ಚಿಕ್ಕು ರಸಾಯನ

ಗಣಪತಿಹವನ, ಶಿವಪೂಜೆ ಇಟ್ಕೊಂಡಿದ್ದ ಪಕ್ಕದ ಮನೆಯ ಊಟಕ್ಕೆ ಹಾಜರಾಗಲೇಬೇಕು. ಪೂಜಾಕೈಂಕರ್ಯದಲ್ಲಿ ಪಾಲ್ಗೊಳ್ಳಲೇ ಬೇಕು, ತೀರ್ಥಪ್ರಸಾದಗಳನ್ನು ಸ್ವೀಕರಿಸಿ, ಸಿಂಗಾರದ ಕುಡಿಯನ್ನು ಮುಡಿಗೇರಿಸಿ, ಭೋಜನದ ಅಟ್ಟಣೆಯಾಗುತ್ತ ಇದ್ದಂತೆ, ಬಡಿಸುವ ಸುಧರಿಕೆಗೆ ಮನೆಯ ತರುಣರು ಬೈರಾಸು ಸೊಂಟಕ್ಕೆ ಕಟ್ಟಿ ಸಿದ್ಧರಾಗುತ್ತಿರಬೇಕಾದರೆ, " ಬಾಳೆ ಎಲೆಯೊಂದು ಖಾಲಿ ಇದೆ, ನೀನು ಕೂತ್ಕೋ ಬಾರೇ... " ಗೌರತ್ತೆಯ ನಿರ್ದೇಶನ.

ಊಟಕ್ಕೆ ಕೂತಿದ್ದಾಯ್ತು. ಬಾಳೆ ಎಲೆಯ ಬಲ ತುದಿಗೆ ಹಲಸಿನ ಹಣ್ಣಿನ ಪಾಯಸ ಬಿದ್ದಿತು, ಈಗ ಹಲಸಿನ ಹಣ್ಣಿನ ಕಾಲ ಅಲ್ವೇ..

ಎರಡು ವಿಧ ಪಲ್ಯಗಳು, ಒಂದು ಪಲ್ಯ ಹಲಸಿನ ಗುಜ್ಜೆಯದು. ಉಳಿದಂತೆ ಸಾರು, ಹಪ್ಪಳ, ಕೊದಿಲ್, ಅವಿಲ್... ಎಲ್ಲ ಮಾಮೂಲಿಯಾಗಿ ಬಡಿಸಲ್ಪಟ್ಟುವು.

ನಂತರ ರಸಾಯನ ಬಂದಿತು, " ಬಾಳೆಹಣ್ಣೇ.. "
" ಅಲ್ಲಪ, ಚಿಕ್ಕೂ ರಸಾಯನ... " ಗೌರತ್ತೆ ಉಸುರಿದರು. ಪ್ರಿಜ್ಜಲ್ಲಿ ಇಟ್ಟಿದ್ದಕ್ಕೆ ತಂಪು ತಂಪಾಗಿ ಸವಿಯಲು ಹಿತವಾಗಿ ಚಿಕ್ಕು ರಸಾಯನ ಬೇಸಿಗೆಯ ಧಗೆಯನ್ನೂ ಹೋಗಲಾಡಿಸಿ ಬಿಟ್ಟಿತು.

ಚಿಕ್ಕು ರಸಾಯನ ಮಾಡಿದ್ದು ಹೇಗೆ?
ಬೀಜ ಸಿಪ್ಪೆ ತೆಗೆದ್ಬಿಟ್ಟು, ಹಿತವಾಗುವಷ್ಟು ಸಕ್ಕರೆ ಹಾಕಿರಿಸಿ, ತೆಂಗಿನಕಾಯಯಿ ಹಾಲು ಎರೆಯುವಲ್ಲಿಗೆ ಚಿಕ್ಕೂ ರಸಾಯನ ಸಿದ್ಧ.

ಮನೆ ಹಿತ್ತಲಲ್ಲೇ ಚಿಕ್ಕು ಹಣ್ಣಿನ ಮರಗಳಿರುವಾಗ ಹಣ್ಣುಗಳಲ್ಲಿ ಲೆಕ್ಕಾಚಾರವೇನೂ ಇಲ್ಲ. ಜಾಸ್ತಿ ಹಾಕಿದಷ್ಟೂ ಸಕ್ಕರೆಯ ಪ್ರಮಾಣ ಕಮ್ಮಿ ಮಾಡಬಹುದಾಗಿದೆ.
ಹಣ್ಣು ಮೃದುವಾಗಿರುವುದರಿಂದ ಮಿಕ್ಸಿಯಲ್ಲಿ ರುಬ್ಬುವ ಅಗತ್ಯವೂ ಇಲ್ಲ. ಕೈಯಲ್ಲೇ ತುಸು ಗಿವುಚಿದರೂ ಸಾಕು.

ತೆಂಗಿನ ಹಾಲು ಮಾಡಿಕೊಳ್ಳಲು ಉದಾಸೀನವೇ, ಪ್ಯಾಕೆಟ್ ನಂದಿನಿ ಹಾಲು ಎರೆದು, ಮಿಲ್ಕ್ ಶೇಕ್ ಎಂಬ ಹೆಸರಿಟ್ಟು ಕುಡಿಯಿರಿ.

ಚಿಕ್ಕು ಐಸ್ ಕ್ರೀಂ, ಚಿಕ್ಕು ಹಲ್ವಾ ಇನ್ನೊಮ್ಮೆ ಮಾಡೋಣ.

ಸಪೋಟಾ. ಸಪೋಡಿಲ್ಲಾ ಪ್ಲಮ್, ಚಿಕ್ಕು, ಎನ್ನಲಾಗುವ ಈ ವೃಕ್ಷ ಸಪೋಟೇಸೀ ಸಸ್ಯವರ್ಗಕ್ಕೆ ಸೇರಿದ್ದು. ಬಾರತದೆಲ್ಲೆಡೆ ಹಬ್ಬಿ ಬೆಳೆಯಲಾಗುವ ಚಿಕ್ಕು ವಿದೇಶೀಯರ ಕೊಡುಗೆ. ದಕ್ಷಿಣ ಅಮೇರಿಕಾ ಇದರ ಮೂಲ ನೆಲೆ.

