ಮೊಸರಿನ ಇಡ್ಲಿ

 

ಸೊಸೆ ಬೆಂಗಳೂರಿನಿಂದ ಬರುವಾಗ  ರವಾ ಇಡ್ಲಿ ಮಿಕ್ಸ್ ತಂದಿದ್ದಳು.  " ಅತ್ತೇ,  ಮಾಡುವ ವಿಧಾನ ಪ್ಯಾಕೆಟಿನಲ್ಲಿ ಬರೆದಿದೆ.  ಅರ್ಜೆಂಟ್ ಬೇಕಾದಾಗ ಮಾಡಿ.."

" ಹೌದಲ್ಲವೇ.. " ಎಂದು ತೆಗೆದಿರಿಸಿದ್ದು  ಮೂರು ಬಾರಿ ಇಡ್ಲಿ ಮಾಡಿದ್ದಾಗಿದೆ.  ಮನೆಯಲ್ಲಿ ಮೊಸರು ಧಾರಾಳ ಇದ್ದರೆ ಮಾತ್ರಮಾಡಬಹುದಾದ ಇಡ್ಲಿ ಮಿಕ್ಸ್.  ಈಗ ಪ್ಯಾಕೆಟ್ ಮೊಸರೂ ಸಿಗುತ್ತೆ.

 ಬೆಂಗಳೂರಿಗೆ ತೆರಳಿದ ನಂತರ ಈ ಇಡ್ಲಿ ಮಾಡಲು ಅನುಮತಿ ನೀಡಿದ್ದ ಮಧು.

" ನಾವು ಯಾವಾಗಲೂ ಇದೇ ಇಡ್ಲಿ ತಿನ್ನೂದು,  ಮನೆಗೆ ಬಂದಿರುವಾಗ ನಮ್ಮ ಊರಿನ ಕ್ರಮದ ತಿಂಡಿ ಮಾಡು.."

ಬೆಂಗಳೂರಿನಿಂದ  ಮಧು ಹೀಗಂದ,  " ಅಮ್ಮ ನಾವು ಊರಿನಲ್ಲಿ ಇದ್ದಾಗ ನೀನು ಇಡ್ಲಿ ಮಾಡಿದ್ದೀಯಲ್ಲ, ಅದು ಹೇಗೆ ಮಾಡಿದ್ದೂಂತ ಬರೆದು ಕಳಿಸ್ತೀಯಾ? "

" ನನ್ನ ಬ್ಲಾಗ್ ನಲ್ಲಿ ಇದೆ,  ನೋಡಿಕೋ.."

"ನಂಗೆ ಫ್ರೆಶ್ ಆಗಿ ಬರೆದು ಕಳಿಸು..  ನಾವೆಲ್ಲ ಮನೆಯಲ್ಲಿದ್ದಾಗ ಮಾಡಿದ ಹಾಗೇ ಆಗ್ಬೇಕು,  ಆಯ್ತಾ.."

" ಆಯ್ತೂ.. "

2 ಲೋಟ ಮೀಡಿಯಂ ಸಜ್ಜಿಗೆ.  

ನಾನ್ ಸ್ಟಿಕ್ ತವಾಕ್ಕೆ ಹಾಕಿ 3ರಿಂದ 4 ನಿಮಿಷ ಹುರಿಯುವುದು.

ಇಂಡಕ್ಷನ್ ಸ್ಟವ್ ನನ್ನ ಆಯ್ಕೆ.

ಕರಟಬಾರದು,  ಉಷ್ಣತೆಯ ಹೊಂದಾಣಿಕೆಯಲ್ಲಿ ಹುರಿಯಿರಿ.

ತಣಿಯಲಿ.

1 ಲೋಟ ಉದ್ದು ತೊಳೆದು ಅರ್ಧ ಗಂಟೆ ನೀರೆರೆದು ಇಡುವುದು.

ಅರೆಯಿರಿ,  ಉದ್ದಿನ ಬೇಳೆಯನ್ನು ನೆನೆಸಿಟ್ಟ ನೀರನ್ಮೇ ಹಾಕಿ ಅರೆಯಿರಿ.

ಹುರಿದಿಟ್ಟ ಸಜ್ಜಿಗೆಯನ್ನು ತಪಲೆಗೆ ಹಾಕಿ ಅರ್ಧ ಲೋಟ  ನೀರು ಎರೆದು ಸೌಟಿಲ್ಲಿ ತಿರುಗಿಸಿ ಇಡುವುದು.

ಉದ್ದು ನುಣ್ಣಗಾದ ಮೇಲೆ ಸಜ್ಜಿಗೆಯ ಜೊತೆ  ಬೆರೆಸಿರಿ.

ರುಚಿಗೆ ಉಪ್ಪು ಹಾಕಿರಿ.

ಮಾರನೇ ದಿನ ಮುಂಜಾನೆ ಇಡ್ಲಿ ತಯಾರಿಸಿ.

ಬೇಯಲು ಸಮಯ ನೀರು ಕುದಿದ ನಂತರ ಹತ್ತರಿಂದ ಹನ್ನೆರಡು ನಿಮಿಷಗಳು.

ತೆಂಗಿನಕಾಯಿ ಚಟ್ಣಿಯೊಂದಿಗೆ ತಿನ್ನುವುದು.