂಡಿದ ಸರಳವಾದ ದೋಸೆ ಮೈತ್ರಿಯ ಮೆಚ್ಚುಗೆಗೆ ಪಾತ್ರವಾಯಿತು.

" ಅತ್ತೇ, ಈ ಥರ ದೋಸೆ ಮಾಡೋದನ್ನು ಬ್ಲಾಗ್ ನಲ್ಲಿ ಬರೆಯಿರಿ.. "

ಬಚ್ಚಂಗಾಯಿ ಇಡ್ಲಿ


ತಂಪು ಪೆಟ್ಟಿಗೆ ಸೇರಿದ್ದ ಬಚ್ಚಂಗಾಯಿ ಹೋಳುಗಳನ್ನು ಇದೇ ತಂತ್ರದಲ್ಲಿ ಇಡ್ಲಿಗಾಗಿ ಬಳಸಲಾಯಿತು.

ಒಂದು ಲೋಟ ಉದ್ದು
ಎರಡು ಲೋಟ ಅಕ್ಕಿ
ಅರೆಯಲು ಅಗತ್ಯವಿರುವ ಬಚ್ಚಂಗಾಯಿ ಹೋಳುಗಳು
ರುಚಿಗೆ ಉಪ್ಪು

ಅರೆಯಿರಿ, ಹುದುಗು ಬಂದ ನಂತರ ಇಡ್ಲಿ ಎರೆಯಿರಿ.
ನೀರು ಕುದಿದ ನಂತರ ಹತ್ತು ನಿಮಿಷದಲ್ಲಿ ಇಡ್ಲಿ ಆಯ್ತೂ ಅನ್ನಿ.

ತಿಮರೆ ಪಚ್ಚಡಿ

ತೋಟದ ಕಳೆಹುಲ್ಲು ತೆಗೆಯುತ್ತಿದೆ. " ಅಕ್ಕ, ಏತ್ ಎಡ್ಡೆ ತಿಮರೆ ಬಳತ್ತ್ಂಡ್, ಒಂಜಿ ಚಟ್ಣಿ ಮನ್ಪುಗೊ.. " ಎನ್ನುತ್ತ ಬೇರುಗಡ್ಡೆ ಸಹಿತವಾಗಿ ತಿಮರೆ ಸೊಪ್ಪಿನ ರಾಶಿಯೇ ಬಂದಿತು, ನಾನೂ ಇದ್ದೇನೆ ಎಂಬಂತೆ ಗಾಂಧಾರಿ ಮೆಣಸುಗಳೂ...

ಇದುವರೆಗೂ ನಾನು ಇಷ್ಟೂ ತಿಮರೆ ಸೊಪ್ಪಿನ ಚಟ್ಣಿ ಮಾಡಿದ್ದಿಲ್ಲ. ಹೇಗೂ ಬಂದಿದೆ, ಹಾಳು ಮಾಡುವುದೆಂತಕೆ ಎಂಬ ಸೂತ್ರದಲ್ಲಿ ಚಟ್ಣಿ ತಯಾರಾಯ್ತು.

ತಿಮರೆ ಸೊಪ್ಪು ಮುಂಜಾನೆ ತಿಂದರೆ ಒಳ್ಳೆಯದು ಎಂಬ ಗೌರತ್ತೆಯ ಹಿತವಚನದಂತೆ ಮುಂಜಾನೆಯ ದೋಸೆಗೆ ಚಟ್ಣಿ ಮಾಡಲಾಯ್ತು.

