ಮಲ್ಲಿಗೆಯ ಮಳೆ

ಬಂದದ್ದು
ಗುಡುಗು ಸಿಡಿಲಿನ
ಬಿರುಮಳೆ
ಮನೆಯಂಗಳದಿ
ಅರಳಿದ್ದು
ಹೂ ಮಳೆ

ಗುಡು ಗುಡು ಸದ್ದು ಕೇಳುತ್ತಿತ್ತು
ಸಿಟಿ ಸಿಟಿಲ್ ಮಿಂಚು ಹೊಳೆಯುತ್ತಿತ್ತು
ನಿನ್ನೆ ಸಂಜೆ,
ಸೆಕೆ ದೂರ ಹೋಗಿದೆ
ತಂಪೂ ತಂಪಾಗಿದೆ
ಹೌದಲ್ಲ,
ಎಲ್ಲೋ ದೂರದಲ್ಲಿ
ಮಳೆ ಬಂದ ಹಾಗಿದೆ
ಓ ಅಕ್ಕಾ,
ಇಲ್ಲಿ ಹೂವರಳಿದೆ

ನೆಲ ಕೋಮಳೆಯ
ಅಂತರಾಳ
ಕ್ಷಣಿಕ ಈ ಬದುಕು
ಹೂ ಬಳುಕು
ಫಳಫಳ ಬೆಳಕು

ಬಿಸಿಲ ಗಾವು
ಇದ್ದಕಿದ್ದ ಹಾಗೆ
ಗಾಳಿಯಲ್ಲಿ ಎದ್ದು
ಬಂದ ಸದ್ದು
ಧಪಧಪನೆ
ಹನಿ ಹನಿ
ಮಳೆ ಬಿದ್ದು
ಮಣ್ಣಿಗೂ ಪರಿಮಳ ಬಂದಿದ್ದು
ಜಾಲಿನ ಅಡಿಕೆ ಒದ್ದೆಯಾಗಿದ್ದು
ನೆಲದ ನೀರದಾಹ ಇಂಗದೇ
ಆಹ....
ದುಂಡುಮಲ್ಲಿಗೆ ಅರಳದೇ

ಟಿಪ್ಪಣಿ:  ಜೂನ್ 17,  ಶನಿವಾರ,  2017  ಕವನ ಮುಂದುವರಿದಿದೆ.

                               

                                  

ಬಂಡೆಕಲ್ಲುಗಳ ಸಂದಿಯಲ್ಲಿ

ತೂರಿ ಬಂದ ಮಲ್ಲಿಗೆಯ ಬಳ್ಳಿ

ಕಣ್ಣೆದುರಲ್ಲಿ ಹೂವರಳಿದರೂ

ಸುರಿದ ಮಳೆಯ ಅಬ್ಬರದಲ್ಲಿ

ಮಲ್ಲಿಗೆಯ ಕಂಪು ಹೋಯಿತೆಲ್ಲಿಗೆ?