ಬೇಸಿಗೆಯ ಉರಿಯನ್ನು ತಡೆಯುವ ಶಕ್ತಿ ಈ ಹಣ್ಣಿನದು, ಖನಿಜಗಳು ಹೇರಳ, ವೃದ್ಧರಿಗೂ, ಬಸುರಿ ಬಾಣಂತಿಯರಿಗೂ ಆದರ್ಶಪ್ರಾಯ, ಎದೆಹಾಲುಣ್ಣಿಸುವ ತಾಯಂದಿರಲ್ಲಿ ಹಾಲು ಹೆಚ್ಚಳ.
ಸಿಹಿ ರುಚಿ ಹಾಗೂ ಆಹ್ಲಾದಕರ ಪರಿಮಳದ ಚಿಕ್ಕು ಹಣ್ಣನ್ನು ಬಾಯಿಗೆಸೆದೊಡನೆ ಉಲ್ಲಾಸದ ಆಗಮನ, ಖಿನ್ನತೆಯ ನಿರ್ಗಮನ.
ಮೂತ್ರ ವಿಸರ್ಜಿಲು ಕಷ್ಟವೇ, ಚಿಕ್ಕು ತಿನ್ನಿ.
ಚರ್ಮದ ಕಾಂತಿಗಾಗಿ ಬ್ಯೂಟಿ ಪಾರ್ಲರ್ ಗೆ ಹೋಗದಿರಿ, ಚಿಕ್ಕು ಹಣ್ಣು ತಿನ್ನಿ.
ಚಿಕ್ಕು ಎಲೆಗಳ ಕಷಾಯ, ಬಾಯಿಹುಣ್ಣು ಮಾಯ.
ಚಿಕ್ಕು ಗುಣವಿಶೇಷಗಳನ್ನು ಬರೆದಷ್ಟೂ ಮುಗಿಯದು, ತಿಳುವಳಿಕೆಗೆ ಬಂದಷ್ಟನ್ನು ಬರೆದಿದ್ದೇನೆ.

ವರ್ಷಕ್ಕೆರಡು ಬಾರಿ ಚಿಕ್ಕು ಹಣ್ಣು ಕೊಯ್ಯಬಹುದಾಗಿದೆ, ಕೃಷಿಭೂಮಿಯಲ್ಲಿ ಒಳ್ಳೆಯ ಆದಾಯ ತರುವ ಬೆಳೆ ಚಿಕ್ಕು.

ಮೈತ್ರಿಯ ಮಿಠಾಯಿ

ಬೆಂಗಳೂರಿನಿಂದ ಮಕ್ಕಳ ಸೈನ್ಯ ಬಂದಿತು. ಮನೆಯಲ್ಲಿ ಜರಗಲಿರುವ ಶುಭಕಾರ್ಯಗಳ ಪೂರ್ವಭಾವಿ ಸಿದ್ಧತೆಗಾಗಿ ಮಗ, ಸೊಸೆ, ಮಗಳ ಆಗಮನ. ಬಂದ ನಿಮಿತ್ತವಾಗಿ ಮಂಗಳೂರಿನಲ್ಲಿ ಶಾಪಿಂಗ್, ಸಿನೆಮಾ, ಐಸ್ ಕ್ರೀಂ ತಿಂದಿದ್ದೂ ಆಯ್ತು.

" ನಾಳೆ ಸಂಜೆಯ ಬಸ್ಸಿನಲ್ಲಿ ಪುನಃ ಬೆಂಗಳೂರಿಗೆ... " ಅಂದಳು ಮಗಳು.
" ಎಷ್ಟು ಬೇಗ ದಿನ ಹೋಯ್ತಲ್ಲ! " ನನ್ನದು ಅಚ್ಚರಿ.
" ಏನಾದ್ರೂ ಸ್ವೀಟ್ ಮಾಡೋಣಾ.. " ಮೈತ್ರಿ ರಾಗ ಎಳೆದಳು.
" ಬೇಗನೆ ಆಗುವಂತಹದು ಯಾವುದೂ, ಪಾಯಸ ಆದೀತೇ.. "
" ಪಾಯಸ ಬೇಡ, ಕ್ಷೀರ ಆದೀತು.."
" ಅದಕ್ಕೆ ತುಪ್ಪ ಸುರಿಯಬೇಕು, ನಿನ್ನ ಮದುವೆಗೆ ತುಪ್ಪದ ಸ್ಟಾಕ್ ಮಾಡಿ ಇಡೋಣಾ ಅಂತಿದ್ರೆ... "
"ಬರ್ಫಿ, ಮೈಸೂರುಪಾಕು? "
" ಮೈಸೂರ್ ಪಾಕ್ ತುಪ್ಪದ ತಿಂಡಿ.. ಅದೂ ಬೇಡ, ಬರ್ಫಿ ತೆಂಗಿನಕಾಯೀದು ಚೆನ್ನಾಗಿರುತ್ತೆ, ಹಸಿ ತೆಂಗಿನಕಾಯಿ ಇದೆ, ಇದಕ್ಕೆ ತುಪ್ಪ ಬೇಡ್ವೇ ಬೇಡ.. "
"ಹ್ಞ.. ಅದಾದೀತು, ನಂಗೆ ತುಂಬಾ ಇಷ್ಟ ಕೊಬ್ಬರಿ ಮಿಠಾಯಿ... " ಅಂದಳು ಬೆಂಗಳೂರ ಬೆಡಗಿ.

ಮೈತ್ರಿಯ ಅಪೇಕ್ಷೆಯಂತೆ ಕೊಬ್ಬರಿ ಮಿಠಾಯಿ ಮಾಡೋಣ. ನಮ್ಮೂರ ಭಾಷೆಯಲ್ಲಿ ಇದು ತೆಂಗಿನಕಾಯಿ ಬರ್ಫಿ, ತಿಳಿಯಿತಲ್ಲ.
 ಒಂದು ಹಸಿ ತೆಂಗಿನಕಾಯಿ ತುರಿದಾಗ ಒಂದೂವರೆ ಲೋಟ ಕಾಯಿತುರಿ ದೊರೆಯಿತು.
ಕಾಯಿತುರಿಯಲ್ಲಿ ದೊಡ್ಡ ಹೋಳುಗಳಿರಬಾರದು, ಮಿಕ್ಸಿಯಲ್ಲಿ ನೀರು ಸೋಕಿಸದೆ ರುಬ್ಬಿಕೊಳ್ಳೋಣ, ಪುಡಿ ಆದರೆ ಸಾಕು.
ಸಕ್ಕರೆಯೂ ಒಂದೂವರೆ ಲೋಟ ಅಳೆಯಿರಿ.
ಅರ್ಧ ಲೋಟ ಹಾಲು.
ಪುಡಿ ಮಾಡಿದ ಏಲಕ್ಕಿ, ಸುವಾಸನೆಗೆ ತಕ್ಕಷ್ಟು.
ಕಾಯಿತುರಿ ಪುಡಿ ಮಾಡುವಾಗಲೇ ಏಲಕ್ಕಿ ಹಾಕಿಕೊಳ್ಳುವುದು ಜಾಣತನ.

ದಪ್ಪ ತಳದ ನಾನ್ ಸ್ಟಿಕ್ ಬಾಣಲೆಗೆ ಸಕ್ಕರೆ ಸುರಿದು, ಹಾಲನ್ನು ಎರೆದು ಸಕ್ಕರೆ ಕರಗಿಸಿ, ಜೊತೆಗೆ ತೆಂಗಿನತುರಿಯನ್ನೂ ಹಾಕಿ, ಮರದ ಸಟ್ಟುಗದಲ್ಲಿ ಕೈಯಾಡಿಸುತ್ತಾ ಇರಬೇಕು.