ದೋಸೆಯೊಳಗೆ ಹೂರಣದಂತೆ ಈ ಚಟ್ಣಿ ಸವರಿಟ್ಟು ತಿಂದೆವು. ಆರೋಗ್ಯಕ್ಕೂ ಮಿದುಳಿನ ಕಾರ್ಯಚಟುವಟಿಕೆಗಳಿಗೂ ಈ ಸೊಪ್ಪು ಓಳ್ಳೆಯದೆಂದು ತಿಳಿದು ಮೈತ್ರಿಗೂ ಖುಷಿ ಆಯ್ತೂ ಅನ್ನಿ. ಆಲೂ ಬಾಜಿ ದೋಸೆ ತಿನ್ನುವ ಬದಲು ಈ ಥರ ಪ್ರಾಕೃತಿಕ ವೈವಿಧ್ಯಗಳ ಬಳಕೆ ಬಹಳ ಉತ್ತಮ ಎಂಬ ಶಿಫಾರಸನ್ನು ಮೈತ್ರಿ ತಿಮರೆ ಚಟ್ಣಿಗೆ ಲಗತ್ತಿಸಿದಳು.

ಈಗ ತಿಮರೆ ಪಚ್ಚಡಿ ಹೇಗೆ ಮಾಡಿದ್ದೆಂದು ನೋಡೋಣ.

ಚಿತ್ರದಲ್ಲಿ ಇರುವಷ್ಟೂ ತಿಮರೆ ಸೊಪ್ಪು ಗೆಡ್ಡೆ ಸಹಿತವಾಗಿ ಚೂರಿಯಲ್ಲಿ ಕೊಚ್ಚುವುದು.
ಒಂದು ಹಿಡಿ ಕಾಯಿತುರಿ,
4 - 6 ಗಾಂಧಾರಿ ಮೆಣಸು,
ರುಚಿಗೆ ತಕ್ಕಷ್ಟು ಉಪ್ಪು,
ಹಿತವೆನಿಸುವಷ್ಟು ಹುಣಸೆಯ ಹುಳಿ,
ನೀರು ಬೇಕಾಗಿಲ್ಲ.
ಮಿಕ್ಸಿ ಪಚ್ಚಡಿ ಮಾಡಿ ಕೊಟ್ಟಿತು. ಹಸಿರಿನ ಮುದ್ದೆಯಂತಹ ಪಚ್ಚಡಿಯನ್ನು ಮುಂಜಾನೆಯ ದೋಸೆಯ ತರುವಾಯ ಮಧ್ಯಾಹ್ನದ ಊಟದಲ್ಲಿ ಬಳಸಲಾಯ್ತು. ಉಳಿದದ್ದನ್ನು ಎಸೆಯದೆ ನಾಳೆ ಮುಂಜಾನೆ ತಿನ್ನುವವರಿಗಾಗಿ ತಂಪು ಪೆಟ್ಟಿಗೆಯಲ್ಲಿ ಇಡಲಾಯಿತು.

Centella asiatica, ಬ್ರಾಹ್ಮೀ, ಸರಸ್ವತೀ, ಉರಗೆ, ಒಂದೆಲಗ... ಹತ್ಚುಹಲವು ಹೆಸರುಗಳಿಂದ ಶೋಭಿತವಾಗಿರುವ ಪುಟ್ಟ ಸಸ್ಯ ತುಳುವಿವಲ್ಲಿ ತಿಮರೆ ಎಂದು ಕರೆಯಲ್ಪಡುತ್ತದೆ.

ಇದನ್ನೇ ಹೋಲುವ ದೊಡ್ಡ ಎಲೆಗಳೂ ಹೊವುಗಳೂ ಇರುವಂತಹ ಇನ್ನೊಂದು ಸಸ್ಯವರ್ಗ ಇದೆ, ನಾನೂ ಎಲ್ಲಿಂದಲೋ ತಂದು ಸಾಕುತ್ತ ಇದ್ದೇ ಅನ್ನಿ. ಉರಗೆಯಲ್ಲಿ ದೊಡ್ಡ ಜಾತಿಯದು, ತಂಬ್ಳಿ ಚಟ್ಣಿಗೆ ಆಗುತ್ತೆ ಅಂತ ಕೊಟ್ಟವರು ಅಂದಿದ್ದರು.

