ಮದುವೆಯೂಟಕ್ಕೆ ಹೋಗಿದ್ದೆವು, ಮನೆಯಿಂದ ಹೊರಡುವಾಗಲೇ ಗಂಟೆ ಹನ್ನೊಂದಾಗಿತ್ತು. ಮದುವೆ ಮಂಟಪದ ಕಡೆ ತಿರುಗಿಯೂ ನೋಡದೆ ನಾನು ದೌಡಾಯಿಸಿದ್ದು ಊಟದ ಹಾಲ್ ಕಡೆಗೆ, ಅಲ್ಲಿ ಜನಜಂಗುಳಿ ಈಗಾಗಲೇ ನೆರೆದಿತ್ತು. ಸೀಟುಗಳು ಈಗಾಗಲೇ ಭರ್ತಿ ಆದಂತಿದೆ, ನನ್ನ ಪುಣ್ಯ, ಒಂದು ಕಡೆ ಟವೆಲ್ ಇಟ್ಟು ಕಾದಿರಿಸಲ್ಪಟ್ಟ ಕುರ್ಚಿ ದೊರೆಯಿತು. ಟವಲ್ ಅತ್ತ ಎತ್ತಿಟ್ಟು ಕುಳಿತಿದ್ದಾಯ್ತು.
ಬಾಳೆಲೆ ಒರೆಸಿ, ನೀರು ಸಿಡಿಸಿ ತೊಳೆಯುವಷ್ಟರಲ್ಲಿ ಬಡಿಸುವ ಸುಧರಿಕೆಯವರು ಒಬ್ಬೊಬ್ಬರಾಗಿ ಬರಲಾರಂಭಿಸಿದರು. ಬಾಳೆಯ ಒಂದು ತುದಿಗೆ ಉಪ್ಪು, ಉಪ್ಪಿನಕಾಯಿ.. ಅದೂ ಮಾವಿನ ಮಿಡಿ ಉಪ್ಪಿನಕಾಯಿ. ಕೆಳ ತುದಿಗೆ ಚಿತ್ರಾನ್ನ, ಮತ್ತೊಂದು ಬದಿಗೆ ಪಾಯಸ, ಪಲ್ಯ ಬಂದಿತು, ಬೊಗಸೆ ತುಂಬ ಬಡಿಸುತ್ತ ಹೋದ ಪಲ್ಯ ಗೇರುಬೀಜದ್ದು ಮಾರಾಯ್ರೇ! ಗೇರುಬೀಜ ಹಾಗೂ ತೊಂಡೆಕಾಯಿ ಮಿಶ್ರಣದ ಈ ಪಲ್ಯ ನಾನೂ ತಿನ್ನದೆ ತುಂಬ ಸಮಯವಾಗಿತ್ತೂ ಅನ್ನಿ,
ಯುಗಾದಿ ಬಂತೆಂದರೆ ಸಾಕು, ಗೇರುತೋಪುಗಳಲ್ಲಿ ಬೀಜ ಕೊಯ್ಯುವ ಕಾರುಭಾರು. ಒಣ ಬೀಜಗಳು ಮಾರಾಟಕ್ಕಾಗಿ, ಹಣ್ಣುಗಳು ಮಕ್ಕಳ ಪಾಲು, ಹಟ್ಟಿಯ ಹಸುಗಳಿಗೂ ಯಥೇಚ್ಛ ಭೋಜನ. ನಮ್ಮ ಊರ ಕಡೆ ಕ್ವಿಂಟಲ್ ಗಟ್ಟಲೆ ಗೇರು ಬೆಳೆಯುವವರಿದ್ದಾರೆ. ಮನೆ ಉಪಯೋಗಕ್ಕೂ ನಮ್ಮದೇ ಗೇರುಬೀಜಗಳು, ಗೇರುಬೀಜಗಳನ್ನು ಬಿಡಿಸಿ ಕೊಡಲು ಕೆಲಸಗಿತ್ತಿಯರಿದ್ದರು. ಹಿತ್ತಲಲ್ಲಿ ತೊಂಡೆ ಚಪ್ಪರವೂ ಇರುವಾಗ ಗೇರುಬೀಜದ ಪಲ್ಯ ಒಂದು ಮಾಮೂಲಿ ಅಡುಗೆ. ಅಮ್ಮ ಬಾಣಲೆ ತುಂಬಾ ಮಾಡಿ ಇರಿಸುತ್ತಿದ್ದ ಗೇರುಬೀಜದ ಪಲ್ಯ ತಿನ್ನಲು ನಾವು ಮಕ್ಕಳು ನಾ ಮುಂದು ತಾ ಮುಂದು ಎಂದು ತಟ್ಟೆಯ ಎದುರು ಕುಳಿತು ಬಡಿಸಿದ ಅನ್ನ ಪಲ್ಯ ಸಾರು ಉಂಡು ಏಳುತ್ತಿದ್ದ ಕಾಲವೊಂದಿತ್ತು. ಹೋದ ಕಾಲ ಮತ್ತೆ ಬರುವಂತಿಲ್ಲ. ಆದರೂ ಗೇರುಹಣ್ಣಿನ ಸೀಸನ್ ಅಲ್ಲದ ಸಮಯದಲ್ಲಿ ಗೇರುಬೀಜದ ಪಲ್ಯ ತಿನ್ನುವ ಯೋಗ ಬಂದಿದೆ.