ತೆಂಗಿನ ತುರಿ, ಹಾಲು, ಸಕ್ಕರೆ ಬೆರೆತು, ಒಂದೇ ಘನಪಾಕವಾಗುವ ಹಂತದಲ್ಲಿ , ತಳ ಬಿಟ್ಟು ಬಂದಾಗ ಕೆಳಗಿಳಿಸಿ, ಇನ್ನೊಂದು ನಾನ್ ಸ್ಟಿಕ್ ತಟ್ಟೆಗೆ ವರ್ಗಾಯಿಸಿ.
ತುಸು ಬಿಸಿ ಆರಲಿ.

ಚೂರಿಯಲ್ಲಿ ಗೆರೆ ಎಳೆಯುತ್ತಿರಬೇಕಾದರೆ ಮೈತ್ರಿ ಒಳ ಬಂದಳು.
" ಆಯಿತೇ ಬರ್ಫೀ.. " ಬಾಯಿಗೆ ಹಾಕ್ಕೊಂಡಿದ್ದೂ ಆಯ್ತು, " ಇದನ್ನು ಫ್ರಿಜ್ ಒಳಗಿಟ್ರೆ ಬೇಗ ಬಿಸಿ ಆರಿ ಗಟ್ಟಿಯಾಗುತ್ತೆ.. "
" ಸರಿ, ಹಾಗೇ ಮಾಡು.. "
ಜಾಡಿಯಲ್ಲಿ ತುಂಬಿದ ಕೊಬ್ಬರಿ ಮಿಠಾಯಿ ಫ್ರಿಜ್ ಒಳಗೆ ಹೋಯ್ತು.

ಇನ್ನೇನು ಅರ್ಧ ಗಂಟೆಯಲ್ಲಿ ಬೆಂಗಳೂರಿಗೆ ಹೊರಡುವ ತುರಾತುರಿ ಮಕ್ಕಳದು.
ಸ್ನಾನ ಆಗಬೇಕು, ಅಲ್ಲಿ ಇಲ್ಲಿ ಎಸೆದ ಬಟ್ಟೆಬರೆಗಳನ್ನು ಜೋಡಿಸಿ, ಬ್ಯಾಗಿನೊಳಗಿಡಬೇಕು. ಬೆಂಳೂರು ಬಸ್ಸು ಹತ್ತಲು ಸಂಜೆ ಏಳಕ್ಕೇ ನಮ್ಮ ಹಳ್ಳಿಮನೆಯಿಂದ ಹೊರಟರೆ ರಾತ್ರಿ ಒಂಭತ್ತು ಗಂಟೆಗೆ ಮಂಗಳೂರು ಬಸ್ಸು ಹತ್ತಬಹುದು.

" ಊಟಕ್ಕೇನು ಮಾಡ್ತೀರಾ? "
" ಹೋಟಲ್ ಉಂಟಲ್ಲ.. "

 "ಟಾಟಾ, ಬೈಬೈ ಜೋಪಾನಾ.. "ಅಂದ್ಬಿಟ್ಟು,
ಸ್ವಲ್ಪ ಹೊತ್ತು ಫೇಸ್ ಬುಕ್ ನೋಡ್ಬಿಟ್ಟು,
ಅಡುಗೆಮನೆಗೆ ಹೋಗಿ ರಾತ್ರಿಯೂಟಕ್ಕಾಗಿ ಅನ್ನ ಬಿಸಿ ಮಾಡಿಟ್ಟು,
ಕೊಬ್ಬರಿ ಮಿಠಾಯಿ ಮಾಡಿದಂತಹ ಬಾಣಲೆ, ತಟ್ಟೆಗಳನ್ನು ಸಿಂಕಿನಲ್ಲಿ ಹಾಕಿಟ್ಟು,
ಊಟದ ಟೇಬಲ್ ಮೇಲೆ ಬಟ್ಟಲು ನೀರು ಇಟ್ಟು,
ಫ್ರಿಜ್ ಒಳಗಿಂದ ಮೊಸರು ಹೊರ ತೆಗೆಯಲು,
ಕಾಣಬೇಕೇ ಕೊಬ್ಬರಿ ಮಿಠಾಯಿ!

ಗೌರತ್ತೆಯ ಉಪವಾಸ

“ ಇವತ್ತು ಶಿವರಾತ್ರಿ ಅಲ್ವಾ, ಭಜನಾಮಂದಿರದಲ್ಲಿ ರಾತ್ರಿ ಬೆಳಗಾಗೂ ತನಕ ಭಜನೆ ಉಂಟಂತೆ, ನಾನು ಹಾಗೇ ವಾಕಿಂಗ್ ಹೋಗ್ಬಿಟ್ಟು ಭಜನೆ ಕೇಳ್ಬಿಟ್ಟು ಬರ್ತೇನೆ. " ಎಂದರು ಗೌರತ್ತೆ.

" ಸರಿ, ಆರಾಮವಾಗಿ ಹೋಗಿ.. " ಜಪಸರ ಆಡಿಸುತ್ತ ಸಹಸ್ರನಾಮಾವಳಿ ಲೆಕ್ಕ ಮಾಡುತ್ತ ಇರುವ ಗೌರತ್ತೆ ಹೊರಟಿದ್ದು ನನಗೂ ಸಂತಸ.

ದೂರವೇನಿಲ್ಲ, ಭಜನೆ ಮನೆವರೆಗೂ ಕೇಳಿಸುತ್ತಿದೆ, ಆದ್ರೂ ಅಲ್ಲಿ ಕುಳಿತು ಹತ್ತೂ ಮಂದಿಯೊಂದಿಗೆ ಪಟ್ಟಾಂಗ ಹೊಡೆದು ಆಸರಿಗೆ ಕುಡಿದು ಬರುವ ಖುಷಿಯೇ ಬೇರೆ, ನಾನೂ ಹೊರಟೆ.

ಅಲಂಕೃತ ಗಣೇಶ, ಬೆಳಗುತ್ತಿರುವ ದೀಪ, ಹೂವು ಹಣ್ಣುಕಾಯಿ, ಊದುಬತ್ತಿ ಕರ್ಪೂರಗಳ ಸುಗಂಧ. ಭಜನೆಯೆಂದರೆ ಹಾರ್ಮೋನಿಯಂ, ಖಂಜಿರ, ತಬಲಾ ಮೃದಂಗ ವಾದ್ಯಗಳೂ, ತಾಳ ತಂಬೂರಿಗಳೂ, ಮೈಕ್ ಸೆಟ್ಚೂ, ಕೊರತೆಯಿಲ್ಲದಷ್ಟು ಗಾಯಕರೂ ತುಂಬಿದ ಸಭೆ.