" ಈ ಹೈಬ್ರೀಡು ಎಲೆಗಳಿಗೆ ನಮ್ಮ ತೋಟದ ಉರಗೆಯ ರುಚಿಯೂ ಇಲ್ಲ, ಪರಿಮಳದ ಸಂತಾನವಿಲ್ಲ.." ಎಂದು ಗೌರತ್ತೆ ತೀರ್ಮಾನ ಕೊಟ್ಟಾಗಿನಿಂದ ನಾನೂ ಅದರ ಸುದ್ದಿಗೆ ಹೋಗಿಲ್ಲ.

ಇತ್ತೀಚೆಗೆ ಅಂತರ್ಜಾಲದಲ್ಲಿ ಅಲೆದಾಡುತ್ತಿದ್ದಾಗ ಹೈಬ್ರಿಡ್ ಒಂದೆಲಗ ಸಿಕ್ಕಿತು, Dollarweeds, Hydrocotyle app, Pennywort ಎಂದಿರುವ ಇದು ವಿದೇಶೀ ಕಳೆ ಸಸ್ಯ. ಒಳ್ಳೆಯ ನೀರಿನಾಸರೆಯಲ್ಲಿ ತಾವರೆಯ ಎಲೆಯಂತೆ ಸೊಕ್ಕಿ ಬೆಳೆಯುವ ಈ ಸಸ್ಯವು ನಮ್ಮ ಒಂದೆಲಗದ ಔಷಧೀಯ ಗುಣಧರ್ಮಗಳನ್ನು ಒದಗಿಸಲಾರದು. ಆದರೂ ಇನ್ನಿತರ ಸೊಪ್ಪು ಸದೆಗಳಂತೆ ಅಡುಗೆಯಲ್ಲಿ ಬಳಸಬಹುದು.

ಬೀಟ್ರೂಟ್ ಸಾಸಮೆ

" ಅದ್ಯಾಕೆ ಬೀಟ್ರೂಟು ಹಾಗೇ ಇಟ್ಕೊಂಡಿದೀಯ? ತರೂದೇ ಸುಮ್ಮನೆ... " ಮನೆ ಯಜಮಾನರ ಗೊಣಗಾಟ.

" ಸಾಸಮೆ ಆದರೂ ಮಾಡಬಹುದಿತ್ತು.. " ಗೌರತ್ತೆಯ ತಿರುಗೇಟು.

ಗೌರತ್ತೆ ಸಾಸಮೆಯ ಜ್ಞಾಪಕ ಮಾಡಿದಾಗ,
" ಹೌದಲ್ವೇ.. " ಅನ್ನದೆ ಬೇರೆ ದಾರಿಯಿಲ್ಲ.
ಮೊನ್ನೆ ಬೀಟ್ರೂಟು ಪಚ್ಚಡಿ ಮಾಡಿದ್ದು ಯಾರಿಗೂ ನೆನಪಿಲ್ಲಾಂತ ಕಾಣ್ಸುತ್ತೆ, ಹೋಗ್ಲಿ ಬಿಡಿ, ಈವಾಗ ಹಾಳಾಗ್ತಾ ಇರೋ ಬೀಟ್ರೂಟು ಸಾಸಮೆ ಆಗಲಿದೆ.

ಇದಕ್ಕೆ ಮಾವಿನ ಹಣ್ಣಿನ ಸಾಸಮೆಯ ರುಚಿ ಬಾರದು, ಕೆಂಪು ಕೆಂಪಾಗಿ ಆಕರ್ಷಕ ಆಗಿರುತ್ತೆ.

ಈಗ ಬೀಟ್ರೂಟು ಸಿಪ್ಪೆ ಹೆರೆದು ತುರಿಯಿರಿ.
ಬಾಡಿ ಹೋದ ಬೀಟ್ರೂಟು ತುರಿಯಲು ಬರದಿದ್ದರೆ ಏನು ಮಾಡೋಣ?
ಹೋಳು ಮಾಡಿ ಮಿಕ್ಸಿಯಲ್ಲಿ ತಿರುಗಿಸೋಣ, ತುರಿ ಆಯ್ತು.

