ಧೋರೆಂದು ಮಳೆ ಬರುತ್ತಾ ಇದೆ.
"ಈ ಹಲಸಿನ ಹಣ್ಣು ಎಷ್ಟೇ ಚೆನ್ನಾಗಿದ್ರೂ, ಚಳಿ ಹವೆ ಬೇರೆ.. ನಂಗೆ ಬೇಡ. " ಎಂದರು ಗೌರತ್ತೆ.
" ಸಂಜೆಯ ಹೊತ್ತು ಬಿಸಿ ಬಿಸಿಯಾಗಿ ಹಲಸಿನ ಹಣ್ಣಿನ ಪೋಡಿ ಮಾಡೋಣ. "
ಬೇಕಾದಂತಹ ಎಣ್ಣೆ, ಕಡ್ಲೇ ಹಿಟ್ಟು, ಅಕ್ಕಿಹಿಟ್ಟು, ಗೋಧಿಹಿಟ್ಟು ಇತ್ಯಾದಿಗಳೆಲ್ಲ ಇವೆ ಹಾಗೂ ಯಾವುದೇ ಮಸಾಲಾ ಸಾಮಗ್ರಿಗಳು ಈ ಹಣ್ಣುಗಳ ಪೋಡಿಗೆ ಬೇಡ.
ಹಿಟ್ಟುಗಳನ್ನೆಲ್ಲ ಒಂದೇ ಅಳತೆಯಲ್ಲಿ ಕೂಡಿಸಿ, ರುಚಿಗನುಸಾರ ಉಪ್ಪು ಬೆರೆಸಿ, ನೀರೆರೆದು ದ್ರವರೂಪಕ್ಕೆ ತಂದಾಯ್ತು.
ಹಿಟ್ಟು ತೆಳ್ಳಗಾಗಕೂಡದು, ಅತಿಯಾಗಿ ದಪ್ಪವೂ ಆಗಬಾರದು.
ಹಲಸಿನ ಹಣ್ಣನ್ನು ಈ ಹಿಟ್ಟಿನಲ್ಲಿ ಮುಳುಗಿಸಿ, ಬಿಸಿಯಾದ ಎಣ್ಣೆಗೆ ಹಾಕಿ , ಎರಡೂ ಬದಿ ಕೆಂಪಾದ ನಂತರ ಎಣ್ಣೆಯಿಂದ ತೆಗೆದು..
ಬಿಸಿ ಇರುವಾಗಲೇ ಆಹ.. ಆಹ ಅನ್ನುತ್ತ ತಿನ್ನುವುದು.
ಸಾಮಾನ್ಯವಾಗಿ ಹೋಟಲ್ ಗಳಲ್ಲಿ ಪೋಡಿ ಸಿಗುವುದಾದರೂ ಅಲ್ಲಿ ಮೈದಾ ಹಿಟ್ಟಿನಿಂದ ಪೋಡಿಗಳನ್ನು ಮಾಡುತ್ತಾರೆ. ಮೈದಾ ನಮಗೆ ಬೇಡ.
ನನ್ನ ಅಳತೆಯಲ್ಲಿ ಒಂದು ಲೋಟ ಹಿಟ್ಟು ಇದೆ, ಬೇಕಾಗಿರುವುದು ಏಳೆಂಟು ಪೋಡಿ..
" ಹಿಟ್ಟು ಉಳಿದ್ರೆ ಏನು ಮಾಡೂದು? "
" ಫ್ರಿಜ್ ಒಳಗೆ ಅನಾನಸ್ ಇಟ್ಕೊಂಡಿದ್ದೀಯಲ್ಲ, ಅದನ್ನು ಪೋಡಿ ಮಾಡಿದರೇನಾದೀತು? " ಗೌರತ್ತೆ ಮರು ಪ್ರಶ್ನೆ ಎಸೆದರು.
" ಹೌದಲ್ವೇ.."
ಈ ಪ್ರಕಾರವಾಗಿ ಪೈನಾಪಲ್ ಪೋಡಿ ಎದ್ದು ಬಂದಿತು.
ಈ ಸಂಜೆಯ ತಿನಿಸು ಸರಳವಾಗಿ ತಿಂದು ಮುಗಿಯಿತು.
0 comments:
Post a Comment