ಚಕ್ಕಮಕ್ಕ ಕುಳಿತುಕೊಳ್ಳಲು ಸಾಧ್ಯವಾಗದವರಿಗೆ ಪ್ಲಾಸ್ಟಿಕ್ ಕುರ್ಚಿಗಳೂ ಸಾಲಾಗಿ ಇತ್ತೂ ಅನ್ನಿ, ನಾವು ಭಕ್ತಿಭಾವದಿಂದ ಚಾಪೆಯಲ್ಲಿ ಆಸೀನರಾದೆವು. ಬಂದವರಿಗೆ ಫಲಾಹಾರದ ವ್ಯವಸ್ಥೆಯೂ ಇದೆಯೆಂದು ತಿಳಿಯಿತು.

ಭಜನೆಹಾಡುಗಳ ನಾದಕ್ಕೆ ದನಿಗೂಡಿಸುತ್ತ ಈ ಗಾಯನ ಸಾಹಿತ್ಯಗಳ ರಚಯಿತರು ಯಾರಾಗಿಬಹುದೆಂಬ ಗಾಢ ಚಿಂತನೆಯೂ ಕೂಡಿ ಸಮಯ ಕಳೆದಿದ್ದು ತಿಳಿಯದಂತಿರಲು, " ಅಲ್ಲಿ ಬಾಳೆ ಎಲೆ ಹಾಕ್ತಿದಾರೆ, ಗೌರತ್ತೆ ಎದ್ದು ಆ ಕಡೆ ಹೋದರು. ನಾನು ಹಿಂಬಾಲಕಿ, ಬಾಳೆ ಎಲೆ ಮುಂದೆ ಕುಳಿತುಕೊಳ್ಳುವ ಯೋಗ.

ಮೊದಲಾಗಿ ಇಡ್ಲಿ, ಫಳಾರ ಅಲ್ವೇ, ರವಾ ಇಡ್ಲಿ, ಚಟ್ನಿ... ತೊಂದ್ರೆ ಇಲ್ಲ, ತಿನ್ನೋಣ.

ವಡಾ ಬಂದಿತು, ಅದೂ ಉದ್ದಿನ ವಡೇ.. " ವಾಹ್! ಬೇಕಾದಷ್ಟಾಯ್ತು. " ಕೂರ್ಮಾ, ತರಕಾರಿಗಳ ಕೂಟು ಬಾಳೆ ತುಂಬಿತು. ಇನ್ನೇನು ಚೆನ್ನಾಗಿ ಹೊಡೆಯೋದೇ ಬಾಕಿ.

" ಇಡ್ಲಿ ಬೇಕೇ, ವಡೆ ಬೇಕೇ.. " ಎನ್ನುತ್ತ ಸುಧರಿಕೆ ಮಾಡುವವರಿರುವಾಗ, " ಸಾಕೋ ಇನ್ನೂ ಬೇಕೋ.. " ಕೇಳುವವರಿರುವಾಗ ನಾವು ಇನ್ನಷ್ಟು ಬಾಳೆಗೆ ಹಾಕಿಸ್ಕೊಂಡು ತಿಂದೆವು.

ಹೆಸ್ರು ಪಾಯಸ ಬಂದಿತು, " ಶಿವರಾತ್ರಿ ಪ್ರಯುಕ್ತ ಪಾಯಸ ತಿನ್ನಬೇಡವೇ.. "
ಪಾಯಸದೊಂದಿಗೆ ಬಾಳೆಹಣ್ಣು ರಸಾಯನ ಸೇರಿಕೊಂಡಿತು.
ಸಿಹಿಭಕ್ಷ್ಯವೆಂದು ಜಿಲೇಬಿಯೂ ಉದರದೊಳಗಿಳಿಯಿತು.

ಮೊಸರು, ಉಪ್ಪಿನಕಾಯಿ ಇಲ್ಲದೆ ಆದೀತೇ, ರಸಬಾಳೆಹಣ್ಣು ತಿನ್ನುವಲ್ಲಿಗೆ ಫಲಾಹಾರದ ಸಾರ್ಥಕ್ಯ.

ಬಾದಾಮಿ ಹಾಲು ಕುಡಿದು ಏಳುವಲ್ಲಿಗೆ ಶಿವರಾತ್ರಿಯ ಫಳಾರ ಸಂಪನ್ನಗೊಂಡಿತು.

ಕೋಕನಟ್ ಹಲ್ವಾ

“ ತೆಂಗಿನಕಾಯೀ ಹಲ್ವ ಆಗುತ್ತ? ಲಡ್ಡೂ ಬರ್ಫೀ ಗೊತ್ತು, ಕಾಯಿ ಹೋಳಿಗೆ ತಿಂದೂ ಗೊತ್ತು… “
“ ಇದು ಅಡುಗೆಮನೆಯಲ್ಲಿ ಕುಟುಕುಟು ಮಾಡ್ತಿರಬೇಕಾದ್ರೆ ಅಗಿ ಹೋಯ್ತು, ನಂಗೇ ಗೊತ್ತಿರಲಿಲ್ಲ ಕಣ್ರೀ, ಈ ಸವಿರುಚಿಗೆ ಏನೋ ಒಂದು ನಾಮಕರಣ ಆಗಬೇಕಲ್ಲ. “

ಮುಂಜಾನೆ ಚಪಾತಿ, ಅದಕ್ಕೊಂದು ಕೂಟು ಆಗಬೇಕು. ಬಾಳೆಹಣ್ಣು ಕಾಯಿಸಿದ್ದು ಇದ್ದರೆ ನಾನು ಕೂಟು ಕರಿ್ರಗಳ ಉಸಾಬರಿಗೇ ಹೋಗಲಿಕ್ಕಿಲ್ಲ, ತುಪ್ಪ, ಬಾಳೆಹಣ್ಣು ಸಕ್ಕರೆಗಳ ಮಿಶ್ರಣದ ಕೂಟು ನಮಗಿಬ್ಬರಿಗೂ ಇಷ್ಟ. ಇವತ್ತು ಬಾಳೆಹಣ್ಣು ಕಾಯಿಸಿಟ್ಟಿದ್ದು ಇರಲಿಲ್ಲ, ಬಾಳೆ ಹಣ್ನು ಇದೆ, ದಿಢೀರ್ ಎಂದು ಸಿದ್ಧಪಡಿಸಬೇಕಾಗಿದೆ.

