ಗೋಧಿ ಪಾಯಸ

 

ಗೋಧಿಕಡಿ ಇಡ್ಲಿ, ದೋಸೆ ಸವಿದಾಯ್ತು,  ಅದರೂ ಮಧುಕರ ತಂದುಕೊಟ್ಟ ಮಂಗಳೂರಿನ ಬಾಳಿಗಾ ಸ್ಟೋರ್ ನ ಗೋಧಿಕಡಿ ಮುಗಿದಿರಲಿಲ್ಲ.  ಹಿರಣ್ಯ ದೇವಸ್ಥಾನದಲ್ಲಿ ಸವಿದ ಅಕ್ಕಿಪಾಯಸದ ಮಾದರಿಯಲ್ಲೇ ಗೋಧಿ ಪಾಯಸ ಮಾಡಿದರಾದೀತು.  

ಗೋಧಿ ಪಾಯಸಕ್ಕೆ ಬೆಲ್ಲವೇ ಸೂಕ್ತ,  ಎರಡು ಅಚ್ಚು ಸಾಕಾದೀತು ಎಂದು ಬೆಲ್ಲದ ಡಬ್ಬ ತೆರೆದಾಗ, ಬೆಲ್ಲ ದ್ರವರೂಪಕ್ಕೆ ಹೊರಳುವಂತಿದೆಯಲ್ಲ!  ಬಹುಶಃ ಸೆಕೆಗೆ ಹೀಗಾಗಿದೆ. ಬೆಲ್ಲವನ್ನು ಕೈಗೆತ್ತಿಕೊಂಡಾಗ ಬೆಲ್ಲದ ಕಡು ವರ್ಣವನ್ನು ಕಳೆದುಕೊಂಡಂತೆ, ಸಕ್ಕರೆಯ ಅಚ್ಚಿನಂತೆ ಭಾಸವಾಯಿತು.  ಗಟ್ಟಿಕಲ್ಲಿನಂತೆ ಇದ್ದ ಅಚ್ಚನ್ನು ಕಷ್ಟಪಟ್ಟು ಚೂರಿಯಲ್ಲಿ ತುಂಡರಿಸಿ ಬಾಯಿಗೆ ಹಾಕಿದಾಗ ಇದು ಸಕ್ಕರೆ,  ಬೆಲ್ಲವಲ್ಲ ಎಂದು ತಿಳಿಯಿತು.  ಸಕ್ಕರೆ ಇರುವಾಗ ನಾನೇಕೆ ಈ ಬೆರಕೆ ಸಕ್ಕರೆ ಉಪಯೋಗಿಸಲಿ?  ಇನ್ನೂ ಬೇರೇನನ್ನು ಸೇರಿಸಿರುತ್ತಾರೋ ತಿಳಿಯದು.

ಅಂತೂ ಮನೆಯ ಸದಸ್ಯರೊಂದಿಗೆ ಸಮಾಲೋಚಿಸಿ ಬೆಲ್ಲವನ್ನು ಬಿಸಾಡುವ ತೀರ್ಮಾನಕ್ಕೆ ಬರಲಾಯಿತು.

ನಿನ್ನೆ ರಂಗಣ್ಣ ಬಂದಿದ್ದ,  “ನೋಡೂ ಬೆಲ್ಲ ಹೀಗಾಗಿದೆ,   ಈಗ ಅಂಗಡಿಯಿಂದ ಕೇವಲ ಅರ್ಧ ಕಿಲೋ ಬೆಲ್ಲ ತಂದ್ಕೊಂಡು. “

ರಂಗಣ್ಣ ಕಲಬೆರಕೆ ಬೆಲ್ಲವನ್ನು ತೆಂಗಿನ ಮರದ ಬುಡಕ್ಕೆ ಚೆಲ್ಲಿ ಬಂದ,  ಹೊಸದಾದ ಬೆಲ್ಲವೂ ಬಂದಿತು.  ಇನ್ನೀಗ ಪಾಯಸದ ವ್ಯವಹಾರ ನೋಡಿಕೊಳ್ಳೋಣ.

ನಿಧಾನಗತಿಯಲ್ಲಿ ಬೇಯುವ ಗೋಧಿಗೆ ಕುಕ್ಕರ್ ಅವಶ್ಯವಿದೆ.   ಇಬ್ಬರಿಗೆ ಬೇಕಾಗುವಷ್ಟೇ ಪಾಯಸ ಮಾಡಬೇಕಾಗಿದೆ.  ಐದು ಚಮಚ ಗೋಧಿ ಕಡಿ ಅಳೆಯಿರಿ.  ಕುಕ್ಕರಿಗೆ ಮೂರು ದೊಡ್ಡ ಲೋಟ ನೀರು ಎರೆಯಿರಿ.