ಮನೆಗೆ ಬಂದೊಡನೆ ನನಗೂ ಗೇರುಬೀಜದ ಪಲ್ಯ ಮಾಡುವ ಹಂಬಲ ಮೂಡಿತು. ಡಬ್ಬ ತುಂಬಾ ಪಾಯಸಕ್ಕಾಗಿ ತಂದಿರಿಸಿದ ಗೇರುಬೀಜಗಳಿವೆ, ತೊಂಡೆಕಾಯಿ ಇಲ್ಲ, ಕ್ಯಾಪ್ಸಿಕಂ ಇದೆ, ಆದೀತು.
ಒಂದು ಕ್ಯಾಪ್ಸಿಕಂ, ತೊಳೆದು ಹೆಚ್ಚಿಡುವುದು.
10 - 12 ಗೇರುಬೀಜಗಳು, ಹೋಳು ಮಾಡಿ ಕುದಿಯುವ ನೀರೆರೆದು ಮುಚ್ಚಿಡುವುದು.
ಬಾಣಲೆಯಲ್ಲಿ ಒಗ್ಗರಣೆಗಿಟ್ಟು,
ಸಾಸಿವೆ ಸಿಡಿದಾಗ,
ಕರಿಬೇವು ಉದುರಿಸಿ,
ಹೆಚ್ಚಿಟ್ಟ ಕ್ಯಾಪ್ಸಿಕಂ ಹಾಕಿ ಸೌಟಾಡಿಸಿ,
ಉಪ್ಪು ಉದುರಿಸಿ.
ಸಣ್ಣ ಉರಿಯಲ್ಲಿ ಸ್ವಲ್ಪ ಹೊತ್ತು ಮುಚ್ಚಿರಿಸಿ,
ನೀರು ಬಸಿದು ನೆನೆದ ಗೇರುಬೀಜಗಳನ್ನು ಹಾಕಿ,
ಕಾಯಿತುರಿ ಉದುರಿಸಿ,
ಸೌಟಿನಲ್ಲಿ ಎಲ್ಲವನ್ನೂ ಬೆರೆಸಿ,
ಊಟದ ಟೇಬಲ್ ಮೇಲೆ ಇರಿಸಿ,
ಅನ್ನದೊಂದಿಗೆ ಸವಿಯಿರಿ.
ಎಳೆಯ ತೊಂಡೆಕಾಯಿಗಳು ಬಂದಿವೆ.
10 - 15 ತೊಂಡೆಕಾಯಿಗಳನ್ನು ತೊಳೆದು ಪಲ್ಯಕ್ಕೆ ಸೂಕ್ತವಾಗುವಂತೆ ಕತ್ತರಿಸಿ,
ಉಪ್ಪು ಬೆರೆಸಿ ಕುಕ್ಕರಿನಲ್ಲಿ ಒಂದು ಸೀಟಿ ಕೂಗಿಸಿ,
ನಿಧಾನಗತಿಯಲ್ಲಿ ಒತ್ತಡ ಇಳಿಸಿ ಮುಚ್ಚಳ ತೆಗೆಯಿಯಿರಿ.
ತೊಂಡೆಕಾಯಿ ಬೆಂದಿರುತ್ತದೆ.
ಬಾಣಲೆಯಲ್ಲಿ ಒಗ್ಗರಣೆಗಿರಿಸಿ, ಈ ಮೊದಲು ಕ್ಯಾಪ್ಸಿಕಂ ಪಲ್ಯ ಮಾಡಿದ ವಿದಾನವನ್ನೇ ಅನುಸರಿಸಿ ಗೇರುಬೀಜದ ಪಲ್ಯ ಸಿದ್ಧಪಡಿಸಿ.
ಈ ಪಲ್ಯಕ್ಕೆ ಬೇರೆ ಯಾವುದೇ ಮಸಾಲಾ ಸಾಮಗ್ರಿ ಹಾಕುವುದಕ್ಕಿಲ್ಲ, ಗೇರುಬೀಜವೇ ಇದರ ಪ್ರಧಾನ ಆಕರ್ಷಣೆ ಎಂದು ತಿಳಿಯಿರಿ.
ಕಾರ್ಬೋಹೈಡ್ರೇಟ್, ಕ್ಯಾಲ್ಸಿಯಂ, ಕೊಬ್ಬು, ಖನಿಜಾಂಶಗಳಿಂದ ಸಮೃದ್ಧವಾಗಿರುವ ಗೇರುಬೀಜವು ಮಕ್ಕಳ ಸರ್ವಾಂಗೀಣ ಬೆಳವಣಿಗೆಗೆ ಪೂರಕ.
ಸಸ್ಯವಿಜ್ಞಾನದಲ್ಲಿ Anacardium occidentale ಎಂದಾಗಿರುವ ನಿತ್ಯ ಹರಿದ್ವರ್ಣದ ಗೇರುಮರದ ಮೂಲ ನೆಲೆ ದಕ್ಷಿಣ ಅಮೇರಿಕಾದ ಬ್ರೆಜಿಲ್ ಆದರೂ ಭಾರತ ಹಾಗೂ ಆಫ್ರಿಕಾ ಅತಿ ಹೆಚ್ಚು ಗೇರುಬೀಜ ಉತ್ಪಾದಕ ದೇಶಗಳಾಗಿವೆ.