ನಾಲ್ಕು ಬಾಳೆಹಣ್ಣುಗಳನ್ನು ಚಿಕ್ಕದಾಗಿ ಕತ್ತರಿಸಿ,
ಒಂದು ಹಿಡಿ ಕಾಯಿತುರಿ ಸಿದ್ದಪಡಿಸಿ,
ಒಂದು ಸೌಟು ಸಕ್ಕರೆ ತೆಗೆದಿರಿಸಿ,
ಎರಡು ಚಮಚ ತುಪ್ಪ ಬಾಣಲೆಗೆರೆದು,
ಬಾಳೆಹಣ್ಣುಗಳನ್ನು ತುಪ್ಪದಲ್ಲಿ ಹುರಿದು,
ಕಾಯಿತುರಿಯನ್ನೂ ಜೊತೆಗೆ ಹುರಿದು
ಸಕ್ಕರೆಯೂ ಈ ಘನಪಾಕಕ್ಕೆ ಬಿದ್ದು,
ಸಟ್ಟುಗದಲ್ಲಿ ರಪರಪನೆ ಬಾರಿಸಿದಾಗ,
ಬಾಳೆಹಣ್ಣಿನ ಕೂಟು ಸಿದ್ಧವಾಯಿತು
ಎಳ್ಳು ಹುರಿದು, ಗುದ್ದಿ ಹಾಕಿದಾಗ
ಪರಿಮಳವೂ ಬಂದಿತು.

ಚಪಾತಿಯೊಂದಿಗೆ ಈ ಹೊಸ ತಿನಿಸನ್ನು ಸವಿಯುತ್ತಿದ್ದಾಗ ಬಾಳೆಗೊನೆಯಲ್ಲಿ ಇನ್ನೂ ಇರುವ ಹಣ್ಣುಗಳಿಗೊಂದು ಗತಿಗಾಣಿಸಲು ನಿರ್ಧರಿಸಿದ್ದಾಯಿತು.

ನಮ್ಮ ಅಳತೆ ಪಟ್ಟಿ ಹೀಗಿರಲಿ.
2 ಲೋಟ ಹೆಚ್ಚಿಟ್ಟ ಬಾಳೆಹಣ್ಣು
ಒಂದು ಲೋಟ ಕಾಯಿತುರಿ, ಮಿಕ್ಸಿಯಲ್ಲಿ ನೀರು ಹಾಕದೆ ಹುಡಿ ಮಾಡಿಕೊಳ್ಳಿ
ಒಂದು ಲೋಟ ಸಕ್ಕರೆ
4 ಚಮಚ ತುಪ್ಪ
2 ಏಲಕ್ಕಿ ಹಾಗೂ ಗೋಡಂಬಿ ಚೂರುಗಳು

ಬಾಣಲೆಗೆ ತುಪ್ಪ ಎರೆದು ಬಾಳೆಹಣ್ಣುಗಳನ್ನು ಹುರಿಯಿರಿ.
ಸುವಾಸನೆ ಬರುತ್ಕಿದ್ದಂತೆ ತೆಂಗಿನ ತುರಿ ಹಾಕಿ ಸೌಟಾಡಿಸಿ, ತೆಂಗಿನತುರಿ ಹಾಗೂ ಬಾಳೆಹಣ್ಣುಗಳ ಮಿಶ್ರಣ ಹೊಂದಿಕೊಂಡು ಬಂದಾಗ ಸಕ್ಕರೆ ಹಾಕಿ ಸೌಟಾಡಿಸಿ, ನಮ್ಮ ಅಳತೆ ಪ್ರಮಾಣ ಪುಟ್ಟದು, ಬೇಗನೇ ತಳ ಬಿಟ್ಟು ಬರುವಾಗ, ಗೋಡಂಬಿ ಹುರಿದು, ಏಲಕ್ಕಿ ಗುದ್ದಿ ಹಾಕಿರಿ. ಇಂತಹ ಸಿಹಿತಿನಿಸುಗಳನ್ನು ಮಾಡುತ್ತಿರುವಾಗ ನಮ್ಮ ಗಮನ ಬೇರೆಡೆ ಹೋಗದಂತೆ ಜಾಗ್ರತೆ ವಹಿಸುವ ಅಗತ್ಯವೂ ಇದೆ. ಬಾಣಲೆಯೂ ದಪ್ಪ ತಳವುಳ್ಳದ್ದೂ, ಒಲೆಯ ಉರಿಯೂ ಒಂದು ಹದದಲ್ಲಿ ಇರಬೇಕು.

ಮೊಸರನ್ನ

ತೋಟದ ತೆಂಗಿನಕಾಯಿಗಳನ್ನು ತೆಗೆಸಿಯಾಗಿದೆ, " ಅಕ್ಕ, ನೀರಾಡುವ ಕಾಯೀಲಿ ಬನ್ನಂಗಾಯಿಯೂ ಉಂಟಲ್ಲ..." ಅಂದ ಚೆನ್ನಪ್ಪ.

" ಹೌದ, ಒಣಗಿದ ಕಾಯಿ ಅಟ್ಟಕ್ಕೆ ಹಾಕು, ಬನ್ನಂಗಾಯಿ ಪ್ರತ್ಯೇಕ ತೆಗೆದಿಡು.. ದೋಸೆಗೂ, ಅವಲಕ್ಕಿ ಬೆರೆಸಿ ತಿನ್ನಲಿಕ್ಕೂ, ಮೇಲಾರಕ್ಕೂ (ಮಜ್ಜಿಗೆಹುಳಿ ) ಆದೀತು. "

" ಪಾಯಸಕ್ಕೂ ಆದೀತು. " ಎಂದರು ಗೌರತ್ತೆ.
" ಹೌದು, ದಿನಾ ಪಾಯಸ ಮಾಡೋರು ಯಾರೂ..." ನನ್ನ ರನ್ನಿಂಗ್ ಕಮೆಂಟ್ರಿ ಮುಂದುವರಿಯುತ್ತಿದ್ದಂತೆ ಎರಡು ಬನ್ನಂಗಾಯಿಗಳನ್ನು ಸುಲಿದು ಇಟ್ಟ ಚೆನ್ನಪ್ಪ.

" ಹ್ಞೂ.. ನಾಳೆ ಬನ್ನಂಗಾಯಿ ದೋಸೆ..." ಅನ್ನುತ್ತ ಎರಡು ಲೋಟ ಬೆಳ್ತಿಗೆ ಅಕ್ಕಿ ತೊಳೆದು ನೀರೆರೆದು ಇಟ್ಟಾಯ್ತು.

ಸಂಜೆಯಾಗುತ್ತಲೂ ಬನ್ನಂಗಾಯಿ ಒಡೆದು, ತುರಿದು, ತೊಳೆದಿರಿಸಿದ ಅಕ್ಕಿಯನ್ನು ಮಿಕ್ಸಿಯ ಜಾರೊಳಗೆ ತುಂಬಿಸಿ, ಬನ್ನಂಗಾಯಿ ತುರಿಯನ್ನೂ, ನೀರನ್ನೂ ಎರೆದು "ಟೊರ್ ಟೊರ್... ಅನ್ನಿಸೋಣ ಎಂದಾಗ ಜಾರು ತಿರುಗಲೊಲ್ಲದು, ಒಳಗೆರೆದ ನೀರು ಹೊರ ಹರಿಯಿತು...

" ಥತ್, ಇದೊಂದು ಗೋಳು... " ಜಾರು ಕೆಟ್ಟಿದೆಯೆಂದು ದೂರು ಮನೆಯ ಚಾವಡಿಕಟ್ಟೆಗೆ ಬಂದಿತು.