ದೊಡ್ಡ ಉರಿಯಲ್ಲಿ ಮೂರು ಸೀಟಿ ಹಾಕಲಿ.  ನಂತರ ಉರಿಯನ್ನು ಕನಿಷ್ಠ ಡಿಗ್ರಿಯಲ್ಲಿರಿಸಿ,  ಹತ್ತು ನಿಮಿಷ ಬಿಟ್ಟು ಉರಿಯನ್ನು ಆರಿಸಿ,  ಇಂತಹ ವ್ಯವಹಾರಗಳಿಗೆ ಇಂಡಕ್ಷನ್ ಸ್ಟವ್ ಸೂಕ್ತ.

ಒಂದೇ ಸ್ಟೀಲ್ ಕುಕರ್ ಇದ್ದುದರಿಂದ ಮೊದಲು ಗೋಧಿಯನ್ನು ಬೇಯಿಸಿ,  ಅದನ್ನು ಇನ್ನೊಂದು ದಪ್ಪ ತಳದ ಸ್ಟೀಲ್ ಪಾತ್ರೆಗೆ ಬದಲಿಸಿದ್ದೂ ಆಯ್ತು, ಎರಡು ಅಚ್ಚು ಬೆಲ್ಲ ಹಾಕಿರಿಸುವುದು, ನಧಾನಗತಿಯಲ್ಲಿ ಕರಗುತ್ತಿರಲಿ.  ಇದೀಗ ಕುಕರ್ ಅನ್ನ ಬೇಯಿಸಲು ಹೊರಟಿದೆ ಅನ್ನಿ.

ಅರ್ಧ ತೆಂಗಿನಕಾಯಿ ತುರಿದು ದಪ್ಪ ಹಾಲು ತೆಗೆಯಿರಿ,  ನೀರುಕಾಯಿಹಾಲನ್ನು ಬೆಲ್ಲ ಕರಗುತ್ತಲಿರುವ ಪಾಯಸದ ತಪಲೆಗೆ ಎರೆಯಿರಿ.

ದ್ರಾಕ್ಷಿ, ಗೋಡಂಬಿ,  ಏಲಕ್ಕಿಗಳನ್ನು ಸಿದ್ಧಪಡಿಸಿ,  ನನ್ನ ಬಳಿ ಪಿಸ್ತಾ ಇದ್ದಿತು,  ಅದನ್ನೇ ನಾಲ್ಕು ಚೂರು ಹಾಕುವುದು.

ಅನ್ನದ ಕೆಲಸ ಆಯ್ತು,  ಇದೀಗ ಇಂಡಕ್ಷನ್ ಸ್ಟವ್ ಪಾಯಸ ಕುದಿಸಲು ತಯಾರ್ ಎಂದಿತು.

ಬೆಲ್ಲ ಕರಗಿ ಸಾಂದ್ರವಾಗಬೇಕಿದೆ.   ಗರಿಷ್ಠ ಉಷ್ಣತೆಯಲ್ಲಿ ಕುದಿಸುತ್ತಾ, ಸೌಟಿನಲ್ಲಿ ಕೆದಕುತ್ತಾ,  ಉಷ್ಣತೆಯನ್ನು ಕಡಿಮೆ ಮಾಡುತ್ತಾ ಇದ್ದಂತೆ, ಮೆತ್ತಗೆ ಬೆಂದಂತಹ ಪಾಯಸದ ದ್ರಾವಣಕ್ಕೆ, ದಪ್ಪ ಕಾಯಿಹಾಲು ಎರೆಯುವ ಸಮಯ ಬಂದಿದೆ.   ತುಪ್ಪದಲ್ಲಿ ಕರಿದ ದ್ರಾಕ್ಷಿ ಗೋಡಂಬಿಗಳಿಂದ ಅಲಂಕರಿಸೋಣ.  ಸಾಲದೂ ಎಂಬಂತೆ ಏಲಕ್ಕಿ, ಪಿಸ್ತಾ…

ಮರೆತೇ ಬಿಟ್ಟಿದ್ದೆ,  ಮಧುಕರ ತಂದುಕೊಟ್ಟಂತಹ ವೆನಿಲಾ ಕೋಡುಗಳು, ಮೊನ್ನೆ ತಾನೇ ತಂದಿದ್ದ,  ನನ್ನ ಬಳಿ ಅಡಿಕೆತೋಟದಲ್ಲಿ ಆದಂತಹ ವೆನಿಲಾ ದಾಸ್ತಾನೂ ಇತ್ತು,  ಹೊಸತು ಬಂದಿರುವಾಗ ಹಳೆಯದರ ಹಂಗೇಕೆ ಅಂದುಕೊಳ್ಳುತ್ತ  ಎರಡು ಇಂಚು ಉದ್ದ ವೆನಿಲಾ ಕತ್ತರಿಸಿ ಗೋಧಿ ಬೇಯುವಾಗಲೇ ಹಾಕಿದ್ದನ್ನು ಬರೆಯದಿದ್ದರೆ ನನ್ನ ಸ್ಪೆಶಲ್ ಪಾಯಸದ ಸವಿ ಓದುಗರಿಗೆ ತಿಳಿಯುವುದಾದರೂ ಹೇಗೆ?  ವೆನಿಲಾ ಸ್ವಾದದ ಪಾಯಸ ಸಿದ್ಧವಾಗಿದೆ.