ಹಣ್ಣುಗಳ ಕಾಲ ಅಲ್ವೇ, ತಿಂಡಿತೀರ್ಥ ಆದ ನಂತರ ಒಂದು ಪೈನಾಪಲ್ ಕತ್ತರಿಸಿ ಇಟ್ಟಾಯ್ತು, ಹತ್ತು ಗಂಟೆಯ ಚಹಾಪಾನದೊಂದಿಗೆ ಹಣ್ಣು. ಬಿಸಿಲ ತಾಪಕ್ಕೆ ಒಳ್ಳೆಯದು. ಸ್ವಲ್ಪ ತಿಂದು ಮುಗಿಯಿತು.
ಉಳಿದ ಹಣ್ಣಿನ ಹೋಳುಗಳನ್ನು ಮಿಕ್ಸಿಯ ಜಾರಿನೊಳಗೆ ತುಂಬಿ,
ಸುಸೂತ್ರವಾಗಿ ತಿರುಗಲು ಬೇಕಾದಷ್ಟೇ ನೀರು ತುಂಬಿ,
ಚಿಕ್ಕ ಚೂರು ಶುಂಠಿ ಸಿಪ್ಪೆ ತೆಗೆದು, ಜಜ್ಜಿ,
ಪುಡಿ ಮಾಡಿದ ಲಿಂಬೆ ಗಾತ್ರದ ಬೆಲ್ಲ,
ಸುರುಚಿಗೋಸ್ಕರ ಉಪ್ಪು ಇರಲಿ,
ತಿರುಗಿಸಿ,
ಜಾಲರಿ ಸೌಟಿನಲ್ಲಿ ಶೋಧಿಸಿ.
ಇನ್ನೂ ಒಂದು ಲೋಟ ನೀರು ಎರೆದು ಚರಟ ಮಾತ್ರ ಉಳಿಯುವಂತೆ ಶೋಧಿಸಿಕೊಳ್ಳಿ.
ಅನನಾಸ್ ನಾರುಯುಕ್ತ ಹಣ್ಣು ಆದರೂ ಜಾಲರಿ ಸೌಟಿನಲ್ಲಿ ಕೇವಲ ಎರಡು ಚಮಚದಷ್ಟು ಚರಟ ಉಳಿಯಿತು.
ಅನಾನಸ್ ರಸ ದಪ್ಪ ಯಾ ಸಾಂದ್ರವಾಗಿದ್ದರೆ ಕುಡಿಯಲು ಯೋಗ್ಯವಾಗುವಂತೆ ನೀರು ಬೆರೆಸುವುದು ಉತ್ತಮ.
ಹಣ್ಣುಗಳ ರಸಕ್ಕೆ ಸಿಹಿ ಸೇರಿಸದೇ ಕುಡಿಯುವುದು ಬಹಳ ಉತ್ತಮ.
ತಂಪಾಗಿಸಿ, ಲೋಟಗಳಿಗೆ ತುಂಬಿಸಿ ಕುಡಿಯಿರಿ, ಹಾಯಾಗಿರಿ.
ರಸಭರಿತ ಹಣ್ಣುಗಳು ಮೂಳೆಗಳ ಬಲವರ್ಧಕ, ಸ್ನಾಯುಗಳ ಶಕ್ತಿವರ್ಧಕ. ಕ್ಯಾಲ್ಸಿಯಂ ಇನ್ನಿತರ ಖನಿಜಾಂಶಗಳನ್ನು ನೈಸರ್ಗಿಕವಾಗಿಯೇ ಪಡೆಯಿರಿ, ಔಷಧಾಲಯಗಳ ಮಾತ್ರೆಗಳು ಸುಮ್ಮನೆ ಅನ್ನಿರಿ.
0 comments:
Post a Comment