" ಹಾಳಾದ್ರೆ ತೆಗೆದಿಡು.. ನಾಳೆ ರಿಪೇರಿ ಮಾಡ್ಸೋಣ... " ತಣ್ಣಗಿನ ಉತ್ತರ ಬಂದಿತು.

ಅಕ್ಕಿಯ ಮೇಲಿದ್ದ ಕಾಯಿತುರಿಯನ್ನು ತೆಗೆದಿರಿಸಿ,
ಅಕ್ಕಿಯನ್ನೂ ಬಸಿದು ತೂತಿನ ತಟ್ಟೆಯಲ್ಲಿ ಬಿಡಿಸಿ ಹಾಕಿದ್ದಾಯ್ತು.

" ನಾಳೆಗೇನು ತಿಂಡಿ ಮಾಡ್ತೀಯ? " ಕೇಳಿದ್ದು ಜಪಸರ ಹಿಡಿದು ರಾಮಜಪ ಮಾಡ್ತಿದ್ದ ಗೌರತ್ತೆ.
" ಈ ಅಕ್ಕಿಯಿಂದಾನೇ ಏನೋ ಒಂದು ಮಾಡಿದ್ರಾಯ್ತು ಬಿಡಿ. "
" ಉಪ್ಪಿಟ್ಟು, ಚಿತ್ರಾನ್ನ... " ಹೀಗೆಲ್ಲ ಚಿಂತನೆಗಳೊಂದಿಗೆ ರಾತ್ರಿ ಕಳೆದು ಬೆಳಗಾಯ್ತು.

ದೋಸೆ ಅಕ್ಕಿಯು ಸುಮಾರಾಗಿ ಒಣಗಿದೆ. ಎರಡು ಲೋಟ ಇತ್ತಲ್ಲ, ಐದು ಲೋಟ ನೀರೆರೆದು ಉಪ್ಪು ಸಹಿತವಾಗಿ ಕುಕ್ಕರಿನಲ್ಲಿ ಎರಡು ಸೀಟಿ ಕೂಗಿಸಿ,
ಎರಡು ಘನಗಾತ್ರದ ನೀರುಳ್ಳಿ ಚಿಕ್ಕದಾಗಿ ಹೆಚ್ಚಿ,
ನಾಲ್ಕು ಹಸಿಮೆಣಸು ಸಿಗಿದು,
ಕರಿಬೇವು ತೋಟದಿಂದ ತಂದು,
ಫ್ರಿಜ್ಜಿನಲ್ಲಿದ್ದ ಬನ್ನಂಗಾಯಿ ತುರಿ ಹೊರ ಬಂದು,
ಅಡುಗೆಯ ಸಿದ್ಧತೆಗಾಗಿ ಇಷ್ಟೆಲ್ಲ ಮಾಡುತ್ತಿರಬೇಕಾದರೆ ಅನ್ನ ಬೆಂದಿದೆ.

ಬಾಣಲೆಗೆ ಒಗ್ಗರಣೆ ಸಾಹಿತ್ಯಗಳನ್ನು ಉದುರಿಸಿ, ತೆಂಗಿನೆಣ್ಣೆ, ಸಾಸಿವೆ, ಕಡ್ಲೇಬೇಳೆ, ಒಣಮೆಣಸಿನ ಚೂರುಗಳು...
ಚಟಪಟನೆ ಸಾಸಿವೆ ಸಿಡಿದಾಗ ಕರಿಬೇವು, ನೀರುಳ್ಳಿ, ಹಸಿಮೆಣಸು ಬೀಳಿಸಿ,
ತಟಪಟನೆ ಸೌಟಾಡಿಸಿ, ಬನ್ನಂಗಾಯಿ ತುರಿ ಹಾಕಿ, ಒಂದು ಸೌಟು ಸಕ್ಕರೆ, ಈಗಾಗಲೇ ಅನ್ನಕ್ಕೆ ಉಪ್ಪು ಬಿದ್ದಿದೆ, ನೋಡಿಕೊಂಡು ಬೇಕಿದ್ದರೆ ಮಾತ್ರ ಉಪ್ಪು ಹಾಕುವುದು.
ಸಾಕಷ್ಟು ಅನ್ನ ಸುರಿದು, ಚೆನ್ನಾಗಿ ಬೆರೆಸುವಲ್ಲಿಗೆ ಒಗ್ಗರಣೆ ಅನ್ನ ಸಿದ್ಧವಾಗಿದೆ.

ಬಾಳೆಹಣ್ಣು ಕೂಡಿಕೊಂಡು ಮುಂಜಾನೆಯ ರಸಗವಳ ತಿನ್ನೋಣ.

ಹತ್ತು ಗಂಟೆಯ ಚಹಾ ಸಮಯ, ಒಗ್ಗರಣೆ ಅನ್ನ ತಣಿದಿದೆ. ನಾಲ್ಕು ಸೌಟು ದಪ್ಪ ಮೊಸರು ಹಾಕಿ ಕಲಸಿದಾಗ ಮೊಸರನ್ನವೆಂಬ ತಿನಿಸು ಎದ್ದು ಬಂದಿತು. ಬೇಸಿಗೆಯ ಬೇಗೆಗೆ ಮೊಸರನ್ನವೇ ಹಿತವೆಂದರು ಗೌರತ್ತೆ.

ಪಂಚಾಮೃತ

ಹಿರಣ್ಯದ ಆವರಣದಲ್ಲಿರುವ ಮಹಿಷಂದಾಯ ದೈವಗುಡಿಯಲ್ಲಿ ಸಂಜೆಯ ಹೊತ್ತು ತಂಬಿಲಸೇವೆ, ದೇವಿ ಬಾಲಾಲಯದಲ್ಲಿ ದುರ್ಗಾಪೂಜೆ, ಕುಂಕುಮಾರ್ಚನೆ, ಹೂವಿನಪೂಜೆ, ಭಜನೆ ಕಾರ್ಯಕ್ರಮಗಳ ನಿಮಿತ್ತ ಸಂಬಂಧಿತರಿಗೆ ವಾಟ್ಸಪ್ ಮುಖೇನ ನೆನಪಿನೋಲೆ ಕಳುಹಿಸಿಯೂ ಆಯಿತು.

ಪೂಜೆಯ ಉಸ್ತುವಾರಿ ಹೊತ್ತಿರುವ ಪರಕ್ಕಜೆ ಪುರೋಹಿತರು ಸಂಜೆ ನಾಲ್ಕಕ್ಕೇ ಆಗಮಿಸಿ, ವಿಶ್ರಾಂತಿಗಾಗಿ ಜಮಖಾನ ಹಾಸಿ ತಲೆದಿಂಬಿನೊಂದಿಗೆ ಅಡ್ಡಾದರು.