ಕುಕ್ಕರಿನಲ್ಲಿ ತುಂಬಿ,
ಅವಶ್ಯವಿರುವಷ್ಟೇ ನೀರೆರೆದು,
ಉಪ್ಪು ಬೆರೆಸಿ,
ಒಂದೆರಡು ಸೀಟಿ ಕೂಗಿಸಿ.

ಮಸಾಲೆ ಏನೇನು?
ಸಾಸಿವೆ ಇದರ ಮಸಾಲಾ ಸಾಮಗ್ರಿ ಆಗಿರುವುದರಿಂದ ಇದು ಸಾಸಮೆ ಆಗಿದೆ, ಕೊಂಕಣಿಯಲ್ಲಿ ಸಾಸಮ, ತುಳುವಿವಲ್ಲಿ ದಾಸೆಮಿ ಅಂದರಾಯಿತು.

ಅರ್ಧ ಕಡಿ ತೆಂಗಿನತುರಿ
ಅರ್ಧ ಚಮಚ ಸಾಸಿವೆ
ಒಂದು ಹಸಿಮೆಣಸು ಯಾ ಒಣಮೆಣಸು
ಮಜ್ಜಿಗೆ ಕೂಡಿ ಅರೆಯಿರಿ.
ಮಜ್ಜಿಗೆ 2ಲೋಟ ಇದ್ದರೆ ಉತ್ತಮ.
ಬೆಲ್ಲ ಹಾಕುವ ಅವಶ್ಯಕತೆಯಿಲ್ಲ, ಬೀಟ್ರೂಟು ಸಿಹಿ ಇರುವಂತದು.

ಅರೆದಾಯ್ತು, ಬೇಯಿಸಿಟ್ಟ ಬೀಟ್ರೂಟು ತುರಿಗೆ ತೆಂಗಿನಕಾಯಿ ಅರಪ್ಪು ಬೆರೆಸಿ, ಮಜ್ಜಿಗೆಯನ್ನೂ ಎರೆಯುವಲ್ಲಿಗೆ ಬೀಟ್ರೂಟು ಸಾಸಮೆ ಆಯ್ತೂ ಅನ್ನಿ.
ತೆಂಗಿನೆಣ್ಣಿಯಲ್ಲಿ ಕರಿಬೇವು ಕೂಡಿದ ಒಗ್ಗರಣೆ ಚಟಾಯಿಸುವಲ್ಲಿಗೆ ಅಲಂಕರಣವೂ ಆಯಿತು.

ಕುದಿಸುವುದಕ್ಕಿಲ್ಲ, ಮುದ್ದೆಯಂತಾಗಬಾರದು, ರಸಭರಿತವಾಗಲು ನೀರು ಎರೆದರಾಯಿತು.
ಮಂಜಾನೆಯೇ ಮಾಡಿ ಇಡಬಾರದು, ಊಟದ ಹೊತ್ತಿಗೆ ಹಳಸಲು ಪರಿಮಳ ಬಂದೀತು. ಇಂತಹ ಹಸಿ ಅಡುಗೆಯನ್ನು ಊಟಕ್ಕಾಯ್ತು ಅನ್ನುವ ಸಮಯಕ್ಕೆ ಮಾಡಿದರೆ ಉತ್ತಮ. ಉಂಡ ನಂತರ ಉಳಿದ ಸಾಸಮೆಯನ್ನು ತಂಪು ಪೆಟ್ಟಿಗೆಯಲ್ಲಿಟ್ಟು ರಾತ್ರಿಗೆ ಬಳಸಬಹುದು.

ಅತಿ ಕನಿಷ್ಠ ಸಮಯದಲ್ಲಿ, ಅತಿ ಕಡಿಮೆ ಮಸಾಲಾ ಸಾಮಗ್ರಿಗಳಿಂದ ತಯಾರಿಸಲಾಗುವ ಬೀಟ್ರೂಟು ಸಾಸಮೆ ಅಡುಗೆ ಕಲಿಯುವ ಆಸಕ್ತರಿಗೆ ಸುಲಭದ ಅಡುಗೆ.