ನನಗೋ ಎಲ್ಲವನ್ನೂ ಹೊಂದಿಸಿ ಇಡುವ ಆತುರ. ಏನೇನು ಆಗ್ಬೇಕಾಗಿದೆ ಎಂಬ ತಪಾಸಣೆಯೂ,
ತೋಟದಿಂದ ಬಂದ ತೆಂಗಿನಕಾಯಿಗಳನ್ನು ಸುಲಿದು ಇರಿಸಿದೆಯೋ,
ಗುಣಮಟ್ಟದ ಬೆಳ್ತಿಗೆ ಅಕ್ಕಿ - ಪಿಂಡಿ ಪಾಯಸಕ್ಕಾಗಿ,
ಅವಲಕ್ಕಿ, ಹೊದಳು, ಬೆಲ್ಲ - ಪಂಚಕಜ್ಜಾಯಕ್ಕಾಗಿ,
ಹಾಲು, ಮೊಸರು, ತುಪ್ಪ, ಜೇನು, ಸಕ್ಕರೆ - ಪಂಚಾಮೃತಕ್ಕಾಗಿ...

ಎಲ್ಲವನ್ನೂ ಅಚ್ಚುಕಟ್ಟಾಗಿ ಜೋಡಿಸುತ್ತಿರಬೇಕಾದರೆ ಪರಿಕರ್ಮಗಳ ಉಸ್ತುವಾರಿಗಾಗಿ ಮುಳಿಯಾಲು ಭಟ್ಟರು ಬಂದರು.

ಮಿಂದು ಶುಚಿರ್ಭೂತರಾಗಿ ನೈವೇದ್ಯದ ಪಿಂಡಿ ಪಾಯಸ ಮಾಡಬೇಕಲ್ಲವೇ, ಬಚ್ಚಲುಮನೆಯಲ್ಲಿ ಹಂಡೆನೀರು ಕುದಿಯಿತು.

" ಹೌದೂ, ಪಂಚಾಮೃತದ ಸಾಹಿತ್ಯ ಅಲ್ಲಿಗೆ ತೆಗೆದುಕೊಂಡು ಹೋಗುವುದೋ, ಇಲ್ಲಿಂದಲೇ ಹೊಂದಿಸಿ ಒಯ್ಯುವುದೋ ಹೇಗೆ? "

" ನೀವು ನಾನು ಹೇಳಿದಷ್ಟು ಕೊಡಿ, ಹಾಲು ಎಲ್ಲಿದೆ? "

" ಹಾಲು ಈಗ ಡೈರಿಯಿಂದ ತಂದದ್ದು.. " ಸ್ಟೀಲು ಕ್ಯಾನು ಬಾಯ್ದೆರೆಯಿತು. ಅಂದಾಜು ಅರ್ಧ ಲೀಟರು ಹಾಲು ಸ್ಟೀಲು ತಂಬಿಗೆಯ ಪಾಲಾಯ್ತು.

" ಮೊಸರು ಎಲ್ಲಿ? "
" ಪ್ರಿಜ್ ಒಳಗಿಂದ ಎರಡು ಸೌಟು ಮೊಸರು ತಂಬಿಗೆ ಸೇರಿತು.

" ಒಂದೊಂದು ಚಮಚ ಜೇನು ಹಾಗೂ ತುಪ್ಪ... "

" ಸಿಹಿಸಿಹಿ ಆಗ್ಬೇಕಲ್ಲ... " ನಾಲ್ಕು ಸೌಟು ಸಕ್ಕರೆ ಹಾಲು ಮೊಸರೊಳಗೆ ಐಕ್ಯವಾಯಿತು.

" ಪಂಚಾಮೃತ ಆಯಿತು... " ಅನ್ನುತ್ತ ತುಂಬಿದ ತಂಬಿಗೆ ಹಾಗೂ ಇನ್ನಿತರ ಪರಿಕರಗಳೊಂದಿಗೆ ಭಟ್ಟರು ದೇವಿ ಸಾನಿಧ್ಯದ ಕಡೆ ನಡೆದರು.

ತಡರಾತ್ರಿ ಹೊತ್ತಿಗೆ ಪೂಜಾ ಕೈಂಕರ್ಯಗಳೆಲ್ಲ ಮುಗಿದು, ಹೂ ಹಣ್ಣು ಕಾಯಿ ಕುಂಕುಮಗಳನ್ನು ಭಕ್ತ ಜನ ಸಮುದಾಯಕ್ಕೆ ವಿತರಿಸಿ, ನೈವೇದ್ಯ ಪ್ರಸಾದಗಳನ್ನು ಹಂಚಿದ್ದೂ ಆದ ನಂತರ ಉಳಿದ ಪಂಚಾಮೃತ ನನ್ನ ಕೈ ಸೇರಿತು.
ಪಂಚಾಮೃತವನ್ನು ಪ್ರಸಾದ ರೂಪದಲ್ಲಿ ವಿತರಿಸುವಾಗ ಅಂಗೈ ಬೊಗಸೆಯಲ್ಲಿ ಹಿಡಿಸುವಷ್ಟೇ ಪುಟ್ಟ ಸಕ್ಕಣದಲ್ಲಿ ಎರೆಯುವ ಪದ್ಧತಿ, ತಂಬಿಗೆ ಪಂಚಾಮೃತ ಮುಗಿಯದೇ ಹೋಯಿತು.

" ಇದನ್ನು ಮನೆಗೊಯ್ದು ಏನು ಮಾಡಲೀ? "
"ಪ್ರಿಜ್ ಒಳಗಿಟ್ಟು ನಾಳೆ ಐಸ್ ಕ್ರೀಂ ಥರ ಚೆನ್ನಾಗಿರುತ್ತೆ... " ಪುಕ್ಕಟೆ ಸಲಹೆಯೂ ಸಿಕ್ಕಿತು!

ನೆಲ್ಲಿಕಾಯಿಯ ಸಿಹಿ

ನೆಲ್ಲಿಕಾಯಿ ಬಂದಿತ್ತು. " ನೆಲ್ಲಿಕಾಯಿಯ ಮುರಬ್ಬ ನಂಗೆ ಬೇಡ, ಒಣಗಿಸಿ ಹುಡಿ ಮಾಡಿಟ್ಟರೆ ನೆಲ್ಲಿಕಾಯಿ ಚೂರ್ಣ ಆಯ್ತು, ನಂಗೆ ಅದೇ ಸಾಕು... " ಮೊದಲೆಲ್ಲ ಗೌರತ್ತೆ ತೋಟದ ಗುಡ್ಡದ ಬದಿಯಲ್ಲಿರುವ ಮರದ ನೆಲ್ಲಿಕಾಯಿಗಳನ್ನು ಹೆಕ್ಕಿ ತರುತ್ತಿದ್ದರು. ಚೆನ್ನಾಗಿ ಬೆಳೆದ ನೆಲ್ಲಿಕಾಯಿಗಳು ತಾನಾಗಿಯೇ ಮರದಿಂದ ಉದುರಿ ಬೀಳಬೇಕು, ಬಿದ್ದಲ್ಲಿಯೇ ಒಣಗಿದ ಕಾಯಿಗಳನ್ನು ತಂದು ಡಬ್ಬದಲ್ಲಿ ತುಂಬಿಸಿ ಬೇಕೆನಿಸಿದಾಗ ಕಷಾಯ ಮಾಡಿ ಕುಡಿಯುವ ಪದ್ಧತಿ ಇಟ್ಕೊಂಡಿದ್ದರು ಗೌರತ್ತೆ. ಈಗ ಗುಡ್ಡದಲ್ಲಿ ರಬ್ಬರ್ ಕಾಡು ಬೆಳೆಸಿ ನೆಲ್ಲಿಕಾಯಿಯ ಮರ ನಾಪತ್ತೆಯಾಗಿದೆ.

" ಎಲ್ಲವನ್ನೂ ಒಣಗಿಸಿ ಇಡೂದು ಬೇಡ, ನಾನು ಮುರಬ್ಬ ತಿನ್ಬೇಕು.. " ಮುರಬ್ಬ ಮಾಡುವ ಹೊಸ ವಿಧಾನ ಯೂ ಟ್ಯೂಬ್ ನಲ್ಲಿ ನೋಡಿದ್ದ ನನಗೂ ಮುರಬ್ಬದ ಚಪಲ.

" ಹೌದ, ಈ ಬಾರಿ ಮುರಬ್ಬ ಹೇಗೆ ಮಾಡ್ತೀಯಾ? "
" ನೋಡ್ತಾ ಇರಿ.. "
ಈ ನೆಲ್ಲಿಕಾಯಿಗಳು ಮಾರುಕಟ್ಟೆಯಿಂದ ಬಂದದ್ದು, ಕೊಯ್ದು ದಿನವೆಷ್ಟಾಯ್ತೋ, ಕೊಳೆಕಸ ಹೋಗಲಿಕ್ಕೆ ಮುಳುಗುವಷ್ಟು ನೀರೆರೆದು ಅರ್ಧ ದಿನವಾದರೂ ಇಡಬೇಕು. ನಂತರ ನೀರು ಬಸಿದು ಚೆಲ್ಲುವುದು.

ಕುಕ್ಕರಿನಲ್ಲಿ ನೆಲ್ಲಿಕಾಯಿಗಳನ್ನು ತುಂಬಿ, ಮುಳುಗುವಷ್ಟು ನೀರು ಎರೆಯಬೇಕು. ನೀರನ್ನು ಅಳೆದೇ ಎರೆಯಿರಿ, ನಾಲ್ಕು ಲೋಟ ನೀರು ಬೇಕಾಯಿತು. ರುಚಿಗೆ ತುಸು ಉಪ್ಪು ಹಾಕಬೇಕು.

ಕುಕರ್ ಒಂದು ಸೀಟಿ ಹಾಕಿದೆ, ಕೊಡಲೇ ಇಳಿಸಿ, ಒತ್ತಡವನ್ನು ನಿಧಾನವಾಗಿ ತೆಗೆದು ಮುಚ್ಚಳ ತೆರೆಯಿರಿ.
ಬೇಯಿಸಲು ಉಪಯೋಗಿಸಿದ ನೀರನ್ನು ಬಸಿಯಿರಿ, ಚೆಲ್ಲುವಂತಿಲ್ಲ, ಆಮ್ಲಾ ವಾಟರ್ ಎಂದು ಕರೆಯಬಹುದಾದ ಈ ನೀರನ್ನು ರೆಫ್ರಿಜರೇಟರ್ ಒಳಗಿಡತಕ್ಕದ್ದು. ಸಾಂದ್ರತೆಯುಳ್ಳ ಈ ದ್ರಾವಣವನ್ನು ಸಾಕಷ್ಟು ನೀರೆರೆದು ತೆಳ್ಳಗಾಗಿಸಿ ಬೇಕೆನಿಸಿದಾಗ ಕುಡಿಯತಕ್ಕದ್ದು.

ಕುಕರ್ ಪಾತ್ರೆಯೊಳಗೆ ಇರುವ ಬಿಸಿಬಿಸಿ ನೆಲ್ಲಿಕಾಯಿಗಳಿಗೆ, ಈ ಮೊದಲು ಎರೆದ ನೀರಿನ ಅಳತೆಯಷ್ಟು, ಅಂದರೆ ನಾಲ್ಕು ಲೋಟ ಸಕ್ಕರೆ ಸುರಿಯಬೇಕು ಹಾಗೂ ಒಲೆಯ ಮೇಲೆ ಇರಿಸಬೇಕು.
ಅತಿ ಕನಿಷ್ಠ ಉರಿಯಲ್ಲಿ ಇರಿಸಿ, ಆಗಾಗ ಸೌಟು ಹಾಕಿ ಕೆದಕುತ್ತಿರಬಾರದು, ನೆಲ್ಲಿಕಾಯಿ ಮುದ್ದೆಯಾದೀತು.
ಇಂಡಕ್ಷನ್ ಸ್ಟವ್ ಉತ್ತಮ, ಅದರ ಲೆಕ್ಕಾಚಾರದ ಕನಿಷ್ಠ ಉಷ್ಣತೆಯಲ್ಲಿರಿಸಿ ಮಿಕ್ಕುಳಿದ ಅಡುಗೆ ಕೆಲಸಗಳನ್ನೆಲ್ಲ ಮಾಡಿಟ್ಟು, ಸ್ನಾನವನ್ನೂ ಮುಗಿಸಿ, ಊಟಕ್ಕೆ ಹೊರಟಾಗ ಸಕ್ಕರೆ ಕರಗಿತ್ತು.

ಸಕ್ಕರೆಯೆಲ್ಲ ಕರಗಿದ ಈ ಹಂತದಲ್ಲಿ ಕುಕ್ಕರ್ ಮುಚ್ಚಿ ಬೇಯಿಸಿ, ಇನ್ನೊಂದು ಸೀಟಿ ಕೂಗಿಸಿ, ಅದರ ಪಾಡಿಗೆ ತಣಿಯಲು ಬಿಡಬೇಕು.

ಸಂಜೆಯ ಚಹಾ ಸಮಯ, ಕುಕ್ಕರ್ ತಣಿದಿದೆ, ಸಕ್ಕರೆಯ ಪಾಕವೂ ಆಗಿದೆ, ಸುವಾಸನೆಗೆ ಏಲಕ್ಕಿಪುಡಿ ಉದುರಿಸಿ.

ನೆಲ್ಲಿಕಾಯಿ ಮುರಬ್ಬವೂ,
ಆಮ್ಲಾ ವಾಟರೂ,
ನೆಲ್ಲಿಕಾಯಿ ಚೂರ್ಣವೂ,
ಒಂದೇ ಏಟಿಗೆ ಆಗಿಬಿಟ್ಟಿತು.